独幕粤剧《补镬》
原编剧：唐周 徐叔华
改编：区志刚李燕庭余虹民
饰演：小神鹰苏定娴 梁菁

时间：上世纪六十年代

地点：某农村

人物：刘大婶，养猪能手

      刘兰英，大婶独生女
      李小聪，青年补镬匠

         佈景：农家院落

(百花亭闹酒启幕·小猪叫声介)
刘大婶【内场白】嚟囉、嚟囉！仲叫乜嘢。
(锣边相思·大婶端猪潲上·喂猪介)
刘大婶【梆子中板】 (长序)
    我叫刘大婶，人人都识我，喜事在心笑呵呵，(笑介)真喺快乐不知，时日过。我养了队里，一只好猪乸，一胎就生下，猪花十几个，只只肥头耷耳嘴噘噘，圆圆椂椂，肉多多。
刘大婶【十字清】 (唱白)
    社员们，纷纷来我家订货。我门口阶基石，踩嗄、踩嗄、踩成一个脚印窝。只怪我，粗心大意闯了祸。打破咗猪潲镬，我急呀、急呀、急到我无可奈何。
刘大婶【七字清】
    拿了饭煲当猪潲镬。饭煲细小潲又多。啲猪仔整日嘈肚饿。碰跌潲桶又拱倒箩。咬烂南瓜大半个。食咗白菜有十一棵。又食咗一篮青豆角。
刘大婶【直转穆瓜腔】
    调皮猪，仲追入房，咬住我，拦住我，扯我，拦我，缠我，缠到双脚好比，呀！绑住大秤砣。又错手，打破了…
    (楔白)喺喺广州买嘅、又喺镶金边嘅、画咗彩凤嘅、喺我娘家嘅…
刘大婶【接唱】妆嫁茶壶一个。
    (士工相思楔白)
    (见猪仔食饱走散，急赶猪入栏、数猪；发现一只猪仔未入栏，赶！最后捉住。疼爱地)
刘大婶【七字清】
    喺你带头嘈肚饿。喺你带头拱倒箩。
刘大婶【三字清】
    食得肚圆圆，似皮球一个。
    好嚹乖乖地瞓觉，不准再囉嗦。(关猪介)
刘大婶【五槌滚花】
    猪仔日日大，食潲食得多，偏在这时将潲镬打破。
刘大婶【韵白】
    哈！本想话添翻一个嘅，但喺又要花费队里七文几。想落又唔符合增产节约嘅原则。阿兰英话去请补镬佬，相约在今日；哈，而家日晒屋樑嘞，人仲未到嚟，我心急。
    呃！听讲话哩个俏皮女，喺外面找咗个对象，姓乜、名乜、人品呀、相貌呀、职业呀、年龄呀，嘿！都瞒得我密密实实。阿兰英呀兰英，其实你唔讲吖，我都晓得！佢叫乜嘢……？佢叫乜嘢李小聪，住在南朗村北。呀！佢噚日一定喺冇去叫补镬佬，一定喺去咗佢对象嘅屋企呀。好！等我叫佢返嚟，问明至得。
    (向内)兰英，兰英！(冇人应，向外大声叫)兰英！
    (兰英内应介：哎！)
刘大婶【白】你啲猪菜洗成嚸咖？
    (兰英内应介：洗好嚹。)
刘大婶【白】洗好仲唔快啲返嚟?!
(兰英内应介：嚟嚹。)
(猪叫介/大婶：咪嘈囉，咪嘈囉。下介)
(入场锣鼓，刘兰英轻快上介)
刘兰英【士工慢板】
    堤边红荔挂满枝，天上彩霞光映河，小艇载瓜又载果，桨儿惊散，戏水鹅。我与小聪同上学，去年高唱毕业歌，建设美好新农村，我俩热情，红似火。回乡劳动情意合，我生产来他补镬，怎奈妈妈思想不正确，说补镬哩行，都低得多。前天我妈妈，失手打破镬，趁热打铁做工作，哩一个时机，勿放过。(进屋介)
刘兰英【白】妈！(大婶上介)
刘大婶【白】
    兰英，返嚟嚹？(英：返嚟嚹！)兰英，嚟，阿妈有啲嘢问嗄你。
刘大婶【叠芙蓉】我我我，我叫你揾补镬佬。
刘兰英【楔白】我去，去咗嚹。
刘大婶【楔白】去咗囉？
刘大婶【接唱】
    去你个俏皮鬼，你莫来骗我。哼！你…你吖，你根本冇叫补镬佬。
刘大婶【楔白】你喺去……
刘兰英【楔白】去边度呀？
刘大婶【接唱】
    去你对象屋企打牙骹，把时光消磨。
刘兰英【急白】
    冇呀，冇呀。妈！你唔好乱咁讲说话呀。
刘大婶【白】
    哎吔，你睇嗄佢吖，神色唔对！兰英，你噚日到底去边度呀？
刘兰英【白】都话去请补镬匠。
刘大婶【白】你真喺去请囉？
刘兰英【白】真喺去请。
刘大婶【白】喺请补镬佬?!
刘兰英【白】喺请补镬匠。
刘大婶【白】咁嚸解日晒屋樑，仲唔见人影呀？
刘兰英【白】
    妈，你急咩嘢唧，到时佢就会嚟嘅嚹。
(猪叫介/大婶叹气/出门张望介)
刘大婶【白】
    哎呀，你听嗄，你听嗄！冇镬煮猪潲呀，阿妈嚸解会唔急咖。
刘兰英【故意介/白】妈，今日喺初几呀？
刘大婶【白】今日喺初一囉。
刘兰英【白】初一…?!
    呀，妈阿妈，噚日补镬师傅讲：佢话初一唔嚟就十五嚟，十五唔嚟，三十一定嚟！(轻一槌介)
刘大婶【急白】乜嘢话！要等咁耐咖？
刘兰英【夸张地/白】
    鲠喺啦，人哋补镬师傅呀，忙得氹氹转。今日又到樟村，明日又到冼村，后日到李村，大后日……
刘大婶【白】哎呀，我怕佢飞得上天！
刘兰英【白】
    佢飞唔飞上天，就喺佢嘅事，总然之轮到我哋屋企，就喺月底。
刘大婶【白】
    嗄！哎呀傻女呀。咁嚸解当时，你唔拖佢返嚟吖？
刘兰英【白】
    嗄！嚸吖嚸吖？要我拖……，阿妈，咁嚸好意思呀？
刘大婶【白】哼！
    乜嘢唔好意思呀？拖个补镬佬返嚟补镬，喺正大光明嘅事，又唔喺叫你拖女婿，你呀真喺封建脑筋！
刘兰英【试探地/白】封建脑筋…?!
    阿妈，如果我哋屋企有个会补镬嘅，咁你话几好呀！
刘大婶【白】仲使讲，就喺可惜冇。
刘兰英【白】
    咁……咁你老人家，可以揾个会补镬嘅做女婿呀。
刘大婶【白】嗄！咩嘢话？你话咩嘢话？
刘兰英【白】
    我话呀，你老人家，可以揾个会补镬嘅做女婿呀。
刘大婶【白】唓！
    嚸解要揾个补镬嘅嚟做女婿呀？个镬烂咗，揾佢返嚟补嗄就差唔多，揾个补镬佬嚟女婿，我怕佢想烂心肝。
刘兰英【白】
    妈，照你咁样讲，世间嘅补镬佬，就唔使娶老婆嘅啦?!
刘大婶【白】哎呀！
    人哋娶唔娶老婆关你乜嘢事呀！俗语讲得好，“养女莫嫁补镬汉，黑口黑面似玄坛”。
刘兰英【白】
    妈，不过，我又听到有人喺咁讲啵！佢话：“你莫看轻补镬汉，佢为大家流黑汗，张家拉来李家嗌，一副傢罉都抢烂”。
刘大婶【旁白】
    哎呀，你睇佢，将个补镬嘅捧上天。呃！唔嗵佢个李小聪，喺个补镬佬？(作稍思状)哎呀，唔想唔似，越想越似呀。

(对兰英)唉！兰英呀！
刘大婶【减字芙蓉】
    婚姻本喺大事情，你找对象应看准。若然嫁个补镬佬，会误了你终身。
刘兰英【接唱】
    行行职业都光荣，补镬这行也要紧。老眼光睇新事物，阿妈真喺旧脑筋。
刘大婶【接唱】哎呀！
    乜嘢光荣唔光荣，补镬名声喺低一等。佢屋角檐前到处踎，一面墨黒尽灰尘。
刘兰英【三字清】
    满面灰尘，有乜要紧。补镬也是，为人民。
刘兰英【七字清】
    干革命不分贵和贱。没有补镬，也不行。(腔)
刘大婶【白】
    兰英，到底你嗰个李小聪，喺搞乜嘢嘅？喺唔喺个补镬佬？嗄！
刘兰英【白】唔喺！唔喺！
刘大婶【白】当真唔喺！
刘兰英【白】当真唔喺！
刘大婶【白】果然唔喺！
刘兰英【白】果然唔喺！
    唔喺就唔喺啦！妈，嚸解你咁唔相信人嘅唧！
刘大婶【白】好囉好囉！
    唔喺，唔喺！唔喺就好囉。兰英呀，阿妈就喺唔放心，我怕你选错对象呀。嗱，好似你咁嘅高中毕业生，乜嘢爱人唔好选吖？呢，你应该揾返个：有文化嘅、有技术嘅、职业好嘅、有前途嘅、贡献大……
刘兰英【白】妈！你试又嚟嘞。
刘大婶【白】好，阿妈唔讲囉，阿唔讲囉。
刘兰英【自语/白】嚸解佢咁耐都唔嚟嘅呢？
刘大婶【白】哎！
    兰英，你促徛喺度做乜嘢呀？仲唔快啲去催嗄佢。
刘兰英【白】
    好，我去催，我去催！(欲下回头介)
刘大婶【白】呃！
    兰英，你又试返转头做乜嘢呀？
刘兰英【白】
    妈呀，我返嚟梳嗄个头，换翻件衫吖嘛。
刘大婶【白】哎呀！
    梳乜嘢头，换乜嘢衫？又唔喺去相睇对象。
刘兰英【白】妈！
    你睇，我而家咁样出去呀，邋遢死啦！如果喺咁吖，人哋实会话：“你哋快嚟睇呀，快嚟睇呀，哩个吖，就喺刘大婶教出嚟嘅好女儿嚹”！
刘大婶【白】
    哎呀，好囉好囉好囉！咪吱哩喳嗱囉，要换就快去换囉！ (兰英下介)睇你哩个俏皮女吖…… (笑下介)
李小聪【喊叫/白】补镬！
    (大撞点，李小聪挑补镬担上)
李小聪【长句二流】
    田园披彩绿，到处唱新歌，我支援农业心似红炉火，肩挑风箱越岭，又过河。(合)
    补镬哩一行，虽是小手艺，但螺丝虽小用处大，只要群众称心，我何惜咙喉喊破。(上)
    (喊叫白：补镬！)
李小聪【快打慢二流】
    一副傢罉穿南北。(士)
    人人见我笑呵呵。(尺)
    担挑挑满阶级情。(合)
李小聪【合尺花】落雨翻风无间阻。(上)
李小聪【喊叫/白】
    补镬，有烂镬快啲拎出嚟补啦！
刘兰英【西皮连序/边唱边上介】
    喊叫声声听到真，分明佢口音。笑颜开，喜在心，我喜在心。我整衣衫，笑吟吟，急步出门行。(出门见小聪介)小聪！
李小聪【白】兰英！
刘兰英【近前轻声/白】
    小聪！嚸解你而家先至嚟嘅？
李小聪【白】因为我哋补镬组开会呀！
刘兰英【白】真喺急死人嚹！
李小聪【白】我而家立即入去补。
    (走近担挑，兰英拦介)
刘兰英【白】咪住！
李小聪【白】嚸解呀？
刘兰英【白】
    我阿妈，而家仲喺睇唔起补镬嘅呢。
李小聪【白】哦！
    佢老人家，有啲旧观点，我哋要耐心说服呀。
刘兰英【秃白榄】
    你又唔知到，我道理讲咗几箩，佢当作喺耳边风，不瞅又不睬。趁今日喺个机会，帮助佢认识过来。
李小聪【楔白】你有乜嘢办法帮佢改呢？
刘兰英【楔白】
    办法，我已想出嚟嘞：等一阵我阿妈，睇唔起补镬嘅，你就故意唔帮佢补镬。走啦！
李小聪【白榄】走?!哎，唔得。
    哩个办法行唔通，对支援农业有障碍。佢虽然睇唔起补镬，我为佢补镬亦应该呀。
刘兰英【白】
    小聪，我睇只有咁样，先使佢认识到：“如果冇补镬嘅，就唔得”。
李小聪【白】
    咁都好。我等阵见到你阿妈，咁我嚸样称呼呀？
刘兰英【白】就叫伯母。
李小聪【白】哦，叫外母！
刘兰英【白】
    哎，唔得唔得！小聪呀，暂时叫住刘大婶先喇！
李小聪【白】好，我暂叫刘大婶！
刘兰英【白】小聪呀，叫啦！
李小聪【喊叫/白】
    补镬！补铜煲、锑煲、锅杂(搪瓷)、面盘、铁水桶。
刘兰英【白】小聪呀，大声啲嗌呀！
李小聪【白】大声呀？(喊叫)
    补镬，有烂镬快啲拎出嚟补啦！
刘兰英【白】妈呀，补镬师傅嚟嚹！
    (刘大婶急出门，兰英迎介)
刘大婶【白】
    补镬师傅嚟嚹，喺边度呀？(高兴地迎上)补镬师傅…

(突见小聪是年轻人，仄槌/愕然介)哼，喺个后生仔。后生仔呀，乜你…会补镬嘅咩？
李小聪【清歌】
    不会补镬我不来，补得唔好你拆招牌呀！
刘大婶【楔白】
    哎吔，真喺有趣咯，仲会唱歌嚟答话添。
李小聪【清歌】
    而今日子天天好，我心头快活歌仔成箩。
刘大婶【楔白】
    心头快活就爱唱歌…对！呃，后生哥呀，你姓乜嘢咖？
李小聪【清歌】
    十八子就喺我姓，桃花同我一起报春来。
刘大婶【沉吟/白】
    十八子、桃李同报春…?!十八子喺李，桃李争春…呃！后生哥呀，你鲠喺姓陈李张黄何嗰个“李”。
李小聪【白】正喺姓李。
刘大婶【白】咁你叫李乜嘢呀？
李小聪【口快快地/白】我叫李小…
    (兰英诈咳急止，大婶追问“小乜嘢”介)
李小聪【急中生智介/白】小名叫做满仔呀。
    (兰英、大婶等松一口气)
刘大婶【白】喺哩，你读过书未呀？
李小聪【白】读过，高中毕业！
刘大婶【三脚凳】乜嘢话?!
    你喺高中毕业生？
李小聪【接唱】
    我并毋欺骗你。难道大婶你不相信？
刘大婶【接唱】我相信?!
    佢向我吹牛皮。佢一定喺懒读书，才做补镬仔。若然有学问，就应该大有作为。
刘大婶【滚花】后生哥呀，咁嚸解…
    你唔去考大学，甘愿学补镬哩一门手艺。
李小聪【白】
    响应党号召，支援农业第一线！
刘大婶【白】哎吔，同我兰英讲嘅一样。
李小聪【口快快地/白】本来就喺一样！
刘大婶【白】咩嘢话？(追问介)
李小聪【支吾/白】
    我话…喺，搞乜嘢劳动都喺一样…。大婶，你老人家喺咪要补镬呀。
刘大婶【白】
    喺呀喺呀！我想补翻只猪潲大镬。唉！都怪我一时粗心大意，哩几日饿到啲猪仔哕哕叫。
   (小聪正与兰英低语，心不在焉地)
李小聪【白】哦，呱呱叫！
刘大婶【白】
    咁我用个饭煲皧嚟煮猪潲啦，搞到人都唔能够依时食。
李小聪【白】一齐食呀。
刘大婶【白】
    兰英呀，入去帮阿妈攞只镬出嚟啦。
    (兰英应介/大婶对小聪/白)
    嗱，你等嗄先，我入去攞只镬出嚟呀嗄。
    (小聪开炉/大婶兰英抬镬上)
刘大婶【白】嗱师傅仔，嗱你同我睇嗄只镬啦。
李小聪【白】哦，大婶呀，你哩只镬烂咗哩一度。
刘大婶【白】喺囉，要同我补好啲至得啵。
李小聪【白】得嘞，我同外母补镬…
刘大婶【白】咩嘢话？咩嘢话？(追问介)
李小聪【发现露出马脚，支吾/白】
    哦…我话上次同我外母补镬补得好好，哩次同你老人家补吖，一定要补得好嘅。
刘大婶【白】
    唔，要补好啲至好嗄。师傅仔呀，你补呢只镬头，要几多钱呀？
李小聪【白】嗄！就三毫子啦。
刘大婶【白】
    三毫吖！好啦好啦，三毫就三毫啦。喂，最紧要补好啲，嗄。
李小聪【白】得嚹！
刘大婶【发现小聪的书/白】
    咦，真喺睇唔出啵，过村补镬仲带埋本书添呀嗄。哩本喺咩嘢书嚟咖。
李小聪【白】《雷锋日记》呀！
刘大婶【白】
    《雷锋日记》?!哦，喺呀，而家人人都向雷锋学习。你而家就唔好学住嚹，你最紧要快啲同我补好只镬，我等住煮潲咖。
李小聪【白】
    大婶呀，你喺咪想快啲呀？如果想快嘅，最好揾个人帮嗄我手。
刘大婶【白】做咩嘢呀？
李小聪【白】拉风箱！
刘兰英【白】拉风箱，我最会拉——
刘大婶【白】
    哎吔，睇嗄你吖，拉唔喺拉囉，又我最会拉——
    (兰英帮忙，小聪生火，见大婶在旁，想法支开介)
刘兰英【白】妈呀，你徛喺度做咩嘢呀？
刘大婶【白】我吖，喺度睇嗄囉！
刘兰英【白】
    妈呀，你仲唔冲壶茶畀过师傅仔饮。
刘大婶【白】
    吖，喺啵嗄！好好好，师傅仔呀，等我去煲滚水，冲碗马蹄粉畀你食嗄。
李小聪【白】大婶，唔好咁客气嚹。
刘大婶【白】
    唔紧要！不过，你最紧要同我补好啲就得嘞。
嗱，我去嚹。
刘兰英【白】
    小聪呀，你听到嘛，阿妈话冲马蹄粉嚟招待你呀。
李小聪【白】得嘞，唔好讲咁多，我哋喐手啦。
    (俩人相视一笑，开始工作介)
刘兰英【西皮连序下句】
    手拉风箱呼呼响，火炉烧得红旺旺。
李小聪【接唱】
    女婿补镬来，外母不知详。
刘兰英【接唱】
    操作要留意，当心手烧伤。
李小聪【接唱】纵然烧伤不紧要，
刘兰英【接唱】只怕我亲娘，难改旧思想。
李小聪【浪里白】
    行船莫怕滩，跑马莫怕山。
    帮助你亲娘，换上新思想。
刘兰英【接唱】风箱扯得呼呼响，
李小聪【接唱】炉火烧得更红旺。
刘兰英【接唱】我用力拉动，
李小聪【接唱】我用心来补。
刘兰英【接唱】拉呀拉，
李小聪【接唱】补呀补。
刘兰英【接唱】拉呀拉，
李小聪【接唱】补呀补。
英  聪【合唱】
    小聪(兰英)好同志，教育我(你)亲娘，改变旧思想。
刘大婶【西皮连序下句/边唱边上】
    听见风箱呼呼响，火炉闪闪光。这位后生哥，生得好模样，诚实又伶俐，随身带文章。
    (叹腔)只可惜无志气，入错补镬哩一行！
刘大婶【白】师傅仔呀，只镬补成嚸呀。
李小聪【白】补好咗一大半嚹。
刘大婶【白】等我睇嗄你嘅巧手艺。
李小聪【白】好呀，请大婶指教！
刘大婶【白】(上前看介)
    哈，真喺睇唔出啵，年纪轻，手艺老，破镬头，补得好。
刘兰英【白】鲠喺啦，人哋喺家传手艺吖嘛。
刘大婶【白】你又嚸知呢？
李小聪【见兰英支吾/白】
    喺我嚿先同佢讲嘅。大婶，你睇你只烂镬补得好唔好呀？
刘大婶【韵白】嘿！
    功夫无花假，唔喺大婶把你夸，年纪轻轻好手艺，将来一定喺个补镬……
刘兰英【韵白】专家！
李小聪【韵白】手艺粗糙未到家。
刘大婶【韵白】
    唔喺大婶吹牛把口誇，我头髪虽花眼不花，一眼看出人好丑，一眼能数五十只猪花。
李小聪【韵白】
    大婶本领誇啦啦，可惜有人眼力差，沉香当烂柴，龙驹当瘦马。
刘大婶【白】喺边个呀？
李小聪【白】喺我外母。
刘大婶【白】嗄！哈哈…
    哩点我就睇唔出嚟嘞，乜原来你结咗婚嘅嗱。
李小聪【急白】
    未呀未呀，大婶，你唔好乱讲呀，我哋下定决心：要、晚、婚。
刘大婶【白】
    哦，而家喺谈紧恋爱喺嘛。嘿！好后生！呃，喺呢，咁你嗰个外母又睇唔中你呀？
李小聪【白】外母吖，大婶！(大婶随口应介)
李小聪【七字清】
    外母嫌我当补镬匠。开口闭口说我入错行。话我黒口黒面似玄坛一样。长年累月踎在屋旁。劝她女儿另找对象。大婶你说应不应当。
刘大婶【接唱】
    难怪你外母有咁嘅思想。似你聪明能干手艺强。
刘大婶【滚花】
    嚸解七十二行你唔挑，为何要当补镬匠?
李小聪【白】
    咩嘢话?!原来你老人家，又同埋我外母思想一样咖？你只烂镬，我唔同你补嚹。
刘大婶【白】
    咩嘢话咩嘢话，唔补囉，哎吔，咁嚸得咖。
刘大婶【爽二簧】
    你补得唔三唔四，我亦无，用场。
李小聪【接唱】
    请你另找高明，我要收炉，不干。
刘大婶【接唱】
    何以收炉不补，为了，哪桩。
李小聪【接唱】
    你看不起我哩一行，我看不起你的，思想。
刘大婶【接唱】
    你年轻脾气大，凡事要好好，商量。
李小聪【唱序】没有什么好商量。
李小聪【 白 】
    你嫌我补镬无出息，你揾个有出息啦。
刘兰英【故意打猪叫/白】
    妈阿妈，啲猪仔饿到哕哕叫嚹。
刘大婶【手足无措地/白】
    哎吔…哎吔师傅仔呀师傅仔，有道为人为到底，补镬要补齐吖嘛，咁嚸能够补到一半又唔补嘅呢。
李小聪【白】
    你嘅思想唔改变，我就唔补！
刘兰英【白】
    妈阿妈，啲猪饿瘦咗，队里就会受损失嘅嚹。
阿妈，咁嚸样呀?!
刘大婶【焦急地/白】
    哎吔兰英，你帮阿妈手，劝嗄佢啦。
刘兰英【白】
    我去?!又好！喂，补镬仔，你咪以为你了不起啵，你终日在“屋檐角下踎，满面尽灰尘”，难怪你外母睇唔中你，我都睇唔起你呀。冇你补镬我哋一样能够煮猪潲，我阿妈一样能够受表扬。走啦走啦！
    (大婶在旁听见更急介)
李小聪【白】我走！
刘大婶【白】
    唔好走住，咪走住咪走住，有事好好商量吖。
李小聪【白】我要走！
刘大婶【急拦介/白】唔走得！(恼火地)
    好！唔补就罢就。哼！学得尐咁多本领唧，就响度虾人囉啵喺嘛？我问嗄你呀，你学习过…《为人民服务》未呀？仲带住本《雷锋日记》，喺度装模作样！你呀，你对集体养猪事业嚸睇法呀？你呀，你逢年过节，想唔想食猪肉呀？
李小聪【白】哼，嚸解我会唔想食猪肉呀？
刘大婶【白】
    哦，乜你都想食猪肉嘅咩？咁我再问嗄你嘞，你既然想食猪肉，咁又使唔使养猪呀？
李小聪【白】当然要啦。
刘大婶【白】咁既然要养猪，咁使唔使煮潲呀？
李小聪【白】当然要煮潲！
刘大婶【白】既然要煮潲，咁使唔使镬头呀？
李小聪【白】当然要嘛！
刘大婶【白】
    既然要镬头，咁个镬头烂咗，使唔使人嚟补呀？(质问介)嗄，讲啦，讲啦，嚸解唔出声呀？补镬仔！你喺学校读书嘅时候，嗰啲老师喺嚸样教你咖？
刘兰英【白】
    喺呀，你老师嚸样教你咖：“对于哩种错误嘅思想，就喺要斗争”！
刘大婶【以为女儿帮自己/白】
    对嘞！好似你哩种咁嘅服务态度，逢年过节你就唔配食肉，你呀，只配食骨头！
李小聪【白】
    好！逢年过节我就食骨头。不过，我想问嗄大婶你一句，你老人家为乜嘢事干会得到表扬呢？
刘大婶【白】凭我养猪养得好唧。
李小聪【白】
    咁我再问你嘞，你养猪要唔要煮潲呀？
刘大婶【白】当然要煮潲嘞。
李小聪【白】咁煮潲又要唔要镬呢？
刘大婶【白】鲠喺要镬啦。
李小聪【白】
    既然要镬，咁只镬烂咗，又要唔要人补呀？
刘大婶【白】哎吔，鲠喺要人补啦。
李小聪【白】要啦嘛？
刘大婶【白】要定啦！
李小聪【白】
    大婶，如果人人都似你咁，睇唔起补镬嘅人，嗰阵时，边个愿意学补镬呢？嗱，你今日只镬烂咗，又边个同你补呀？

(追问介)你讲吖?!你讲落去啦，嚸解你老人家又唔出声呢？
刘兰英【白】妈，你冇道理嚹。
李小聪【士工慢板】大婶！
    革命工作是整体，好比一部大机器，你养猪要我来补镬，我补镬还须，靠炼铁。钢铁工人神通广，也要吃饭和穿衣，吃饭离不了农民，穿衣又要，靠纺织。
李小聪【直转七字清】
    七十二行都重要。彼此相靠不能离。
刘大婶【白榄】呃…对、对！
    搅咗大半天，还喺我唔对。劳动我分贵贱，不辨是和非。

(不好意思介)
    师傅仔呀你莫怪，有理我服输。只怪我学习少，所以错误思想未清除。
李小聪【白榄】
    只要你认识过嚟，烂镬帮你补到满意。
刘大婶【白榄】
    兰英呀，你快去冲马蹄粉啦。(介)沙糖要落多啲呀。
刘兰英【白】知到嚹！(笑下介)
刘大婶【白】
    师傅仔呀，等我攞啲烟出嚟畀你食嗄。
李小聪【白】
    大婶，唔使嚹，我唔会食烟咖。(双关地)唔使咁客气嘞，我哋就喺一家人。
刘大婶【白】对！一家人。等我嚟帮你拉风箱。
李小聪【白】唔使嚹唔使嚹！
刘大婶【白】
    唔紧要唔紧要，我嚟我嚟。师傅仔，仲唔快啲补起嚟。
李小聪【减字芙蓉】好！
    烧熔铁水补镬头，小聪心中暗欢喜。
刘大婶【接唱】
    我拉风箱炉更旺，师傅仔补镬汗淋漓。
李小聪【吊芙蓉】螺丝虽小用处大，
刘大婶【接唱】莫把补镬来看低。
刘兰英【接唱】补镬哩行重要不重要？
刘大婶【接唱】重要！哩行缺少成问题。
刘兰英【三字清】有什么问题？
刘大婶【接唱】会饿坏猪仔。
李小聪【接唱】破镬补好了！
刘兰英【接唱】快煮潲喂猪。(腔收)
刘大婶【楔白】睇嗄，哎吔，真喺补得唔错呀。
婶  英【合唱百花亭闹酒】
    好功夫，技巧老到，补得光滑、牢固。破镬再返新，多亏有小师傅。
刘大婶【白】嘿！真喺补得唔错呀。
    师傅仔呀，嚿先你唔喺话，你嗰个外母又喺睇唔你补镬嘅？依我睇呀，你再去同佢补多两只镬，把嚿先同我讲嘅说话，再同佢讲一次，我包保佢一定会通。
李小聪【白】
    大婶呀，我外母思想，已经通咗嚹。
刘大婶【白】咩嘢话，通咗囉？几时通咖。
李小聪【白】喺我嚿先同佢讲通嘅！
刘大婶【怀疑地/白】嗄！你鲠喺……
李小聪【白】我就喺李小聪！
刘大婶【白】嗄！
    哎吔，兰英，你个俏皮女，你哋究竟做嘅喺乜嘢戏咖！
英  聪【科反/白】我哋喺做粤剧《补镬》！
刘大婶【恍然/白】哎吔！
                       剧终