苏州小吃有几化？

    荡观前，白相玄妙观，蛮巧，正好办小吃节。看见块牌子写仔格<<苏州小吃>>传统民谣，点点，推扳得野豁豁，不过讲着仔点皮毛。就拿小吃节浪格物事来讲，石刮铁硬格苏州老底子小吃勿多，七勿老欠格勿少。啥格豆皮，油氽格冰淇淋，侪轧勒浪，哪哼算啥苏州小吃呐？

    倷讲呐，想尝尝伲苏州格时鲜货。弗晓得，一开口，人家听勿懂吾要点啥，侪是外路人，只好弯转仔格舌头打官腔。老话讲，情愿听苏州人吵相骂，勿愿听宁波人白话。现在好哉，满天满地九腔十八调，倷浪自家屋里，阿勿好讲苏州闲话哉，倷格闲话再嗲再糯，人家听勿懂，赛过白墙头浪刷白水，白说脱个。呒拨办法，只好苏州人说官话，管倷怕弗怕。

     格场一来，一径学仔格普通闲话，回转来想写两句方言，舌头阿犟哉！长远勿曾用苏州闲话写博文哉，一动笔，觉着写出来勿象腔哉。今朝头试试，就顺口几句，写一段"苏州小吃有几化"，勿多，匆匆忙忙，先说个四五十种，请大家先尝尝:

                            苏州小吃有几化，结葛罗多勿勿少。

                   早浪点心要便宜，芝麻大饼夹油条，

                   外加一碗豆腐浆，热吹潽烫吃得饱。

                   粢饭羌饼葱油饼，刺毛团子大方糕。

                   米饭饼夹猪油糕，萝卜丝饼米风糕。 

                   宽汤重青一碗面，鲫鱼背上焖肉浇。

                   炒面要吃两面黄，油氽紧酵小心咬。

                   绉纱汤包一口吞，鸡丝馄饨汤水好。

                   青菜汤下瘪嘴团，菠菜肉丝炒年糕。

                   荤素有馅叫馒头，刀切无芯称大包。
                   酒酿饼，平盘烤，糖芋艿，炆火熬。        

                   老虎脚爪蛋面衣，香脆饼靠手托牢。

                   浑蛋喜蛋大黄蛋，一百三样百页包。

                   春卷五香茶叶蛋，锅贴烧卖八宝饭。

                   喜气洋洋定胜糕，生日祝贺送寿桃。               

                   糖油山芋沙角菱，臭豆腐干粢饭糕，
                   生煎馒头蟹壳黄，焐酥豆浪洒甘草。

                     正仪团子生生青，震泽香干黑里俏。

                   芝麻糊，焐熟藕，绞连棒，三角包。

                   笃笃笃，竹梆拷，骆驼担浪卖元宵。

                   当当当，小锣敲，鸡鸭血汤冷饭淘。
                   奶油夹心翻花样，哈罗面包沿街叫。

                              豆腐花担忒心急，未成开张喊完了。

              苏州玄妙观骆驼担小贩叫卖塑象

海棠糕,梅花糕.酒酿饼

大方糕，定胜糕

博友好友接着唱:
五卅路32号2011-04-20

              盐金花菜黄连头，炒肉团子黄松糕。

博主接:       刮辣辣，三把盐炒豆，

              甜咪咪，奶油五香豆，

                   双馅团子条头糕，酱爆螺蛳鸭肫干。

渭南汉2011-04-20
              稻香村里熏鱼香，采芝斋柜松子糖。
              黄天源吆小阔面，小有天递鸡头汤。

博主接        叶受和卖云片糕，野荸荠有桔红糕。

                   马泳斋熬小麻将，陆稿荐出酱汁包。

              鸭肫干用麻线串，咸水果玉草纸包。
德山2011-04-20

              如此佳篇宜吟唱，还是蒋调称相当，
              唱罢四顾生愁绪，多见烧烤麻辣烫。