上海人对上海个记忆侪有一条弄堂，弄堂也有得交关名堂经。像斯文里、大庆里搿种叫石库门，九江里、八埭头搿种叫广式里弄，静安别墅、霞飞坊是新式里弄，上方花园、凡尔登花园是属于花园式里弄。

勿管是石库门还是洋房，开始个辰光侪是有气派个，后首来轧进去了勿少人家，独门独户变成了七十二家房客，灶披间搭仔卫生间侪是四五家人家佮用个，拥挤不堪，不过上海人也由此练成了螺蛳壳里做道场的功夫。

上海海纳百川，啥地方个人才有，公开场合侪用上海闲话打招呼。弄堂里常庄可以听到“王家姆妈”“李家伯伯”“侬好呀”“晏歇会”。在自家屋里向就侪讲自家个家乡闲话，各地方言侪有特色，山东人邪气豪爽，苏北人相对泼辣，宁波人交关生硬，苏州人邪气软糯，真是一个大千小世界。

弄堂里过着懒洋洋的日脚，有着浓浓个生活气息。侬看，秋天介个下半日，弄堂里向静悄悄个，空气里飘过一阵阵个桂花香味，老阿奶坐辣太阳下头打瞌憧，老伯伯扎辣一道着着象棋，吃吃茶，迭个辰光是最最惬意个。

 “人闲桂花落，夜静春山空。月出惊山鸟，时鸣春涧中。”

夜到，万家灯火，搿个城市，搿条弄堂就是我最愿意亲近个地方，侬听：“纤云弄巧，飞星传恨，银汉迢迢暗度。金风玉露一相逢，便胜却人间无数。柔情似水，佳期如梦，忍顾鹊桥归路。两情若是久长时，又岂在朝朝暮暮。”

弄堂，迭个邪气温柔个名字，永远是我放勿落个世界，一辈子个心念心念。