2017年10月9日

方卓如 方如玉帅

好难找寻资产储存财富

曹星如可能自己都以为会输，点知最后变赢。如果河野公平冇用头撞到曹星如开唔到眼，打到尾边个会赢？如果曹星如额头唔系肿到成只鸡蛋咁，左眼痛到撕心裂肺，会唔会打得更有劲，唔会愈嚟愈似捱打？如果唔系第七回合终止比赛，而系第十回合，会唔会由河野公平点数胜出？

世界上冇咁多如果，只有结果。结果就系保持连胜，但系仲令支持者头痕。万一唔同河野公平重赛，下一场自然要挑战日本世界冠军井上尚弥。但系井上用6个回合就有能力打低河野，而且仲比曹星如细6年，八成比赛都系打到对手瞓低。曹星如本来就系要用同河野一战嚟测试自己挑战井上嘅能力，而家未达测试目的，又畀自己点数赢咗，仲系保持全胜纪录，下一步点算？急流勇退收山？唔理年纪增长再用一场比赛测试实力？直接挑战井上，唔打就唔会输，打就一定要赢？相信消紧肿嘅曹星如而家谂到头都大埋。

全球资产价格泡沫同曹星如肿咗嘅额头一样，愈嚟愈大。《经济学人》都觉得唔对路，封面专题报道。但同好多专题故仔一样，《经人》都系冇答案，只系讲啲阿妈系女人嘅建议，例如中央银行应该避免泡沫涨得再劲爆得更轰烈。问题系而家全球资产价格上升，已经唔系因为低息或量宽。美国开始了加息周期，但系股市照升；香港加息已经行动之中，发展商提供的呼吸按揭计划，利息支出比银行按揭高出甚多，但系无阻入市意欲，楼盘推几多买几多。买股票可以系非理性，例如高追众安（06060）毫无基本因素可言，纯粹寄望有下手更高价接货，或者系理性地认为有非理性嘅下手出现。买楼好难系非理性，因为涉及借一笔还大半世嘅债，借钱系唔会非理性，除非赌博翻身。

资产价格不断上升，通胀率与失业率同时处于低位，一连串同以往经济理论唔符合嘅事情，好大程度系因为人类嘅生活模式同以往唔同。网购同freelance工作方式盛行，已经将60年前提出嘅Phillips curve打冧。年轻人生活唔再忧柴忧米，满足佢哋嘅唔再系物质生活，追求银纸唔系大部分年轻人嘅目标。

全世界嘅银纸落入一小撮中年及老年人手上，佢哋无处可使，惟有就系不断累积资产。反正佢哋都冇几耐命使钱，回报多少并非主要考虑，反正就系要搵方法储存财富。

与其话年轻人靠父干买楼，倒不如话老窦老母利用个仔嘅首置quota，帮自己买多层楼。要记住，将来父干母干百年归老，年轻人自然有层楼接手。而家唔同以前有几兄弟姊妹要争家产，年轻人将来有层楼承继几乎系必然嘅事，唔一定要而家辛苦供楼。有子女靠父干买楼，更多嘅其实系父干靠子女帮自己买楼，要个仔供。究竟边个搵边个着数？讲唔清。新一代好难累积财富，上一代好难找寻资产储存财富，就系当今世界嘅写照。