2017年6月28日

方卓如 方如玉帅

最惊唔系跌系停

细价股狂跌，总算香港系成熟市场，任你跌，唔会恐慌性停牌。否则的话，十几只股票集体停牌，场面仲惊吓过大跌。富贵险中求，跌到落一仙敢捞底嘅，有能力即日赚几倍，只要唔停牌；所以话，投资者最惊嘅唔系跌，系停。

今年上半年嘅升市同大时代嘅升市唔同，细价股有份升嘅数目唔多，证明两年前跌咗落去之后，市场元气同胆量未回复，市况未旺，只系腾讯（00700）带头嘅大蓝筹有人买。另一个原因系内地严防走资，南下买壳嘅活动受阻，令细价股最主要嘅活力来源供应不足。股市接近26000点，但投资气氛完全唔似，只系经常见人后悔冇买腾讯。

经过今次嘅暴跌事件，再加上咨询中嘅上市改革，将来港股生态会完全唔同晒。简单嚟讲，啤壳致富呢条横财命，香港人再无福消受。就算畀你档生意真系有本事上市，唔好以为上市之后就可以等人埋嚟买壳，净袋几亿。将来壳价必定跌，唔系升，而且仲要成交疏落，因为A股逐步会盖过港股，成为资金追逐嘅对象。加上卖壳嘅人多，但有本事抬钱嚟香港买壳嘅人少，有乜法子唔跌价？唔收钱卖壳嘅系高技术动作，只有最专业嘅小撮人先识做同够胆做。将来上市公司留番畀懂得上市操作嘅人用，唔懂得市场运作嘅人士，心理会好唔平衡，唔觉得身家因为上市而厚咗。

炒股票发达嘅人我见唔少，但将来相信好难再有人炒股票发达。腾讯可以带挈你由3蚊升到上接近300蚊，计埋1拆5同派息，当初买一手连使费唔使4000蚊，变成而家未够200万。但畀你叻尽，当初买咗100万好未？一直唔沽到而家都未有5亿。过去13年咁多机会，炒楼好，炒股票都好，而家身家点止5亿？买中股王一直唔沽都唔系发达之路，何况连响股王入面工作嘅人，都做唔到一股唔沽？炒股票发达其实易过买中只股票坐到发达。不过将来港股冇呢支歌仔唱，因为股市会学楼市一样，打击炒家。正如楼市买卖倾向一手楼，未来股市都会倾向大蓝筹，尤其是个别政策扶持垄断股。佢哋唔一定系公用股，但个别公司大到变成垄断，政策都要向佢哋倾斜以便互惠互利。未来世界系强者尽擸，买股票梗系买呢类公司，唔使谂。买其他细价股，就好似买二手楼一样，成交少，干升，沽货难。就算系明日之星，犹如13年前嘅腾讯，你未起飞，途中相信都会俾无数嘅评论同沽空报告写鬼死你。唔好忘记，腾讯都有一段艰苦经营期，都试过股价同盈利唔相干。当年嘅腾讯生于今日，随时俾人话系泡沫系老千，俾沽空机构围剿。

香港系金融市场，但系呢个市场开始唔畀香港人玩。又或者，系香港人一直玩开嗰套唔畀玩，要跟人哋嗰套。冇话啱定唔啱，正如帆船比赛，边个定嘅规矩，就跟边套玩，唔系边有得赢？

顺带一提，新西兰队真系赢咗美国杯，我肯定将来美国杯斗船，全部都系用脚踩。