◎梁倩薇 编辑

　　星期日经过永汉电影院，见里面已经拆剩一个框。呢座满载广州人回忆嘅电影院，未来将变成一座商厦，只保留两个小影厅作为商厦配套。

　　永汉系一家名副其实嘅老字号，建成于1927年，当时名叫永汉影戏院；1960年因为专门放映新闻纪录片改名新闻电影院；1986年又改为永汉电影院。数数手指头，永汉至今已有80几年历史了。

　　永汉电影院曾经无比辉煌。可惜，我认识佢嘅时候，永汉已开始走向没落。记得我第一次去永汉，系学校组织收睇一部爱国教育片。对于影片，我完全无印象，但当我睇完电影一行出电影院，就即时留低今生难以磨灭嘅第一印象——哇，好多、好多、好多“陪睇”啊！佢哋浓妆艳抹，低胸露背，最明显嘅身份标志系将银纸放喺丝袜里面，见到阿伯就上前兜搭。

　　点解系阿伯，唔系阿哥阿弟呢？原来当时永汉电影院有两“旧”：影片旧，设备旧，一般年轻人唔愿意光顾，喺北京路行完街，宁愿兜个大圈去市一宫电影院买票，都唔肯帮衬永汉。于是，永汉就沦为某些咸湿阿伯同暗娼嘅“鹊桥”了。

　　为重拾辉煌，永汉亦曾经努力过。1998年6月，永汉重新修葺，11月复业迎客。但令人遗憾嘅系，面对新一代电影院嘅挑战同竞争，曾经历风雨嘅永汉始终未能逃过停业命运。大电影院缩成两个厅，意味着市场大幅度缩减，而喺呢个强者生存嘅年代，两个影厅又可以维持几耐呢？