◎梁倩薇 编辑

　　最近，全中国重症肌无力患者都打锣咁揾一种口服药，叫做“溴吡斯的明”。街坊左刮右刮，终于发现医院药店竟然成两个几月无新货入。存货买少见少，患者面临断药，无奈之下只好揾媒体收风：“救命药来嘎，点解唔生产啊，大佬？”最后，记者揾来厂家驻广州销售代表解释：“新生产证未到手，唔敢生产新药。”

　　照计，间间药厂都要换新证嘎啦，点解其他药继续有得卖，呢只药就断档？如果个个有样学样，患者未好牙烟？而且，换新证又唔系一两日嘅事，你要换要停产都无所谓，但总该事前打声招呼要人地储备几个月药啊。而家唔声唔声就话停，你知唔知会死人嘎？

　　有行家就私下透露话：呢啲不过係借口。停产唔止一次嘞，上次恢复生产后就乘机升价——不过，只药都算买得平，33蚊可以食20日。怀疑厂家无钱赚，根本无心机做；又係独家生意，全国得佢一家有得卖。佢劈炮唔捞，其他人未眼瘫瘫咯！

　　咁我就要问了，全国医药生产无统筹嘎咩，点解听任上海呢家药厂一家独大，挟持全国百万患者？重症肌无力又唔係新病，配方点解唔发落其他药厂去做？垄断弊端多，竞争有进步，呢个道理三岁细蚊仔都识。如果配方真係涉及机密，只能由一家厂把持，咁作为顶头上司嘅相关部门点解唔督促佢保持生产，点解唔帮助佢稳定利润？

　　好多“点解”，有时道理好明显，但係偏偏无得解——咁先叫做咄咄怪事啊。