鸡年将近，微信再次疯传粤语鸡嘅成语，以下喺一热门贴（所传有错字等，已予更正），漏左好多，余作补正：

喺（一说响）广州

有一种货币叫一蚊鸡

有一种食品叫糯米鸡

有种女人叫瞠鸡（正写鋹雞）（见后面注1）

失足女叫咯咯鸡

有一种水平叫小学鸡

无证车辆叫野鸡

三轮摩托叫三脚鸡

两轮摩托叫卜卜鸡

有一种工具叫烙（辣）鸡

有种高兴叫兴过烙（辣）鸡

有一种幸运叫执死鸡

有一种莽撞叫舂瘟鸡（鸡隻發瘟，个头舂米咁样）

错过机会叫走鸡

亦可以叫漏鸡

正确判断叫冇走鸡

有一种忙乱叫腾鸡

有一种好处叫捞鸡

有一种指挥叫吹鸡

有一种懒惰叫偷鸡

有一种环境叫静鸡鸡

不好的结局叫谢鸡

占人便宜叫菠萝鸡（靠黏，一种纸黏的鸡玩具，在菠萝庙前卖）

高声尖叫叫银鸡

吓唬别人叫吓鸡

嘴巴利害的叫铁嘴鸡

喋喋不休，吟吟沉沉，叫做拜神唔见鸡

死不认错叫撑死鸡

有一种霸道叫霸王鸡

有一种狼狈叫落汤鸡

有一种得意叫老老鸡鸡

有一种怕冷叫寒鸡

有一种伪装叫诈盲食鸡

有一种姑寒叫铁公鸡

便宜莫贪是指路边鸡

广东鸡喺自细见到大，情深义厚。以上区区几只，觉得唔够喉，补漏如下：

先数数鸡尾嘅

有种靓样叫掹（第1声）鸡{正字喺眳痏，就喺眼尾眉间嘅疤痕，通常与豆皮婆配，童谣曰：掹鸡豆皮都唔怕，最怕魂精（太阳穴）有笪瘌（疤）}。

有种射击动作叫摱鸡(或勾鸡)

有种形象叫大种鸡

有种眼形叫斗鸡

有种勤快叫三更灯火五更鸡(颜真卿：三更灯火五更鸡,正是男儿发愤时。黑发不知勤学早,白首方悔读书迟。)。

有种游戏叫斗草鸡

搵人陪叫戥鸡

唔使嘥力叫劏死鸡

被抓奸在床叫黄脚鸡

香烧完了剩下的一截叫香鸡

斯大林的八字胡须叫二撇鸡

打麻将自摸食糊叫自摸鸡

有种人讲话口吃叫趷鸡

势头不好偷偷走路亦叫趷鸡，又叫掹（第3声，抽嘅意思）鸡

有种拉琴水平叫锯鸡

弊家伙衰嗮叫死晒笼鸡。

唔一定喺鸡尾，鸡头都好多：

有种文字叫鸡肠

有种妓女窝叫鸡窦

所以话做鸡唔使本

有种走得快叫做鸡咁脚，走甩鸡，

个腰包细冇乜馅叫鸡肫

少得可怜谓之鸡膆(膆囊)咁多

心知肚明叫做鸡食放光虫

死都唔认账叫做死鸡撑饭盖(又叫死鸡撑硬脚)

笨手笨脚叫做鸡手鸭脚

无法沟通叫做鸡同鸭讲

遇到个长气袋就会鸡啄唔断

有种惨状叫鸡毛鸭血

有种记谱方法叫香鸡厾豆豉

有人偷鸡唔到蚀揸米

目不转睛系鸡咁眼

成日唔喺屋企就叫冇厣鸡笼

嗌（骂）通街嘅悍妇喺霸巷鸡乸

大企业不接小生意叫做大鸡唔食细米

软弱无力就系手无抓鸡之力

吃人嘅嘴软叫做鸡肶打人牙臼软

有啲事喺遮都遮唔住嘅，鸡膥（鸡蛋）咁密都哺（孵）出仔

从来无做好事嘅人假正经，叫做一时唔偷鸡就做乡正（一说长）

无文化你就鸡乸咁大个字都唔识一箩

外表好睇里面空就系花被冚（盖）鸡笼

熟视无睹叫发鸡盲

捉人痛脚叫执鸡脚

有种反应叫起鸡皮

有种发育叫鸡胸

有种儿时游戏叫麻糖鸡nen黏住你只手

 注1：「鋹雞」一詞現在一般是形容那些牙尖嘴利、潑辣的女性﹐但" 鋹雞"一詞的起源和女子並無直接關係。 

　　據說這詞語源自五代十國時南漢國君劉鋹的故事，劉鋹昏懦，生活荒淫無恥，揮霍無度，刑法殘酷，賦役繁重。平日不理國事，只愛鬥雞，他對雞極寵愛去到瘋狂地步，甚至把雞封為侯爵。雞封了侯，當然就如人一樣要威風，有人想到帶雞出巡，每次，鬥雞由那些雞農捧住出巡，么么喝喝好不威風。而路上的人必須迴避讓路給雞農走過，為了躲避以免被定罪，人們會大聲叫"鋹雞來啦!" 意思是劉鋹的雞來啦!讓大家要快點走。 「鋹雞」一詞就流傳下來，初時是用來形容霸道的行為，後來大約因「雞」字常用於形容女性，漸漸地「鋹雞」就變成形容潑辣霸道牙尖嘴利的女人的專用詞了。

　　非粤语亦有嘅鸡成语就唔罗列了。

　　写完，收鸡。