◆正月正
正月正，請子婿入大廳。

二月二，宰豬公謝土地。

三月三，桃仔李仔稱頭擔。

四月四，桃仔來李仔去。

五月五，龍船鼓水裡渡。

六月六，踏水車拍碌碡。

七月七，龍眼烏石榴必。

八月八，牽豆藤挽豆莢。

九月九，風吃滿天哮。

十月十，冬瓜糖霜落錢盒。

十一月，人焚火。

十二月，火炊粿。

 

◆補衫歌

身軀穿，身軀縫，誰人賴我做賊嘴生蟲；

身軀穿，身軀補，誰人賴我做賊嘴艱苦。

◆黑貓黑狗

黑貓穿裙無穿褲，黑狗穿褲激拖土，

欲甲黑貓去散步，腳骨那酸坐草埔，

黑貓愛嫁黑狗尪，欲掠白貓做媒人，

是欲是不訂來送，那無黑貓嫁別人。

 

◆肉丸湯

搖阿搖，豬腳雙平搖，

大麵雙碗燒，肉丸湯參胡椒。

 

◆燒肉包

燒肉包，走去恁兜，

碗仔粿，走去恁後尾。

 

 

◆油炸粿

由炸粿，燒加脆，土豆仁，剝歸把，

媽祖宮，點電火，市場內，賣芋粿。

 

◆自動車

自動車坐阿舍，五分仔車拖甘蔗，

癩痾貓掛目鏡，伊老父做保正，

煙吹頭，摃岉痛。

 

◆電視機

電視機真趣味，有卡通，有歌仔戲，

囝仔看甲笑咪咪，婆阿看甲目屎滴。

 

◆秀才

秀才秀才騎馬浪浪來，

在馬頂，拔落來，跋一下，真厲害，

嘴齒痛，糊下頦，目賙痛，糊目眉，

腹肚痛，糊肚臍。

◆十二生肖

一鼠賊仔名，二牛駛犁兄，

三虎爬山崎，四兔遊東京，

五龍黃帝命，六蛇受人驚，

七馬跑兵營，八羊食草嶺，

九猴爬樹頭，十雞啼三聲。

 

◆一歲到十歲

一歲二歲手裡抱，

三歲四歲土腳挫，

五歲六歲漸漸大，

七歲八歲入書房，

九歲十歲知輕重。

 

◆搖呀搖

搖呀搖，湊挽茄，

挽偌多，挽一飯篱，

也有當食，也有當賣，

也有當給阮嬰仔做度晬，

嬰仔哭，阿母無閒當上灶，

嬰仔驚，阿母緊拍尻脊骿，

嬰仔哮哇哇，阿母嘴內就唸歌，

嬰仔哭不恬，阿母直直唸，

唸講欲去阿媽兜，

嫷衫給你穿，嫷帽仔給你戴，

明兒哉，挈你去看戲，

嬰仔無愛哭，阿公講乖巧，

胸前給你結紅包，嬰仔笑咪咪，

阿媽提金含，嬰仔就甜甜甜，

嬰你睏坦坦，阿妗給你掛八仙，

嬰仔嘴靦紅絳絳，阿舅給你結銜鈴，

嬰仔一下怳，阿姨給嬰仔戴烏鼎，

嬰仔吃吃笑，阿母沿路行，沿路搖，

乖乖睏，一暝大一寸，

乖乖惜，一暝大一尺。

◆初一早

初一早，初二早，初三睏到飽，

初四接神，初五隔開，初六舀肥，

初七七元，初八完全，初九天公生，

初十有食席，十一請子婿，

十二請諸婦子返來食泔糜配芥菜，

十三關老爺生，十四月光，

十五是上元暝。

 

◆一二三

一二三，拿賓擔，

四五六，打六答，

七八九，黑貓娶黑狗，娶得溜溜走。

 

◆做人媳婦

雞公早早啼，做人媳婦早早起，

入大廳擦桌椅，入灶腳洗碗筷，

入房間做金指，哦老兄哦老弟，

哦老家親母賢教示。

 

◆小學生

一年的空空，二年的孫悟空，

三年的吐劍光，四年的敖膨風，

五年的上帝公，六年的閻羅王。

 

◆台灣點心

大頭仔大頭仔生後生，

唱歌欲唱多累咪，

多累咪多累咪，大頭仔賣肉羹，

肉羹結歸丸，大頭仔講伊欲賣肉丸，

肉丸歹食無人買，大頭仔賣碗粿，

碗粿冷枝枝，大頭仔氣著賣花枝，

花枝真臭腥，大頭仔換來賣米糕，

米糕燒滾滾，大頭仔講伊欲賣米粉，

米粉爛爛真小碗，

大頭仔不知欲按怎。