转：

《巾幗梟雄》近日成為城中熱話，飾演劇中智勇雙全的「四奶奶」，鄧萃雯的演技已達爐火純青，令人讚歎不已；雯女更在此向讀者預先透露大結局。

《巾幗梟雄》四奶奶對於劇中飾演柴九的黎耀祥，雯女大讚對方是位好對手，所以更加迫使自己要認真去演，結果，兩人獲得外界一致好評

雯女在《金枝慾孽》中飾演的如妃，已教觀眾拍爛手掌；今次演四奶奶，雯女表示希望盡力將角色演得更有立體感

繼「Laughing哥」後，收視與口碑同樣厲害的《巾幗梟雄》接棒成為全城熱話，兩大戲骨「柴九」與「四奶奶」在劇中大鬥演技，吸引超過240萬觀眾收睇，電視撈飯年代再度回歸。鄧萃雯是公認好戲的無綫花旦，由《金枝慾孽》內心狠辣的如妃娘娘到《巾幗梟雄》內智勇雙全的四奶奶，其爐火純青的演技的確令人心悅誠服。對於四奶奶與柴九的結局，她以悲傷但無憾來終結，相信本周結局篇，劇集收視將會再創高峰。

    鄧萃雯演繹精明女強人一向駕輕就熟，今回加上同樣好戲的黎耀祥助陣，以及一眾出色的演技派落力勾心鬥角，《巾幗梟雄》獲得觀眾支持收視高收，實屬理所當然。
「其實睇到劇本嗰陣已知套劇係好嘢，加上由一直好希望合作嘅李添勝監製，仲有我心目中好想合作嘅演員黎耀祥，未拍已好開心，而家反應好，更加係Bonus。我一直好欣賞添哥，《巾幗梟雄》係佢同編審嘔心瀝血咁諗出嚟，套劇唔只係娛樂大家，仲有好多嘢想講，你哋睇到好多天災人禍，全部都有歷史根據。最重要係，我係一個每事問，有咩諗唔通都會即刻去問添哥，佢令到我同一班演員都演得好放心，所以拍嘅時候，大家都好有火花。」

入廠睇祥仔Solo
鄧萃雯跟黎耀祥同在圈中浸淫了25年，兩位演技派合作，自然火花處處好戲連場，加上兩人竟然一直嚟無緣合作，四奶奶與柴九首次合作的爆發力，相信觀眾已深深感受到，加上老謀深算的大奶奶謝雪心，以及令人刮目相看的吳卓羲，鄧萃雯自言有幸跟眾人合作。
「之前一直覺得佢好戲，做咩都得，咁就已經好值得合作。我哋開工前無話研究角色，大家都好輕鬆，但一埋位我哋都係真情咁去做，我覺得好正，因為全部係真情交流，真係好難得。祥仔呢啲對手，誇張啲講，每日入廠睇佢點Solo已經抵晒，我見佢做得好，真係忍唔住想拍手掌o架。好彩遇到一個好對手，自己都唔可以鬆懈，自己都要做得好，唔係就好可惜。至於一樣未合作過嘅心姐，亦令我好佩服，佢記對白好勁，就算好長嘅對白佢都可以一字不漏兼好有力咁演繹出嚟，嗰種Power真係好厲害。至於吳卓羲，我同佢喺劇中合作仲多過祥仔，其實佢幾乖仔o架，好肯聽人意見，角色亦好啱佢做。」

鄧萃雯談四奶奶

從《金枝慾孽》中霸氣十足的如妃，到《女人唔易做》、《師奶兵團》中的現代新女性，鄧萃雯幾乎成了女強人專有名詞。但今次四奶奶一角，除了依舊膽識過人有勇有謀外，還要演繹跟柴九的知己情緣，對於恍如無缺點的四奶奶，鄧萃雯坦言拍攝前非常擔心。

「一收到劇本其實好擔心，我唔相信呢個世界有咁完美嘅人，所有嘢都係為人嚟o架，開頭諗唔通，但最後我信任劇本，跟足劇本去做，而家睇番又覺得無乜問題，呢個就係劇本嘅功力。呢個年代好難會有咁嘅人，生死與共喎，我哋邊個要經歷呢樣嘢，除非大家一齊遇到海嘯啦。我同柴九喺劇中嘅關係好微妙，四奶奶可以拼咗條命去保護佢，兩人嘅關係完全係超越愛情，所以同柴九嘅結果都幾淒美，因為好悲傷但無憾囉，人生有幾何可以做到自己想做嘅嘢？」
如妃娘娘與四奶奶

 04年《金枝慾孽》內如妃一角將鄧萃雯的事業推上高峯，雖然當年未能憑此拿得女主角獎項，但已贏得觀眾對其演技的肯定。究竟如妃與四奶奶誰是鄧萃雯的最愛？就由她去說吧。
「論演繹方法，如妃演得吃力好多，因為佢奸之餘性格亦好複雜，但四奶奶無咁立體，佢係一個大好人，一個女英雄，所以拍之前就不斷諗，點樣可以賦予四奶奶更多嘢。當時無諗過如妃咁奸都咁多人鍾意，好意料之外，但講到鍾意邊個多啲，我鍾意四奶奶多啲o架啦，因為始終佢係正面人物，起到正面作用，增加正能量。」