蘿蔔又香又甜又百搭。

隨便和腩肉加在一齊燜煮，同樣地滋味無限。

響街市見到一舊好靚嘅五花腩，忍唔住買佐一舊，原本打算整回鍋肉，點知買佐肉，行勻成個街市，凈係一檔有大蒜苗賣，總要係又黃又乾，實在無胃口買。

唯有改變主意，唔整回鍋肉。

屋企有凈半邊蘿蔔，索性同蘿蔔煮埋一煲。

得一舊仔肉，唔係太多，所以切薄片，睇落多少少。

天涼食餸煲仔上，暖笠笠又方便，煮又係佢上檯又係佢。

做法好簡單：

1、腩片係煲仔度，慢火炒至轉色。我無落油，因為腩肉有肥膏，自己會逼佐啲油出嚟。

2、炒到有少少油出嚟嘅時候，落幾片薑同一粒蒜，繼續炒出香味。

3、炒至轉色嘅腩肉，落少少蠔油同生抽，一粒仔冰糖較味，落少少水，開細火燜煮二十分鐘。

（唔揭蓋焗多十幾分鐘，咁樣腩肉就淋到入口嘅融喇，瓦煲仔就有咁嘅能力，可以好快將食物煲淋）

燜到最後，肉汁會收到結稠，其實依個時候燜淋佐嘅腩肉已經好香，不過凈肉好流，所以，都係要加返啲配菜中和個油膩感。

4、落蘿蔔粒入去，無需再落水，因為蘿蔔自己會走好多水出嚟，開火焗多十分鐘，唔揭蓋多幾分鐘，蘿蔔同腩肉，就完全融合埋一齊。

食之前落少少青蔥入去增添香味，搞掂~~~~


味道，無容置疑~~~~

無論蘿蔔或腩肉，均已入口即融，味道更是無分彼此，你中有我我中有你，纏纏綿綿，無限綺靡~~

一次無需整得太多，一煲仔，一餐搞掂無負擔~~~

強哥近來有心學習入廚，放手俾佢炒碟菜。

炒碟小棠菜，鹽落得恰好，唔會太咸，炒得火候亦可，下次炒菜，可以有個人幫下手，幾好~~~

開得飯~~