基本上隔日就会同阿妈讲次电话，偶尔一次係电话中同阿妈呻过话想食粽，又懒得自己包，点知过得两日，阿妈即刻拎住十几隻粽嚟我度~~~

知道我锺意食新鲜整出嚟嘅粽，所以提早一晚预备好材料，第二日一早起身即刻包好煮好，晏昼之前就送到过嚟俾我，送到过嚟，一摸上手，总係和暖架，依种有阿妈锡嘅感觉，真係好幸福好幸福。。。。。

近年阿妈身子弱佐好多，不过都成七十岁人啦，身体机能退化係预料中嘅事，我都唔想阿妈咁辛苦，但係老人家，如果你乜都唔俾佢做，反而会令到佢觉得自己係咪真係无哂用，心理上嘅老态，比起容颜上嘅苍老，更加容易加速身体机能嘅退化速度。

阿妈个样好后生，试过有几次座东铁时俾东铁职员叫停查证件，以为佢未够年纪又用佐长者优惠八达通添，一睇证件，都唔信阿妈原来真係七十岁嘅人，次次阿妈都好开心咁同我讲返，可见女人无论去到几多岁，对个样，都係会介意~~~

我觉得心境对于容貌真係有好大影响，阿妈直到依家都好注重护肤品同好锺意扮靓，买衫总多过我添。。。。。

所以早排我同阿妈讲，叫佢做多啲运动，如果佢身体好返好多，身体情况允许下，我会陪佢返印尼探下几个姨妈同阿姨（阿妈一共有12个兄弟姐妹，劲）。

有佐依个目标之后，近排阿妈开始肯食医师俾嘅调理身子嘅药物，同积极佐做下运动，积极嘅心情绝对会对身体机能有正面嘅影响，希望阿妈身体会越来越好，我成日同阿妈话，七十岁未算老，只要身体允许，我都会陪阿妈周围去行下睇下。。。。

~~~~~~~~~~~~~~~~~~~~~~~~~~~~~~~~~~~~~

因为唔知阿妈会突然嚟，所以买有晚餐嘅餸，咁阿妈嚟到，我晚餐会同阿妈出街食，咁晏昼，就将晚餐要煮嘅餸煮埋佢，反正强哥都要返嚟食饭，三个人，煮两味餸，好简单姐~~~

我买有菠萝同排骨，咁就煮一味菠萝焖排骨啦，又快又开胃。。。。

做法好简单

1,先爆香几片姜。

 2,将排骨倒入镬，翻炒至表面变色少少熟。

3,落酒糖豉油胡椒粉水，焖煮十五分锺左右。

4,留返有少少汁係度嘅時候，將新鮮菠蘿倒入去，再炒多一二分鍾左右，等肉汁都有菠蘿嘅香味，然後埋個芡，開大火等佢收汁,搞掂裝碟~~~

阿妈话，比佢整得总好味添啊。。。。

超开心。。。。。

我买佐成两个菠萝，切好一旧旧分几个细袋装好摆入雪柜雪住佢，咁几时想食嘅时候，就解冻一包仔，爱嚟炒肉片或者牛肉或者鸭或者同鱼焖，都一流。。。

另外，用XO醬炒佐一個豆苗。。。。

阿媽話“乖啦，要記得經常食深綠色嘅菜啊。。。。。”

加埋一碟仔酸菜，強哥一返到嚟，嘩一聲“好豐富啊”~~~~