一直同強哥講話要食清淡啲，食少啲肉。

不過原來食少啲肉，買餸可以咁平嘅。

睇下點配搭煮餐飯出嚟。

大豆芽加木耳，隔日肉碎少少，用面豉俾味，落少少麻辣醬，一碟香辣惹味嘅木耳肉碎炒豆芽~~~

因為強哥近排落地盤較多，接觸沙塵較多，雖然有帶口罩，都少不免會有食到塵嘅機會。

所以依排要煮多啲豬紅木耳依類可以清血脂，吸塵嘅食材先得。

原本係想滾韭菜大豆芽韭菜湯嘅，不過買唔到靚嘅韭菜，就做罷。

買佐斤油麥菜，用一半，加埋豬紅，用少少薑蓉炒，用沙茶醬俾味，沙茶醬好惹味，有效地減少佐豬紅嘅腥味~~~

豬紅的血漿蛋白經胃酸和消化液分解後，能產生一種有潤腸作用和解毒作用的物質。果種物質可與粘附於胃腸壁的粉塵、有害金屬微粒等發生化學反應，從而令到依啲有毒有害物排出體外。

最適宜強哥食㗎啦，所以要諗多啲豬紅嘅食譜先得。

要留意，豬紅不宜與黃豆同食，否則會引起消化不良；忌與海帶同食，會導致便秘。

平平哋幾蚊雞，就煮佐兩個餸出嚟。

唔計煤油電費，芽菜三蚊豬紅二蚊油麥菜二個半，肉碎少少唔識計,當一蚊啦，合計都係用佐：$8.5蚊

咁就一餐飯嘅餸啦.

而且味道,真係絕對唔差㗎~~

睇電視人啲食腐竹糖水,強哥又話想食,所以買芽菜嘅時候,順便買埋包扁竹返嚟.買扁竹我鐘意係豆腐檔買,流動較快,咁就可以保持佢嘅新鮮,新鮮嘅扁竹先至夠清香同埋易煮.

講下我好節省煤氣嘅依個腐竹糖水嘅煮法

煮法：

1，凍水落腐竹同意米。

2，開中火，煮十分鐘，已經可以見到腐竹變腍身同發大。

3，熄細細火，煮多十分鐘，依個時候，已經係煮佐二十分鐘，睇到啲腐竹已經變到好細好細一塊，水亦都開始變白色。

所以煮佐二十分鐘，腐竹變細細塊之後，熄火，就咁焗住佢十五至二十分鐘。

4，再開返火，開住個蓋，開大火煮多五至十分鐘。

腐竹完全溶於水中~~~

然後可以落冰糖,較個甜度,咁依煲腐竹糖水,就搞掂啦~~

係可以聞到好香好香嘅腐竹味`~~

全程都唔洗半個鐘就搞掂~~~

（不過我試過一啲唔夠新鮮嘅扁竹，真係好難先至煮得融佢，同埋個味道真係無咁清香，所以買煮糖水嘅扁竹，最好去較多人買嘅地方購買，咁賣得快，自然入貨都快，咁就保持到腐竹嘅新鮮，所以我多數會去街市賣豆腐嘅地方，多數都會有賣埋煲糖水嘅腐竹度買）

烚多三隻蛋~~當三蚊計~~

買包扁竹八蚊雞，用佐三分一，當二個半銀紙啦。

少少意米，當一蚊。

無白果。

咁大大一煲嘅糖水，所需費用都係$6.5蚊.

尋晚果餐飯,加埋飯後糖水,合計都係$15蚊咋~~~

兩餸一糖水,算係咁啦~~~