年尾大清潔，最開心嘅事係可以心安理得嘅「買嘢」同「掉嘢」

自細受阿媽影響，對已有相同嘅代替品，同產品在可見的一年之中，使用嘅頻率唔會超過二次嘅，都唔應該再繼續留住係屋企阻地方，阿媽最鐘意係將屋企多餘嘅無用嘅事物，送人嘅送人，掉嘅掉，好少會話要留住係度擺。

依點係好好嘅習慣，無論係物件或者情緒，都好應該學識如何「放棄」，所以日常中我基本係一個開心嘅人，因為唔開心嘅嘢通常我都會選擇「遺忘」，同樣地，屋企無用嘅嘢，都不例外地選擇「遺棄」。

~~~~~~~~~

舊年買佐一部26L大容量嘅焗爐，有熱風對流，旋轉烤架，不過體形較大，火力大，比較耗電，我只會用嚟焗蛋糕或者烤雞一類用，所以一路都係用個細細擺得係廚房嘅光波爐解決日常早餐焗熱返面包或者煮食較少量嘅肉食，不過光波爐只得上火加熱，用起上嚟硬係覺得無咁就手，而且我買嘅時間較早期，當時個頂頭只係簡單地用一個鐵圈隔住發熱管，用佐三年幾，已經開始生銹，一焗嘢有時會跌鐵銹出嚟，都係時候將佢。。。。。

如下圖~~

光波爐嘅大玻璃碗，強哥俾意見「洗乾淨做魚缸」~~

係喎，順便講下，垃圾筒嘅蓋，我會套住一個大膠袋，污糟佐可以再換轉一個新膠袋，咁就可以保持個蓋里外都時時清潔啦。因為我見過有啲朋友屋企，個垃圾筒嘅蓋，又唔會成日清潔，睇落好污糟，唔衛生，咁包住個膠袋，又成日可以轉換顏色鮮艷俾啲色彩個廚房，又易清潔，一舉多得，何樂不為~~~

前晚同老公落樓下買包米，隨便地，順便地行行下商場，發現一款焗爐做緊特價，而且所有功能都好符合我心目中嘅要求「佢細，容量得15L，唔阻地方，可以擺係廚房/功率係1000W，耗電小，夠慳電/雖然細，但功能好齊全，都有得火力調節，上下火選擇，60分鐘時間製」

因為好多細焗爐係無溫度調節，或者選擇上下發熱管工作，又最多得15分鐘時間控制，唔係好足夠我平日煮嘢食嘅要求，買嘢無話最貴就一定最好，最緊要，係適合自己嘅需求。

而依個咧，所有因素都符合，而且做緊特價，都係$218咋，即刻搬佐一部返屋企。

有興趣嘅朋友可去千色店望下，依家係千色店做緊特價~~

新買嘅細細焗爐仔~~~

新買嘅焗爐仔通常出廠嘅時候，係發熱管嘅地方會擦一層防銹油，所以買返嚟，最好先用廚房紙抹乾淨個發熱管，通常開火之後一加熱啲油脂都會揮發，不過都係會有臭味，所以我會擺啲橙皮入去，開住個門加熱，咁個焗爐就會香好多㗎啦。。。。

尋晚食魚，條斑較大，有斤幾重，咁就心思思，一魚整兩味。

片佐一邊嘅肉出嚟，有頭果邊蒸，啖啖肉果邊焗。

之前一日整菠蘿醬我留返少少菠蘿肉，本嚟係想用嚟炒牛肉，不過臨時改變食魚，咁即興地想個辦法，將魚同菠蘿結合埋一起。

之前整佐甜嘅菠蘿醬，咁配搭魚食，當然要整咸嘅菠蘿醬。

係度諗諗下，就諗到一個咸菠蘿醬嘅整法出嚟。

完全係憑空想像，唔試下點知得唔得咧`~~~

咸菠蘿醬做法：

1，爆香少少蒜蓉

2，加入一大匙面豉醬，落少少豉油，紹酒，糖，煮開個醬汁。

3，熄火後倒入菠蘿肉同薑絲，撈勻醃半個鐘或以上。

（煮之前已想像得到菠蘿加埋面豉一定好香，加薑同酒係為佢避去魚嘅腥味，菠蘿同薑都不宜即刻煮熟，想食到佢啲嘅鮮味，所以我會熄火後再倒入去醬汁度，醃半個小時以上等個菠蘿可以慢慢縮佐面豉嘅味道）

事實證明，依個醬汁，有佐面豉嘅濃鬱醬味，加埋菠蘿甜甜酸酸嘅清香，真係好惹味好開胃，比起傳統用蕃茄取其酸味，更加精彩~~~~

我諗以後我會再整過依個醬汁，愛嚟燜雞都一定好好味。

或者炒肉片~~~

4，將醃好嘅醬汁舖係肉面。

5，包好錫紙，可保持水份，入焗爐，上下火200度焗10分鐘。

（因為我個焗爐瓦數較細，所以開嘅溫度較高，如果屋企焗爐瓦數較大，需調低溫度或減少加熱時間）

非常惹味非常之精彩~~~~

一流~~~

炒碟仔生菜~~~

另外半邊，薑蔥蒸佐7分鐘~~~好彩家下電磁爐都有定時功能，可以好好咁控制時間~~~

鮮美嬾滑，自不在話下~~~~