女性對理財知識的需要較男性更大，因為在家靠父、出嫁從夫、老來從子的日子已一去不返。
－－2007年10月2日, 國慶港人愛國企
 
投資亦一樣有時贏、有時輸、有時略有損失，但不能全軍盡墨。三十歲前要博，六十歲後要穩。年輕時資金少、智慧唔多，只有勇氣多，因此要博；年紀大左、資金多左、智慧多左，反而勇氣少左，因此要穩，因為已經輸唔起。
－－2007年10月3日, 極度超買再超買
 
可以改變你一生命運的係二線股（明日的藍籌股），唔係今天的藍籌股，策略係「狠、忍、準」，一旦睇得準，便要忍，一如鯊魚（死咬住唔放）般狠！
－－2007年10月5日, 敲敲冷馬又如何
 
千變萬變最後離不開真實，就係P/E八到十二倍係偏低、十二倍到十八倍合理、十八倍到二十二倍偏高，一旦超過二十二倍，便必須企業純利保持高增長（例如連續幾年每年純利上升30％或以上），而上述情況通常唔能夠維持超過三年，亦係泡沫由形成到爆破好少超過三年的理由。
－－2007年10月8日, 龍捲風吹起大笨象
 
投資二線股策略係Double或虧損15％離場，但唔好感情用事。勝敗乃兵家常事，千萬不可有輸唔起心態。
－－2007年10月12日, 港股成吸金機器
 
人人皆知擲銀幣最後結果一定係50％公、50％字。非理性投資者可以不斷擲銀仔，加上嚴守止蝕唔止賺，令贏面提升至75％；反之，理性投資者因擔心輸而唔擲，最後忍唔住手才擲，輸的機會同樣係50％。
－－2007年10月15日, 太理性坐失良機
 
我老曹一早已發現財富獲得唔係來自辛勤工作，而係來自聰明投資策略。
－－2007年10月20日, A股基民搶購QDII基金
 
賺大錢需要的環境，就係股價在合理價（normal range）之外上下擺動，情況有如河流在暴雨之後暴漲一樣澎湃，但堤壩面臨河水暴漲帶來威脅，一旦崩堤便成災。
－－2007年10月23日, 賺咗指數唔賺錢
 
太早睇淡或太早睇好都係死罪，Timing is everything。
－－2007年10月25日, 有機會重返50天線
 
今天股票市場再唔係行人路（讓各位漫步），而係競技場—鬥智兼鬥眼光的地方。
－－2007年10月31日, 08大勢— 科技股
 
我老曹1968年年底入行至今快三十九年矣，請問股市幾時有「理性」過？股價從來唔係偏高就係偏低，往往在Boom & Bust之間來回擺動。
－－2007年11月1日, 好，仲有更好！
 
成功與失敗、賺錢與虧損往往只係一線之差，一切由小小一個洞察力（insight）開始，就係過去三十年我老曹一再強調要洞燭先機，而唔係勤力過人。
－－2007年11月2日, 美國出現三低三高
 
投資就係找尋明天的大贏家；我老曹近十年早已採用呢個投資策略，即Asset and Sector Allocation Model。利用資產分配及行業盛衰去制定自己投資大方向。
－－2007年11月3日, 科學化投資策略
 
市場往往由一個極端走向另一極端，並冇合理價。
－－2007年11月7日, 美國好快第三次減息
 
我地已唔需要大牛市去賺錢，而係努力去射中牛眼，追求100％回報（或跌15％離場）。
－－2007年11月8日, 努力射中牛眼
 
唔係所有投資都會增長，割掉虧損幾時都要做，情況有如農夫需要清除田裏雜草，讓禾稻長得更好道理一樣。
－－2007年11月10日, 港股一D都唔貴
 
每一個投資者都希望坐股市尾班車走（賺盡每一分錢）。可惜當尾班車開走時，經常仲有大批人留在月台上，未有及時上車。
－－2007年11月17日, 內房股一舉三得
 
當富豪們花一億幾千萬元購入所謂現代藝術品之時，通常亦係股票市場見頂日子。
－－2007年11月20日, 明年可能見負利率
 
尋底係高危動作，除非你有四叔咁雄厚資本就例外。
－－2007年11月24日, 抽新股遊戲風險提升
 
每一個Deep V都係膽小者出貨、膽大者撈底的日子。到底你係「膽小鬼」抑或「深溝」受惠者？
－－2007年11月30日, 關刀砍樹枝形成深溝
 
愈想賺錢的人愈冇錢賺（財不入急門）。做股票要耐得住寂寞，唔跟風，自己做功課，完成功課後等候安全價才出擊，堅守止蝕唔止賺原則。
－－2007年12月3日, 快快快火燭車到埗
 
作為投資者應在泡沫產生期加入，成長期持有，脹大期獲利回吐，然後加入另一泡沫產生期。
－－2007年12月4日, 大行嗌Sell啼笑皆非
 
唔好睇少二線股壯大速度:滴水可成洋、聚沙可成塔。今天藍籌股都由過去二線股開始。
－－2007年12月6日, 次按明年第二季解決
 
我老曹經歷咁多，能夠學到的，就係無論發生乜事，保持頭腦冷靜最重要，其次係sustain power。
－－2007年12月8日, 問題未解決 輕傷變淌血
 
追隨趨勢，找尋突破，揀股唔炒市。追求100％回報一年並非唔可能，當然亦唔係容易。
－－2007年12月11日, 牛眼投資法改變一生
 
追隨趨勢，尋找純利進入高增長期的股份，才係最佳投資策略。股市內的悲劇係大部分投資者皆忽略趨勢，只睇走勢，往往賺粒糖、輸間廠。
－－2007年12月20日, 人多嘅地方唔好去
 
股市無先知，你唔係，我唔係；但卻有成功策略，例如買乜？何時買？何處買？
－－2007年12月22日, 男士女士齊流鼻血
 
熊市唔係一天內出現而係逐漸浮現，資金由弱項流向強項，最後連最強項目亦回落，人們才驚叫熊來了。
－－2007年12月29日, 港股今年升37％
 
投資就係將你的資本去冒險，你可能因此而有所損失，但千萬不可全軍盡墨，永遠記住保本較增值更重要。
－－2008年1月7日, 覆巢之下無完卵
 
股票市場係20╱80遊戲，即20％投資者贏80％投資者錢的地方，如果你唔係20％勝利者，就係80％失敗者。
－－2008年1月17日, 2 5 0天線支持區
 
點解仲有咁多人醉心於估頂、估底遊戲？真正理由係想證明自己幾醒，但股市專收醒目仔。
－－2008年1月26日, 最大反彈可見27000點
 
每一個投資者入市前，必須先評估自己承受風險能力，一如參加選美女士必事先知道要穿泳衣觀眾前走來走去，被人評頭品足，如果捱唔住千祈咪參加。
－－2008年1月30日, 再減息後情況更壞
 
先買後賣同先賣後買有乜分別？目標一樣係賺錢，點解先買後賣係股神、先賣後買係衰人？
－－2008年2月1日, 累股票據累死你
 
市場一向無大小（冇大戶與小戶）之分，只有醒目資金同愚蠢資金之分。
－－2008年2月4日, 鼠年要在波動市搵食
 
食有時，睡有時；投資有時，不投資亦有時。每年一定有一個購買點及一個沽售點。今時今日只有耐心等候購買點出現，不然只是盲動。
－－2008年2月22日, 耐心等候購買點
 
群眾在轉角市出現前通常犯錯。
－－2008年3月6日, 美國政府無賴！
 
小心狂升之後就係暴跌。所謂「彈散彈散」，唔反彈又點可以散？
－－2008年3月28日, A股踏入熊市
 
別人恐慌時你貪心，別人貪心時你恐慌，唔做好友、唔做淡友，只做炒友（Trader）！
－－2008年4月14日, 三先策略
 
股市冇過去，只有將來；炒股票唔係炒過去業績，而係炒前景展望。
－－2008年4月17日, 做對沖基金經理好過做皇帝
 
愈接近升市尾聲，投資者投入的資金反而愈多，結果將大部分利潤輸掉。
－－2008年5月13日, 大尾巴作怪
 
散戶最終命運係散晒。
－－2008年2月1日, 累股票據累死你
 
金融市場既無先知亦無專家，只有輸家同贏家。
－－2008年7月1日, A股須解決堰塞湖
 
我地既要學習居安思危，亦應學曉從黑暗中見到光明。
－－2008年7月3日, 學習黑暗中見光明
 
何謂成功？就係以你自己方法，過你自己想過生活，就係成功。
－－2008年7月5日, 心中富貴
 
投資市場係最好的僕人、最嚴厲的老闆。如你做啱，它會獎勵你很多；如你做錯，佢會令你傾家蕩產。
－－2008年7月21日, 阿駝落樓梯
 
信任唔係盲目的，而係需要時間一天一天將佢賺番來。
－－2008年8月2日, 信任須一天一天賺番嚟
 
唔好一見買盤便以為睇好、一見沽盤便以為睇淡。
－－2008年8月19日, 教大家咩叫對沖
 
做人千祈唔可以漫天風雨待黎明，應付災難嘅方法係去避難所或者搵「掩蓋」。
－－2008年9月12日, 2009低潮 2010再開車
 
作為當家最好有點聾、有點啞，但眼睛唔能夠盲。
－－2008年9月13日, 不聾不啞 不配當家
 
只要牢牢記住唔再重犯，我地便可生活愉快。
－－2008年10月7日, 美救市計劃係陷阱
 
小心以為抵買，點知愈買愈低。
－－2008年10月28日, 股市上演「午夜兇鈴」
 
雖然現實令人唔愉快，但投資者必須面對而非逃避。
－－2008年11月8日, 英鎊危機再現
 
當人人相信一套理論之時，呢套理論往往出錯（群眾常常作出錯誤決定）。
－－2008年11月10日, 零利率解決唔到問題
 
請不要work for money, let money works for you！
－－2008年11月19日, 破產容易 搵食艱難
 
忘記過去，展望將來，當人人貪心時恐懼，當人人恐懼時貪心；至於平日則保持平常心
－－2008年12月8日, 一蚊一隻雞
 
人生不計較成敗得失，只計算活得係咪有意義。好多時，活着就是精彩！
－－2009年1月1日, 活着就是精彩
 
大戶唔一定賺錢，散戶唔一定蝕本。勝負由對大勢分析（論勢）、策略運用（論戰）及嚴守紀律（論性）決定。
－－2009年2月9日, 短期上試萬六阻力
 
所謂向上天禱告，其實係加強自己嘅意志力，因為真正決定天堂與地獄者係自己。
－－2009年4月14日, 牛市暫欠條件誕生
 
每次勝利後，以最快時間忘記它；每次失敗後，必檢討自己錯在哪裏，以後唔再犯相同錯誤。記住進取不忘穩健，但穩健唔代表停滯不前。
－－2009年4月27日, 進軍新興市場講Timing