我係王秀琴，係唐仁佳第二個老婆，人人都叫我做細唐太。在唐家住三十幾年，一直以為呢個就係自己家，不可分割，有自己丈夫同自己個仔，但係突然間有一日竟然有人會同我講，上房執埋你行李，搬走啦，我地以後唔再係一家人，以後只可以做普通朋友，罪名係搞散頭家，分裂唐家。然後我問佢証據出唻，佢又係果句呢度唔係法庭，唔需要証據，我對眼就係証據喎！

我對眼就係証據? 咩都佢講晒，佢話你你就，話你錯你就錯，佢話你係人你就人，佢話你係鬼就係鬼，我真係難以想像世間仲有咁人，但係我竟然要對住個咁人三十幾年，以前仲可以做人，但係突然間佢一句說話，我就由人變鬼。

唔知你地有冇過呢經歷，突然間冇個屋企，冇晒所有親人，我諗唔係有好多人會試過，我就有啦。

其實當時我已經崩潰，冇辦法啦，果個女人強權之下，我可以點，但係我仲度等緊唐仁佳一句話，三十幾年夫妻換唻係咩野呢，就係唐仁佳講以後冇野唔好再唻呢度。

突然間搬出唻，日日對空屋，連個仔都冇埋，咩都冇晒……

突然間咩都冇晒，果種委屈真係講不出聲，係講唔出野，所以我個BLOG就用呢四個字，講不出聲，一隻含住冤氣俾人害死鬼又點會講得出聲呢。

但係個我天仲係幫我，我走之後，個女人就入醫院，病到五顏綠色。人話我奸，話我霸道，其實最霸道就係凌巧呢個女人，佢死到臨頭仲係道霸住自己個老公，仲要趕我走，因為佢唔想我坐佢個位。

其實皇太后呢個位佢都坐幾十年啦，佢仲要坐落去，連死呀都要霸住。咩野未登天子位，先置殺人刀，佢根本潛意識呀上就當自己係天子，係皇帝，佢以為佢行開，就係讓個皇帝位出唻俾我坐…天啊…而家呢個世界竟然仲有咁人。

殺人刀，我到底殺佢邊個，佢要咁樣唻對我。

早幾日去到醫院見果個女人，自從我搬走之後，終於再見返佢，人話人就唻死真係有樣睇，佢而家個樣真係成個死樣咁。

病房度，呢個女人把口仍然仲係果句，普通朋友。我諗有日落棺材，都仲會記得佢果日講說話，唔好屈自己屋企，得閒出唻行，唻我地屋企坐，一場朋友，數手指都三十幾年咯，有事咪出聲囉，呢個女人真係好狠。

普通朋友? 同佢老公三十幾年，生埋仔，個仔都咁大，普通朋友要做呢野咩 ?

我有時真係好佩服自己，竟然有咁驚人忍耐力。俾佢響唐家趕出唻，仲要去求番佢，低聲下氣要佢原諒，個仔去做先頭部隊去探口風，有時真係問自己，我為咩野，點解要做到咁賤?

離開醫院番去魚涌條路真係好遠，我專登叫個司機兜去文咸西街走一轉，其實自從離開唐家之後，我都冇返過唻呢度，車一路經過文咸西街，我諗番起同唐仁佳同拍拖果陣成日哼住果首每當變幻時，裡面有幾句，夢如人生試問誰能料，石頭他朝成翡翠，估唔到三十年過去，石頭仍然係石頭。

……但係我話俾自己聽，我一定會成為翡翠，一定會。