吾蛮想老里八早上海宁戈中小市民味道呃，现来弄堂里听不到迭种声音唻，有啥事体拎起电话再刚，连搓麻将约搭子阿要用电话了。有一天阿拉窗门下头有宁喊吾，吾听到了，鲜咯咯呃跑到窗门口，一面伸出头一面答腔刚：“啥宁啊”，一看原来是隔壁头的老阿姐，“啥事体啊”，“幼妹帮帮忙，今朝阿拉麻将搭子少特一额宁，三缺一，叫侬搓麻将”，吾刚“哪能伽艾再跟吾刚，还好今朝吾么事体”，老阿姐一听吾松了口，笑嘻嘻又刚：“三缺一勿来伤阴积奥”，吾拿了皮革子跟了伊就搓麻将去了。

一面搓麻将一面开始嘠三胡了。老阿姐门吾：“侬近腔模忙点啥啦，哪能宁吖看不到”，吾一面理牌一面答：“介热呃天懒得出来，来芥屋里孵空调”，王家阿姨刚：“戈到是呃，动迁几年吖么动忒，电费省交乖了”，老阿姐打牌心急煞了又刚：“快点快点打牌要紧，伐要浪费辰光”，李家阿姨慢吞吞刚：“侬急啥啦，快，快，快，刘翔跑了快伐啦，奥运会伊就跑勿快了，脚蹩忒了”，大家哈哈笑起来了，王家阿姨刚立起来呃十三张牌一笑一抖动，全部倒下来了，老阿姐一看光火了，开始骂三门了：“笑，笑，笑，痴头怪脑，十三张牌像莲花南路十三层楼房一样倒忒了，唉笑的撤，王家阿姨侬今朝输煞根了”，想勿到王家阿姨心态老好呃，用标准呃普通闲话对老阿姐刚：“阿拉不差钱，阿拉输得起，”吾想伊啦结棍呃，小沈阳，刘翔，莲花路房子统统搬出来了，吾就索性哪壶不开提哪壶了，吾问老阿姐：“侬股票现来白相了好伐？”，老阿姐嘿嘿呃笑了起来刚：“股票啊，伊乃鸟啊白相西忒了，吾还白相只鸟啊”吾又厥倒了，太结棍了。乃周立波啊搬出来了。

一呃下半天搓麻将就喜喜哈哈过忒了，压力放忒交关，结帐呃辰光，老阿姐问吾：“幼妹，侬今朝米拉了好伐？”，吾刚：“光听纳刚笑话，又做了一趟斯特劳斯（输脱老输）。”