加载中…
正文 字体大小:

粤讴    (清)招子庸   (二)

(2012-08-30 17:55:42)
标签:

杂谈

粤讴    (清)招子庸   (二)

 

《花易落》

花易落.花又易开.咁好花颜问你看得几回.好花慌久开唔耐.想到花残我都願佢莫开.好极花容终会变改.你睇枝头花落点得再上枝来.大抵种得情根花就可爱.总怕并头花好又要分栽.鲜花咁好又怕遊蜂採.落花无主自见痴呆.记得花前发誓都话同恩爱.点想倚花沉醉有个薄行王魁.点得寻着个个花神拉住佢问句.唉花在镜内.究竟真情还是假爱.到底桃花个种薄命问佢点样子生来.

 

《月难圆》

花易落.月又难圆.花月情深就结下呢段孽冤.花月本系无情总系人地去眷恋.恨只恨佢催人容易老咯重去惹人怜.花若系有情就愁把月见.月你团圆得咁辛苦唎你话怎不心酸.月若系晓得怜香又点肯把花作贱.但得月轮长照住你就系花谢亦见心甜.总系共计十二个月一年.月呀你亦不过圆十二遍.就系四时花信到咯亦不过向一时鲜.总系我地薄命如花难得月你见面.得到我对月开时又怕你缺了半边.虽则月系咁难圆重有圆个一日可算.花谢等到重开重要等隔一岁添.总系人远在天涯就会对住花月自怨.唉心绪乱.眼穿肠欲断.君呀重怕花开长对住你落咯月缺对住你长圆.

 

《蝴蝶梦》

蝴蝶梦.梦绕在花前.蝶呀你为贪採名花故此梦得咁倒颠.我想人世遇着情魔就系清梦都会乱.一吓魂迷心醉就梦到孽海情天.况且相爱又试相连点信痴梦会短.定要追寻香梦向梦里团圆.个阵朝朝暮暮梦作神仙眷.离魂一枕梦当遊仙.睇佢绮梦系咁沉迷就呼唤都不转.重要鸳鸯同梦化作并头莲.势冇话梦幻本属无凭人事会改变.点想一场春梦都是过眼云烟.大抵梦境即是欢场劝你休要眷恋.唉花梦易断.今日梦醒人去远.恨只恨意中人只结一段梦中缘.

 

《想前因》

烦过一阵.想起吓前因.此生何事堕落红尘.我想讬世做到女流原系可悯.况且青楼女子又试断梗无根.好极繁华不过系陪酒个阵.等到客散灯寒又试自己断魂.有客就叫做姑娘无客就下等.一时冷淡把我作贱二分.或者遇着人客有情都重还有的倚凭.鬼怕个的无情醉汉就系攞命灾瘟.大抵个日落到青楼就从个日种恨.唉总系由得我着紧啫.总要捱到泪尽花残就算做过一世人.

《自悔》

实在我都唔过得意.算我薄情亏负呗.你等我掉转呢副心肠共你好过都未迟.人地话好酒饮落半罈正知道吓味.因为从前耳软所以正得咁迷痴.今日河水虽则系咁深都要共你撑到底.唉将近半世.唔共你住埋唔系计.细想你从前个一点心事待我叫我点舍得把你难为.

《义女情男》

乜你恼得咁快.一见我就心烦.相逢有咁耐咯恼过亦有咁多番.共你恼过正好番个情字都带淡.君呀你时常系敢样子恼法我实在见为难.我减颈就得你多又怕把你情性弄惯.索性开喉共你嗌过一变免使你恶得咁交关.或者你过后思量重听我劝谏.呢回重新相好过免俾别人弹.我都系见你共我有的合心.故此唔舍得丢你另拣.就系共你时常恼出面都系挂你在心间.点得心事摆开从君你过眼.个阵相见恨晚.呢回二家唔放手重要做个义女情男.

《唔好热》

唔好咁热.热极会生风.我想天时人事大抵相同.唔信你睇回南日久就有凉风送.共佢好极都要离开暂且放松.我想人世会合都有期唔到你放纵.年年七夕都系一日相逢.人地话相逢一日都唔中用.一日十二个时辰点尽诉得苦衷.我话相逢一日莫话唔中用.年年一日日久就会成功.点得人学得七姐咁情长千载共.真情种.只有生离无死别分外见情浓.

 

《留客》

你如果要去.呢回唔使你开嚟.索性共你分离免得耐耐又试惨凄.人地话我地野花好极唔多矜贵.做乜贪花人仔偏向个的野花迷.我郎好极都系人地夫婿.青楼情重是必怨恨在深闺.不若割断情丝免使郎挂繋.但得我郎唔见面任得我日夜悲啼.相思两地实在难禁抵.久别相逢叫我点舍得你去归.千一个唔系住埋千一个唔到底.唉真正累世.凑着你我都有人拘制.生不得共你同衿死都要共埋.

 

《心把定》

心要把定.切莫思疑.但得意合情投我就一味去痴.烟花到底不是长情地.有日花残就怕会被蝶欺.个的野蝶採花都是无乜气味.咁好鲜花唔採偏向个的野花棲.总系仙花遇着仙蝶就会成知己.死命留心睇佢向边一处飞.有阵深心冷眼重会将人试.假意採吓个的残花试睇佢知道未知.莫话我地仙花种子无根气.睇住你来头我就早早见机.我知道都诈作唔知还去试你.偏向风前摇曳好似冇的埃依.唉须要会意.多受的折磨或者共我消减的晦气.我心都为你死.个的贪花都是在门外企.蝶呀你有心来採我等我开透都唔迟.

 

《奴等你》

打乜主意.重使乜思疑.你唔带得奴奴你便早日话过妹知.我只估话等郎至此落在呢處烟花地.舍得我肯跟人去上岸乜天时.只望共你叙吓悲欢谈吓往事.点想你失意还乡事尽非.一定唆搅有人将我出气.话我好似水性杨花逐浪飞.呢阵讲极冰清你亦唔多在意.万般愁绪只有天知.况且远近尽知奴系等你.今日半途丢手敢就冇的挨依.枉费我往日待你个副心肠今日凭在你处置.漫道你问心难过就系死亦难欺.唔见面讲透苦心死亦唔得眼闭.君呀你有心怜我你便早日开嚟.见面讲透苦心死亦无乜挂意.唉休阻滞.但得早一刻逢君我就算早一刻别离.

《吊秋喜》

听见你话死.实在见思疑.何苦轻生得咁痴.你系为人客死心唔怪得你.死因钱债叫我怎不伤悲.你平日当我系知心亦该同我讲句.做乜交情三两个月都冇句言词.往日个种恩情丢了落水.纵有金银烧尽带不到阴司.可惜飘泊在青楼孤负你一世.烟花场上冇日开眉.你名叫做秋喜.只望等到秋来还有喜意.做乜才过冬至后就被雪霜欺.今日无力春风唔共你争得啖气.落花无主敢就葬在春泥.此后情思有梦你便频须寄.或者尽我呢点穷心慰吓故知.泉路茫茫你双脚又咁细.黄泉无客店问你向乜谁栖.青山白骨唔知凭谁祭.衰杨残月空听个只杜鹃啼.未必有个痴心来共你掷纸.清明空恨个页纸钱飞.罢咯不若当你系义妻来送你入寺.等你孤魂无主仗吓佛力扶持.你便哀恳个位慈云施吓佛偈.等你转过来生誓不做客妻.若系冤债未偿再罚你落花粉地.你便拣过一个多情早早见机.我若共你未断情缘重有相会日子.须紧记.念吓前恩义.讲到销魂两字共你死过都唔迟

《伤春》

鸟啼花落暗伤春.人老对住花残想起就断魂.青春自信都有人怜悯.恐怕脂粉飘零寂寞一生.唔知边一个多情边一个薄幸.总系红颜偏遇个的丧心人.今日蝶去剩朵花开叫我何所倚凭.唉喉带噎哽.想到玉碎香埋阻不住两泪淋.

 

《花心蝶》

花心蝶.捍极佢都唔飞.一定贪图香腻却被花迷.花为有情怜悯蝶使.蝶为风流所以正得咁痴.大抵花蝶相交都系同一样气味.唉情愿死.叫我割爱实在唔轻易.除是蝶死花残个阵正得了期.

《灯蛾》

莫话唔怕火.试睇吓个只烘火灯蛾.飞来飞去总要摸落个盏深窝.深浅本系唔知故此成夜去摸.迷头迷脑好似着了风魔.佢点晓得方寸好似万丈深潭任你飞亦不过.逐浪随波唔知丧尽几多.待等热到痴身情亦知到系错.总系爱飞唔得起问你叫乜谁拖.虽则系死咯任你死尽万千佢重唔肯结果.心头咁猛依旧向往个的猛将张羅.点得你学蝴蝶梦醒个阵花亦唔破.唉飞去任我.就俾你花花世界都奈我唔何.

 

《长发梦》

点得长日发梦.等我日夜共你相逢.万里程途都系一梦通.个的无情云雨把情根种.种落呢段情根莫被佢打松.虽则梦里巫山空把你送.就系梦中同你讲几句亦可以解得吓愁容.君呀你发梦便约定共我一齐方正有用.切莫我梦里去寻君你又不在梦中.君呀你早食早眠把身体保重.心想痛.问你归心何日动.免至我醒来离别独对住灯红.

 

《唔好发梦》

劝你唔好发梦.恐怕梦里相逢.梦后醒来事事都化空.分离两个字岂有心唔痛.君呀你在天涯流落你妹在水面飘蓬.怀人偷抱琵琶弄.多少凄凉尽在指中.舍得你唔系敢样子死心.君呀你又唔累得我咁重.睇我瘦成敢样子重讲乜花容.今日恩情好极都系唔中用.唉愁万种.累得我相思无主血泪啼红.

 

《相思索》

相思索.绑住两头心.温柔乡里困住情人.君呀抑或你唔肯放松.定是奴绑得你紧.迷头迷脑好似昏君.纵有妙手话解得呢个结开亦无路可问.就俾你利刀亦难割得呢段情根.你有本事削性丢开唔挂恨.点想日来丢淡梦里又要追寻.天呀你既系生人做乜把情字做引.但系情长情短未必冇的来因.总系唔错用个点真情就唔使受困.纵使一时困住到底有日开心.真正最会收人都系瘟紧个阵.唉都系敢混.唔怕精乖唔怕你浑屯.总系情关难破就系死亦要追寻.

 

《相思树》

相思树.种在愁城.无枝无叶冷青青.相思本是花为命.每到低头只为卿.总系春寒根蔃生唔定.敢就化作浮萍又往别处生.我劝世间蝴蝶莫去穿花径.唉花冇定性.就系蝶亦终难醒.究竟相思无树春梦亦无凭.

 

《相思结》

相思结.解极都无开.一定冤孽前生结下来.当初慌久唔恩爱.今日恩爱深时反惹祸胎.爱了又憎憎了又爱.爱憎无定我自见心呆.好似大海撑舩撑到半海.两头唔到岸点得埋堆.唉须要忍耐.折磨终有福在.你睇神仙咁安乐未必一吓就到得蓬莱.

《分别泪    凡三》

分别泪.莫洒向离人.离愁未讲已自难禁边一个唔知到行路咁艰难须要谨慎.总系临行个一种说话要先两日向枕畔嘱咐殷勤.若系临时提起就会撩人恨.不若强为欢笑等佢去得安心.自愿去后大大哭过一场或者消吓怨恨.哭到过一点气难番又向梦里寻.梦里见着个个多情就要安慰佢一阵.细把行踪问.首先唔好向佢讲到半句苦楚时文.

分别泪.缴极都唔干.泪呀人有人地牵情使乜你咁着忙.相思满腹唔知凭谁讲.讲极过人知都冇个为我惨伤.顷刻车马就要分开南北二向.点得疏林将就吓为我挂住斜阳.唉心想怆.风笛吹离况.君呀你前途咁辛苦都要谨慎吓行藏.

分别泪.转眼又番场.君呀舍得你学我眼泪咁易回头使乜我咁惨伤.今日别期未了就把归期望.想.想到一自自孤寒叫我怎不断肠.意欲忍泪暂欢同你细讲.亏我泪流不断好似九曲湘江.点得眼泪送君好似河水一样.水送得到个方时我泪亦到得个方.君呀你见水好似见奴心莫异向.须念吓我地枕边流泪到天光.我双双泪尽地落到君前你便为我分吓苦况.就俾你共我分开流泪都系见凄凉.唉心想怆.别后心难放.总系你学我望郎咁心事望我就不会掉转心肠

 

《无情话》

无情话.劝不转君身.眼底天涯万里人.妆台春老重有谁怜悯.客邸无花又算一春.人话路头花柳最惹得人怜恨.君呀你莫寻渔父去问武陵津.虽则过眼烟花无乜要紧.你便安吓本分.乃念双亲长念你都系个一点精神.

 

《无情眼》

无情眼.送不得君车.泪花如雨懒倚门闾.一片真心如似白水.织不尽回文写不尽血书.临行致嘱无多语.君呀.好极京华都要念吓故居.今日水酒一杯和共眼泪.君你拚醉.你便放欢心共我谈笑两句.重要转生来世共你做对比目双鱼.

 

《无情曲》

无情曲.对不住君歌.绿波春水奈愁何.好鸟有心怜悯我.替我声声啼唤舍不得哥哥.今日留春不住未必系王孙错.雁塔题名你便趁早一科.我想再世李仙无乜几个.休要放过.今日孤单谁识你系郑元和.

 

《三生债》

花花世界.问佢点样子生埋.既系生埋在呢一处咯.做乜又总总相乖.大抵红粉与及青衫终会变改.所以情根唔肯向雪泥栽.点估话丝连藕断结下三生债.至此牵缠风月在呢處柳巷花街.虽则你似野鹤我似闲鸥无乜俗态.总系鸳鸯云水两两相捱.我只话淡淡啫共你相交把情付与大海.点想心血一阵阵来潮.叫我点样子放开.到底旧爱与及新欢我都唔会自解.唉真无聊赖.罢咯不若转生来世共你海角天涯.

 

《桄榔树》

桄榔树.我知到你系单心.你生来有个种心事我一见就消魂.你在瘦地长成又无乜倚凭.是真情种故此有咁样情根.我想人世有敢样情根你真正恶揾.树犹如此我只怨句情人.我近日见郎心带不稳.一条心事要共几个人分.舍得佢学你咁样子单心.我就长日无恨.唉真真正正不忿.要把花神问.树呀你唔肯保佑我郎学你敢样心事.我就话你系邪神.

 

《无了赖》

无了赖.是相思.思前想后你话点得心辞.一世怕提离别两字.好似到死春蚕尚吐丝.不愿共你同生情愿共死.免令日后两地参差.古来多少伤心事.天呀你敢妒忌我多情似极有私.你睇红拂女系咁识人娇你略似.今日漂泊应怜我李药师.呢会降格任人呼我做浪子.唉今若此.香国传名字.或者有个知音来听我呢首断肠词.

《对垂杨》

断肠人怕对住垂杨.怕对垂杨个对媚眼一双.见佢愁锁住眉尖同我一样.柳呀做乜你愁唔了又试惹起我愁肠.。可惜咁好深闺唔种.种在你离亭上.见一遍离情就会碎一遍胆肝.恐怕愁多捱不惯呢首相见账.唉须要自想.试睇睇吓阳关上.柳呀做乜初秋颜色你就变了青黄.

《听哀鸿》

断肠人怕听哀鸿.惊散姻缘在梦中.雁呀你系咁孤鸾奴咁寡凤.你哀残月我独对灯红.可惜你一世孤单无侣可共.我地天涯人远重话有信息相通.雁呀我共你同病相怜你便将我书信远送.你莫向江关留恋阻滞行踪.我望雁好比望郎心事更重.愁有万种.雁呀你莫学我情郎身世.只系断梗飘蓬.

 

《生得咁俏》

我生得咁俏.怕冇鲜鱼来上我钓.今朝挈在手.重系咁尾摇摇.呢回钓竿收起都唔要.纵不是鱼水和谐都系命里所招.我想大海茫茫鱼亦不少.休要乱跳.铁网都来了.总系一时唔上我钓啫,我就任你海上逍遥.

《唔系乜靓》

你唔系乜靓啫.做乜一见我就心伤.想必你未出世就整定销魂今世惹我断肠.你系前世种落呢根苗.今世正有花粉孽账.故此我拚死去寻花.正碰着你呢朶异香.红粉见尽万千.唔似得你敢样.相逢过一面.番去至少有十日思量.舍得死咯敢话死去会番生.我又同你死账.难为我真正死咯.嗰阵你话冇乜相干.呢会俾个天上跌个落嚟.我亦唔敢去乱想.真真要见谅.莫话粒声唔出就掉转心肠.

《乜得咁廋》

乜得你咁瘦.实在可人怜.想必你为着多情惹起恨牵.见你弱不胜衣容貌渐变.劝你把风流两个字睇破吓.切勿咁绻缠.相思最会把精神损.你睇痴蝶在花房.梦得咁倒颠.就系恩爱到十分亦唔好咁绻恋.须要打算.莫话只顾风流唔怕命短.问你一身能结得几个人缘.

《心肝》

心肝呀你唔好咁斗(生筋).竟自气到我头瘟.做乜见亲人好样你就份外留神.知你日久生心呢回嫌妹眼紧.见你近来代我都冇往日三分.我自系相识到至今为你长日受困.枉你当初同声今日背了前盟.我只估话有个情哥为做倚凭.算来男子冇个真心.只话唔挂你死去投生.想过唔做得咁笨.点好让人快活我自己做了枉死冤魂.记得起首相交今日你就唔记得个阵.做乜你骗人咁耐又试贪新.呢回你改过自新.我共你缘正有分.唉心不忍.免招人话薄行.你便修心怜悯我.算我怕你咯恩人.

《真正恶做》

真正恶做.娇呀汝晓得我苦心无.日夜共汝痴埋重惨过利刀.近日见汝熟客推完.新客又不到.两头唔到岸.好似水共油捞.早知道唔共汝住得埋.不若唔相与重好.免使挂肠挂肚.日夕咁心操.劝汝的起心肝寻番过好佬.共汝还通钱债.免使到处受上期租.河底下虽则系繁华.汝见边一个长好得到老.究竟清茶淡饭都系拣过上岸至为高.况且近日火烛咁多.寮口又咁恶做.河厅差役终日系咁嗌嘈嘈.唔信汝睇各间寮口部.总系见赊唔见结.白白把手皮捞.就俾汝有几个女都养齐.好似话钱债易做.恐怕一时唔就手就堕落酆都.虽则鸨母近日亦算有几家系时运好.赎身成几十个女.重有几十个未开铺.想到结局收场未必真系可保.况且百中无一个的境遇实在难遭.汝好心採拨埋寻着地步.唔怕冇路.回头须及早.好过露面抛头在水上蒲.

《人实恶做》

人实在恶做.都无日开眉.俾极真情待汝汝都未知.我为汝泪流长日抖气.我想过做人咁样子汝话有乜心机.汝叫我个个待到咁真心唔得咁易.总系见君君哑.我就唔肯负却个段佳期.莫话珠江尽是无情地.今日为情字牵缠所以正得咁痴.做乜开口就把薄情看待我地.怪得汝时常相聚都系貌合神离.呢会汝会念奴奴亦都会念汝.唉唔好咁厌气.做个全终始.等汝花粉丛中识下我地女儿.           (原书作首)

 

《辛苦半世》

辛苦半世.都系两个人知.做乜苦尽总不见甘来.汝话有乜了期.我自系识性就知道做人唔系乜易.只望捱通世界正有的心机.点想冤债未偿堕落花粉地.江湖漂泊各散东西.我苦极都系命招.埋怨吓自己唉唔忿得气.往事休提起.点肯话终身沦落在呢處苦海离离.

《无可奈》

无可奈.想到痴呆.人到中年白发又催.自古红颜薄命真难改.总系红粉多情都是惹祸胎.我想尘世汝话点能逃得苦海.总要前生修得到.或者早脱离□.一定前世唔修故此沦落得咁耐.唉难割爱.人去情根在.不堪回首咯我要问一句如来.

 

《寄远》

唔好咁热.热极就会难丢.一旦离开实在见寂寥.好极未得上街缘分未了.况且干柴凭火也曾烧.叫我等汝三年我年尚少.总怕长成无倚我就错在今朝.此后莺俦燕侣心堪表.独惜执盏传杯罪未肯饶.自怨我薄命如花人又不肖.舍得我好命如今重使乜住寮.保佑汝一朝衣锦还乡耀.汝书债还完我花债亦消.总系呢阵旅舍孤寒魂梦绕.唉音信渺.灯花何日兆.汝睇京华万里一水迢迢.

《春花秋月》

春呀你唔好去自.重有一句商量.共你年年离别实系情伤.睇见花事系咁飘零我就魂魄荡.大抵人生难定都是聚散无常.舍得真正共你冇缘我亦唔咁勉强.做乜绸缪三个月又试两地分张.睇下王孙归去我就添惆怅.挽留无计算我负却春光.我想繁华春望亦都成虚况.唉无乜别讲.送君南浦上.呢回有书难写可惜纸短情长.

花呀你唔好谢自.重要赏吓芳容.无聊愁对住雨隂中.讲到红颜薄命边个心唔痛.算来人世共你一样飘蓬.花你有时夜静重把香来送.真正累人如果系个的浅深红.若系花你无香未必惹得我真情动.独惜我护花无力怨恨东风.呢回蜂狂蝶浪亦都唔中用.唉你妹愁有万种.往事多如梦.边个有怜香心事你便谱入丝桐.

秋呀你唔好老自.重要繋住下年华.满怀愁绪对住的蒹葭.人话秋风萧瑟堪人怕.我爱盈盈秋水浸住红霞.既系秋你冇情未必把我长牵挂.睇见你常留明月照我窗纱.大抵可人尽在个的手潇洒.莫话因风憔悴敢就瘦比黄花.我想悲秋宋玉都是成虚话.边一个对秋唔想去泛仙槎.呢回我亦怜秋.秋亦要怜我一吓.唉你妹喉带咽哑.採菊东篱下.你睇浔阳江上泪滴琵琶.

月呀你唔好落自.重要照到我通宵.夜里怀人更重寂寥.人地只晓得月你团圆心就喜极.点晓得月到圆时一自自减消.月呀你一个月一遍团圆.我见你圆得太少.点得相逢卅夜.夜夜都把我相邀.试把聚散问吓嫦娥应亦略晓.点解我姻缘无路敢就拆断蓝桥.更有心事许多重想月呀你同我照料.唉你妹愁都未了.衷情谁为表.点得夜夜逢君学个的有信海潮.

 

《鸳鸯》

鸳鸯一对.世上难分.总系人在天涯见佢倍怆神.佢眠食都舍不得离开叫我心事点忿.问一句鸳鸯呀.我願托生为你不願为人.都系情义佢睇得咁松.至此名利佢看得咁紧.想到青春难买就枉费你千金.都系俗眼重个的虚名故此想分佢一分.又想话为奴争啖气正舍得割断情根.我地相隔睇住你相欢如果系肉紧.唉真正系笨.就被你觅觅到封侯你妹都要悔恨.想想到呢阵凤寡鸾孤.叫我怎不断魂.

 

《扇》

手拈一把齐纨扇.提起共你分携隔别一年.热起番来常纪念.做乜但到秋来就会弃捐.大抵扇有丢抛人有厌贱.细想人情冷暖总不堪言.世态炎凉休要自怨.冷时边一个唔在热时先.总系热处须从凉到打算.莫个逢人就热热得咁痴缠.虽则话系咁啫.热极个阵只晓得痴迷点想到后来人事改变.唉瘟咁眷恋.拨埋心事一便.系攞呢会丢埋个的冷处.总不记得热在从前.

《烟花地》

烟花地.是邪魔.有咁多风流就要受咁多折磨.雪月风花我亦曾见过.无限风流问你买得几多.只可当佢系过眼烟云.若系你痴就会错.恐怕凿山难补个的冇底深河.若讲到真义真情边个共你死过.总怕金尽床头好极都要疏.大抵花柳害人非独一个.唉须想过.好息心头火.普劝世间人仔莫误结个段水上丝蘿.            

《销魂柳》

销魂柳.暗牵衣.柳呀既晓得牵情又点舍得别离.东风一夜人千里.暮云春树惹妹相思.关山迢递你妹书难寄.总要情同金石永不更移.莫话呢吓握手长情歇吓分手就负义.须记阳关赠君一枝.你妹自少失身原是为你.唉情一个字.君呀你唔念于今都要念吓旧时.

《情一个字》

情一个字.重惨过砒霜.做乜无情白事断人肠.搔首问天天呀你又唔好咁样.命薄如花总不为我主张.怨只怨我生错作有情.故此多呢种孽账.当初何不俾我铁石心肠.你睇顽石重有望夫留在世上.须要自想.任你魄散魂飘荡.总系边一个多情就向边一个抵偿.

《多情柳   凡二》

多情柳.赠俾薄情天.夫呀分离二字问你可怜无.一心只望你唔亏负.两存恩爱水远山高.点想共你无缘敢就分拆在半路.呢阵烟水云山阻隔路途.做女个阵点知离别得咁苦.唉真正可恼.呢会衷情都系凭柳你代诉.故此咁远致到得呢处离亭我亦不惮劳.

多情柳.泪眼双双.柳呀做乜见人快活见我就凄凉.你种在灞桥就知道你系冤孽账.送人归去净对住个对宿水鸳鸯.柳呀你弱质咁难扶都系同我一样.春风唔怕怕捱到秋霜.今日形容咁枯槁似极无傍.唉唔好异向.到头终有望.自古新荑还只望佢再发枯杨.

《愁到无解》

愁到无解.怨一句命蹇时乖.天呀你敢样子生奴.你话点得一世埋.鲜花岂有话唔思戴.总系命里带不得风流都系白白嘥.相思担起寻人买.逢人都叫我转过柳巷花街.重劝我有价可估无价亦可卖.还了旧债.好过随街摆.免得相思无主.冇日开怀.

《愁到极地》

愁到极地.懒整残妆.繡帘唔捲为怯风寒.你妹半减腰围都为你怆.你在何处风流总不返故乡.就系唔念你妹呢處青楼.亦该思忆吓府上.就系妻儿唔挂都要纪念吓爹娘.做乜身在天涯你心就异向.唉何苦咁样.君呀切莫听人唆搅你掉转心肠.

 

《点算好  凡二》

点算好.共你相交又怕唔得到老.真情虽有可惜实事全无.今世共你结下呢段姻缘待等来世正做.你为和尚我做斋姑.唔信你睇红楼梦上有段鸳鸯谱.个个宝玉共佢无缘所以黛玉得咁孤.佢临死哭叫四个字一声唉宝玉你好.真正无路可诉.离恨天难补.罢咯不若共你淡交如水免至话我系薄情奴.

点算好.君呀你家贫亲又咁老.八千条路敢就冇一点功劳.亏我留落呢處天涯家信又不到.君归南岭我苦住京都.长剑虽则有灵今日光气未吐.新篁落蘀或者有日插天高.孙山名落朱颜槁.绿柳撩人重惨过利刀.金尽床头清酒懒做.无物可报.珠泪穿成素.君呀你去归条路替我带得到家无.

 

《唔怕命蹇》

唔怕命蹇.总要你心坚.愁冇一个月老哀怜.莫话命蹇时乖你就寻个短见.半世冇一日开怀恐怕你做鬼亦冤.若系话刊定板八个字生成唔到你算.又未知到后来真定假.未必有个食饭神仙.大抵人事都要尽番或者时运会转.唉休要自怨.莫话好事难如愿.若系坚心宁耐等.就系破镜都会重圆.

 

《嗟怨命少》

嗟怨命少.恨我带不得几多条.人人都系咁攞命叫我.点舍得把佢来丢.舍得我有命每个俾佢一条.无乜紧要.无奈呢一条烂命好费事正剩到今朝.个的多情为我丧命我亦填唔了.佢死亦见心甜.都算得我命里所招.我想贪花丧命都系因年少.究竟风流到底正算得系老来娇.你睇牛女岁岁都有相逢.大抵佢年纪亦不小.唉心共照.七夕同欢笑.总系长命又要长情正可以渡得鹊桥.

《身只一个》

身只一个.叫我点顺得两个情哥.一头欢喜一便把我消磨.佢两个晚晚开来.偏偏要叫我.舍得一人晚.都免使我咁啰嗦.削性共佢一个好埋.等佢寻过别个.又怕个瘟尸唔好得到底.唎我就苦怨当初.又怕佢个薄情唔忿得我.个的旁人唆搅是非多.唉点得我心破得做两边人.变得做两个.呢会唔使动火.但得佢二家唔食醋咯.重好过蜜饯菠萝.

 

《吹不断》

吹不断.是情丝.情丝牵住割亦难离.牵到人心个阵就无乜主意.魂魄唔全只剩一点痴.若系两个情痴就俾佢痴到死.死亦心甜不枉做故知.鬼怕一个情痴一个唔多在意.单思成病药亦难医.个阵你肯为佢舍生佢亦唔多谢到你.唉真正冇味.实在话过你听咯.你要死亦访到情真死都未迟.

《结丝萝》

清水灯心煲白果.果然清白怕乜你心多.白纸共薄荷包俾过我.薄情如纸你话奈乜谁何.圆眼沙梨包几个.眼底共你离开暂且放疏.丝线共花针.你话点穿得眼过.真正系错.总要同针合线正结得丝萝.

 

《船头浪》

船头浪.合吓又分开.相思如水湧上心来.君呀你生在情天奴长在欲海.碧天连水水与天挨.我地红粉点似得青山长冇变改.你睇吓水面个的残花事就可哀.似水流年又唔知流得几耐.须要自爱.许你死后做到成佛成仙.亦未必真正自在.罢咯不若及时行乐.共你倚遍月榭风台.

 

《桃花扇》

桃花扇.写首断肠词.写到情深扇都会惨凄.命冇薄得过桃花.情冇薄得过纸.纸上桃花薄更可知.君呀你既写花容.先要晓得花的意思.青春难得莫误花时.我想绝世风流都冇乜好持.秋风团扇怨在深闺.写出万叶千花都为情一个字.唔系你睇侯公子李香君.唔系情重点得遇合佳期.

 

《相思缆》

相思缆.带我郎来.带得郎来莫个又替我搅开.是必缆系心绪绞成.故此牵得咁耐.逢人解缆我就自见痴呆.缆呀你送别个阵可憎回.转个阵可爱.总系两头牵扯唔知几时正得埋堆.我心事一条交过你手内.可恨你时时要斩缆.敢样就乱我心怀.我想誓使乜定要对住个山盟.使乜对住个海.总要心莫改.若系唔同心事.缆都搅你唔埋.

 

《相思病》

乜你咁病.见你面带青黄.相思唔估会入到膏肓.我想天地俾我一段情缘就系同我写一幅病状.既系与君同病药亦同尝.郎呀药咁难尝到底你尝见点样.今日苦上心头净我共你两个惨伤.我两个大早就死心病重还有乜指望.眼前无路苦海茫茫.如果死后共我结得再世姻缘.我就把菩萨供养.又怕我六根唔净到不得西方.世事讲到来生亦都全系妄想.无乜倚向.青楼就系地狱咯.重讲乜地久天长.

 

《对孤灯》

断肠人怕对孤灯.对影孤寒想吓就断魂.呢阵衿枕咁孤单无乜倚凭.影呀你无言无语叫我苦对谁伸.虽则共你成双亦难慰得我恨.不若把杯同影共作三人.爱只爱你生死不离咁跟得我紧.就系天涯海角你我都难分.君呀大抵呢阵银灯独对心相印.恨只恨我只影难随共你酌斟.愿你对影暂将魂魄认.唉心不忿.梦寐难亲近.当作秋灯长见我.切勿对影伤神.

 

《听乌啼》

断肠人怕听乌啼.啼时咁辛苦想必为借一枝栖.边一个唔想望高飞.大抵唔系乜易挤.况且你满身毛羽尚未生齐.鹊呀做乜你净系替人地填桥总唔晓自己赑屃.两头频扑你嚊揾的挨依.今日风露咁清凉林木咁阻滞.须要早计.莫话乌头转白正知到世事难为.

《梳髻》

头录拨开梳过一只髻.等佢知头知路早日开嚟.髻心须要侵头皮.把定心头怕乜是非.扎住髻根联住髻尾.我重要跟郎到尾正有的心机.花管带花通到髻底.等我花债还通管得你带我去归.重要花伴髻.发边藏住月桂.正系月老与及花神都重保佑我地两个白发齐.

《还花债》

想必缘分已尽.定是花债还齐.债还缘尽惹起我别惨离凄.我地两个人咁情痴.再不估情不到底.想起吓从前个种风月.好似梦断魂迷.起首共你相交你妹年纪尚细.共你细谈心曲怕听水上鸣鸡.只估话日子咁长你同妹设计.点想你夫妻情重带不得贱妾回归.累得我断梗飘蓬无所倚繋.细想吓漂流无定只着要揾的挨栖.今日人地讲我地薄情唔系都似系.总系同群咁多姊妹.点晓我心事咁难为.我身上著呢件青衫都是凭眼泪洗.唔系计.君呀你是必硬着心肠唔多愿睇.故此自从听见话我去咯此后总总唔嚟.

 

《点清油》

清油半盏点着几条心.君呀你心事咁多时.叫我点样子去寻.睇你心头咁猛亦都唔禁浸.你试睇吓个盏清油尚有几深.恐怕越浸越干油重越紧.点似得心少油多慢慢斟.你唔怕我.莫学无人恨.你重要剔起心头正好做人.

 

《别意》

想必缘分已尽.花债都还齐.债还缘尽故此惹出别惨离凄.唉我两个系咁情痴.点估话情不到底.想起从前个种风月哩.好似梦断魂迷.记得起首共你相交你妹年纪尚细.个阵顷谈心事.怕听见海上鸣鸡.只望相与日子有咁长.你亦会同妹设计.点想你夫妻情重不肯带贱妾回归.累得我断梗又好似飘蓬无所倚繋.想到话吓漂流无定咯.只着要揾的挨栖.今日人地话我薄情.唔系都似系.再不估同群咁多姊妹.冇个知我心上咁难为.我近日面上桃花只系凭眼泪洗.唉君呀你唔好为我赑屃.知道拗硬个副心肠唔多愿睇.所以你自从听见话我要去咯.此后你总不开嚟.

 

0

阅读 评论 收藏 转载 喜欢 打印举报
  • 评论加载中,请稍候...
发评论

    发评论

    以上网友发言只代表其个人观点,不代表新浪网的观点或立场。

      

    新浪BLOG意见反馈留言板 电话:4006900000 提示音后按1键(按当地市话标准计费) 欢迎批评指正

    新浪简介 | About Sina | 广告服务 | 联系我们 | 招聘信息 | 网站律师 | SINA English | 会员注册 | 产品答疑

    新浪公司 版权所有