加载中…
个人资料
尔古木三
尔古木三
  • 博客等级:
  • 博客积分:0
  • 博客访问:19,594
  • 关注人气:112
  • 获赠金笔:0支
  • 赠出金笔:0支
  • 荣誉徽章:
相关博文
推荐博文
谁看过这篇博文
加载中…
正文 字体大小:

[转载]神秘的德布洛莫

(2014-10-28 10:52:39)
标签:

转载

原文地址:神秘的德布洛莫作者:木帕古尔

神秘的德布洛莫  文□木帕古尔   图□吉莫曲哈  胡崟


ꂵꇖꀕꌠꅡꀯꇉꂾ

ꃅꁁꈬꆳ‖ꁱ    ꐞꂽꐎꉐ  ꃛꑴ‖ꍑ

     ꅡꀯꇉꂾꆹ,ꑊꋌꉱꃀꐤꅉꉬꌠꉨ,ꀘꂾꌌꈼꀕꀗꀘꌋꆀꁦꐡꇉꍑꀐꇚꑴꉂ;ꅡꀯꇉꂾꆹ,ꁴꍂꂪꐚꏓꅉꉬꌠꉨ,ꌠꑊꌌꍃꀕꏿꀕꌋꆀꏃꇔꉏꆈꄓꀐꇚꑴꉂ。ꒌꎃꊐꆠꎁꀠꌠꑌ,ꃆꉙꆽꀋꈘ,ꎸꉗꊨꀋꅥ,ꄚꌧꍹꀋꐛ,ꆽꈜꎟꀋꋠꌠꌌꄉ,ꉬꇮꃅꏮꏑꅡꀯꇉꂾꅐꇁꇈ,ꈁꐞꅩꇉꀕꈧꌠꃮꐜꃬꐜꃅꐜ,ꎐꂷꂰꑳꀕꈧꌠꍶꅸꑿꅸꃅꅸ。ꋋꈨꒉꄸꃅ,ꀎꋏꁮꅉꋍꈆꋍꈆꃅꅤꄁꊖꃴꌕꁏꊐꄉꈧꌠ,ꈍꄮꑌꁯꀋꇙ,ꈍꄮꑌꐴꀋꁘ;ꊂꋊꈱꅇꋍꄍꋍꄍꃅꆼꏈꑳꃴꌕꁏꄀꄉꈧꌠ,ꈍꄮꑌꍹꀋꐛ,ꈍꄮꑌꆰꀋꀿ。

    ꑠꃅꑴꇬ,ꊨꊭꅪꎔꀕꇴꎔꉻꋦꂶꌠ,ꎔꒌꅡꀯꇉꂾꁨꆹꎻꀋꈁ;ꌺꄂꎰꃘꇰꀑꇰꑊꅑꂶꌠ,ꈌꌋꅡꀯꇉꂾꑟꆹꉘꀋꇉ。ꎆꎔꄵꎭꐊ,ꊿꎔꑊꋌꐊ,ꊨꊭꅪꎔꆵꆹꐟꈯꇤꇉꅡꀯꇉꂾꆶ,ꑋꆹꆺꃅꏪꐦꏉꊂꇉꂾꑌ,ꑊꋌꉱꃀꋌꏃꋌꀿꃄꇖꄹꊂꁊꑴꄷ——ꀃꌋꂾꀊꆨ,ꊾꋠꎺꀋꉻ,ꅡꀯꇉꂾꋦ,ꅡꀯꃢꃅꈚ,ꈬꉙꈬꃪꋍꎮꈁ,ꁮꏂꐧꃬꃅ,ꋍꑍꌕꉙꐈ,ꈬꌩꈬꇓꋍꁾꅉ,ꒉꄩꃪꄩꐂ,ꁦꐂꇉꅜꐺ,ꋋꈨꒉꄸꃅꅡꀯꇉꂾꑠꃅꊿꀋꋦꃮꀋꀅꅷꇁꑴꄷ;ꌺꄂꎰꃘꆹ,ꈌꌦꈌꌋꌌ,ꅡꀯꇉꂾꈌꌋꉆꈹꆹ,ꅡꀯꇉꂾꑊꋌꏮꏑꎻꀋꈁ,ꈌꐪꎹꀕꎹꀋꄿ,ꐪꎹꐪꀋꊌ,ꎷꈌꍀꈌꀋꂿꀐ;ꈌꃅꐜꀕꐜꀋꄿ,ꈌꐜꈌꀋꂿ,ꃮꃚꋓꃚꀋꈨꀐ。ꑓꏮꉎꉜꑌ,ꌩꏪꆈꊉꀕ,ꑓꏮꐰꉜꑌ,ꇉꅶꇴꌅꀕ。ꌺꄂꎰꃘꆹ,ꎹꅉꈹꅉꃅ,ꇳꅉꉓꅉꃅ,ꇁꌊꑷꂿꈬꊐꑠꂷꈐꏭꃹ,ꋋꑌꊾꋠꎺꀋꉻꄰꀀꅉꉬꎻꀋꈁ;ꊾꋠꎺꀋꉻ,ꑍꆏꐈꊿꐙ,ꃥꌪꃥꋩꇥꀋꏦ,ꌊꆏꐈꐚꐛ,ꑊꋌꉱꃀꀋꃷꎵ,ꌺꄂꎰꃘꆹ,ꃆꄔꌌꇁꐗ,ꐛꌺꅐꅪꍈ,ꆶꇁꃄꇖꄹꊂꃰ,ꋋꑌꊾꋠꎺꀋꉻꀋꃋꑘꀕꊨꊭꅪꎔꉬꑴꄷ。ꋋꆹꁮꅉꅺꊈ,ꅡꀯꇉꂾꁮꅉꅺꊈꈐꏭꐛ,ꒈꀑꊿꀋꈴ,ꒈꂪꊿꀋꅝ;ꋋꆹꌦꅇꌋꅅ,ꅡꀯꇉꂾꌦꅇꌋꅅꇢꊭꐛ,ꁦꀑꊿꀋꋦ,ꇉꅶꃮꀋꀆ。

[转载]神秘的德布洛莫

(ꑍ)

      ꅡꀯꇉꂾꆹ,ꈀꄸꑌꉁꃬꌌꄉꀊꄶꉜꄉꎭ,ꇿꇬꑌꊐꂿꌌꄉꀊꄶꉜꄉꅥ。ꀎꋏꏦꄻ,ꌠꑊꑞꃅꑠꃅꑊ?ꊂꋊꏦꍬ,ꀘꂾꑞꃅꑠꃅꀘ?ꂵꇖꀕꌠꅡꀯꇉꂾꆹ,ꈝꃀꈍꏯꁮꀋꐚ?ꃅꍜꈍꏯꊒꀋꐚ?ꋋꆹ,ꅡꀯꇉꂾꋍꏮꑟꆹꑲꆀ,ꂥꀘꇁꄎꌠꅲꅇ;ꋋꆹ,ꅡꀯꇈꂾꊼꇅꉜꆹꑲꆀ,ꐝꉅꇁꉆꌠꀱꅇ。2009ꈎ7ꆪ15ꑍꄹꉇ,ꉪꊇꆃꎭꄆꁱꃑꅉꆀꉙꈯꄜꐥꌠꐋꀨꁥ,ꃅꄜꀕꃅꆿꁮꀒꎂꌩꄂꁧꑭꄉꇁꇈ,ꑝꅇꋓꃱꇁꄿꑆ,ꃺꄧꍏꌙꐦꀞꈴ,ꐟꈯꇤꇉꆿꃀꃅꄷꉜꄉꆹ。ꉪꊇꆹꉪꄉꎖꄉꇁ,ꅡꀯꇉꂾꃆꂮꁮꅉꊼꇅꎹꇁꅱꅉꃅꂿꉂ;ꉪꊇꆹꄐꄉꏤꄉꁧ,ꅡꀯꇉꂾꃆꂮꅲꅇꊼꇅꉉꇁꀰꅉꃅꏭꄐ。

     ꁦꐂꇈꈴ,ꒉꈫꃪꅂ,ꋋꄹꉇꌋꐓꆺꄜꀕꄮꇬꑲꆀ,ꉪꊇꇁꌊꇤꇉꆿꃀꃅꄷꑟ。ꀊꄶꇬꊿꌌꇫꄉꌧꇬ,ꅡꀯꇉꂾꆹ,ꀞꄂꈜꀋꍬ,ꂴꆽꃬꅥꃬꂿꒉꇬꑲꆀ,ꋍꁥꋍꁥꃅꐮꐊꀊꄶꆹꉆ,ꋋꆹꊾꇷꊿꇋꌠꀋꉬꑴꄷ。ꐟꈯꇤꇉꆿꃀꑣꑟꆹꈭꐨꆏ,ꐕꍯꈝꃀꑌꁮꅷꅡꀯꇉꂾꑟꆹꌠꀋꐥꀐ,ꉪꊇꆹꀊꄶꇬꄉꆈꌠꃀꌠꑍꂷꎹꌊꈜꏁꄉ,ꊛꄉꅡꀯꇉꂾꉜꄉꆹ。ꂵꆧꁦꅂ,ꉪꊇꇵꂷꄧꄹꊰꄉꇈ,ꐧꌧꈎꌌꌥꅉꀵꅉꃅ;ꃅꈊꌋꎳ,ꉪꊇꃅꏸꆪꁨꆫꄉꇈ,ꂷꇭꄔꌌꈳꅉꆎꅉꃅ。ꋋꄹꉖ,ꉪꊇꐙꄏꐝꆜ,ꀒꁨꆹꂿꄷꇬ,ꇉꅶꈐꏭꆈꋧꋪ,ꃅꏸꌫꑌꀈꈥꌬ,ꆪꁨꅏꑌꀈꈥꅐ;ꉪꊇꂮꐚꒉꌤ,ꀍꉀꅂꂿꄷꇬ,ꌊꁁꑭꐓꄔꐽꄔꀋꐽ,ꌋꐓꑓꁉꂿꐚꂿꀋꐚ,ꃄꋒꌧꑌꀈꈥꌧ,ꂷꇭꄔꑌꀈꈥꄔ。ꇁꌊꅡꀯꇉꂾꇉꅶꇴꌅꀕꅉꑟꇁꈭꐨꆏ,ꈝꃀꐜꀋꈨ,ꑭꐨꇬꀋꁮ,ꉪꊇꆹꊛꄉꁧꄩꆹꂿꉂꇬ,ꌩꏪꂶꏪꍻꀋꄐ,ꍲꈬꂷꈬꀺꀋꄐꐛꅹ,ꅡꀯꇉꂾꁧꑭꇉꅶꇴꌅꀕꅈꋍꉔꀀ。ꋋꄹꉖ,ꉪꊇꃆꄔꏦꄉꇬꄷꑌ,ꂿꐚꂿꀋꐚ,ꉪꊇꄐꄉꏤꄉꀀꇬꑌ,ꀀꅲꀀꀋꅲ。ꌋꐓꆺꄜꀕ,ꅡꀯꇉꂾꈬꌩꈬꇓꑞꋦꑌꀋꐚ,ꈜꐯꄙꇙꊭ,ꈜꉐꁁꇅꍧ;ꇉꅶꆈꋧꋪ,ꅡꀯꇉꂾꈬꉙꈬꃪꑞꐥꑌꀋꐚ,ꅶꁉꏹꇔꌬ,ꍤꁆꅩꌦꀕ。ꀋꌋꀕꃅꑓꋪꂮꄉꃅꃴꉜ,ꃅꏸꏃꂷꂿ,ꌙꈈꀕꃅꅳꀧꄂꄉꅶꍯꅲ,ꁮꈬꁮꆰꏅ。ꃶꐚꃅ,ꀊꋨꄹꉖꅡꀯꇉꂾꇉꅶꒈꏾꏢꁮꃄꅉꏢꏪꇇꁮꒊꍇꌠꀀꄮꇬ,ꀀꈉꈜꉐꃪꊭꃪꑓꅩꑳꀕꌠꂿꄷꆏ,ꊽꉌꃀꄚꐊꏦꏪꇓꂃꄓꌠꌡ,ꀀꈉꈜꐯꒈꏾꂆꃚꉼꏒꀕꌠꈨꄷꆏ,ꊽꉌꃀꄚꐊꏃꃅꒊꊝꂋꌠꌡ。

      ꎹꄓꀀꐚꈭꐨ,ꑓꏮꅶꁉꍤꁆꉜ,ꀑꐕꁧꄩꁧꑭꆫ,ꆃꎭꆈꌠꊨꏦꏱꅉꍏꐟꈯꇤꇉꌋꆀꃺꄧꇓꈓꇢꊭꐛꌠꅡꀯꇉꂾꆹ,ꃄꁕꀊꀋꒉ,ꋍꄲꀉꄂꃅ,ꊿꀥꁧꄩꑟꄎꇚꑴꉂ。ꃅꄜꑓꂿꈭꐨ,ꉪꊇꆹꑭꄑꄉꁧꄩꉜꄉꅁꌦꀐ。ꈍꑋꃢꒊꃀꒈꌺꈭ,ꉪꊇꌩꏦꐔꌊꋒꄻꄉꇈꒉꄩꐂ;ꈍꑋꃢꌩꑭꇓꃴꑆ,ꉪꊇꉊꈯꌭꌊꁬꒇꄉꇈꈝꃀꎹ。ꋓꉪꀋꁨꃅ,ꂵꆧꈨꑭꏁꌬꀕꀐꇬ,ꉪꊇꆹꀋꇊꆏꀱꇊꋌꈚꐺꌠꌡ,ꋪꇊꋌꈚꇱꄉꌠꑌꌡ,ꇫꑟꆸꄮꂷꑌꀋꐥ。ꈀꄸꑌꐙꄏꐝꆜꌊꄉꈌꊰꇁꂯꄮꇬꑲꆀ,ꈜꏁꊿꄹꇬ,ꊛꄉꑲꇤꅝꉗꅂꑲꆏ,ꉪꊇꆹꅡꀯꇉꂾꁦꌺꇂꁮꆼꁠꌡꍇꌠꇬꅂꆹꀐꄷ。ꅡꀯꇉꂾꇁꀋꋻꌠꆹ,ꁦꄅꇈꄅꎇꃀꍅꑓꉆꂷꀋꇊꌡꋋꈨꇢꊭꄉꏭꏮꌋꆀꀑꃶꀐꇬ,ꅡꀯꇉꂾꁦꀮꂶꌠꇿꐛꌠꅉꀋꐚꑴꄷ。ꉜꇊꂾꆏ,ꈌꁉꇳꆏꁦꀑꁧꑭꈨꌠꌡ,ꇇꎇꒂꆏꅶꁉꍤꁆꂪꌠꌡꑴꇬ,ꅡꀯꇉꂾꆹ,ꁦꌦꁦꌋꁦꄅꇈꄻꄖꅊꇈ。

[转载]神秘的德布洛莫

(ꌕ)

      ꆎꅉꇀꅉꃅ,ꉪꊇꇤꇉꆿꃀꁀꏯꈴꄉꇁꌊꅡꀯꇉꂾꁦꀮꀒꆺꂶꌠꇬꅂꆹꀐ。ꈝꃀꐜꀋꈨ,ꈳꈨꀹꅉꃅ,ꌩꑭꂷꑭꃺ,ꒊꃀꒈꌺꐂ,ꑭꐨꇬꀋꁮ,ꎹꅉꈳꅉꃅ,ꏦꈫꏦꏪꏶ,ꃪꊭꃪꑓꅂ。

ꅡꀯꇉꂾꁧꈭꁧꇍꆹ,ꁧꌦꁧꌋꁧꑭꇖꁄꇖꈚꄙꅊꇈ,ꋍꁆꎇꇁꇤꇉꆿꃀꄙ,ꅡꊪꀕꃅꄙ;ꋍꁆꎇꇁꆈꈯꆿꏸꄙ,ꎵꑳꀕꃅꄙ;ꋍꁆꎇꇁꇈꃅꆿꁌꄙ,ꏡꑌꀕꃅꄙ;ꋍꁆꎇꇁꀠꈬꆿꇙꄙ,ꉧꑳꀕꃅꄙ。ꉪꊇꆹꌊꁧꑭꑟꆹꈭꐨ,ꂴꆽꊿꈨꇁꌠꆹ,ꒊꊨꎮꀕꂾꃚꌋꆀꒊꃀꒈꌺꂆꃚꉬ。ꅡꀯꇉꂾꁦꀮꀒꆺꂶꌠꆹ,ꒉꌦꒉꌋꑍꂡꇁꌊꇫꆼꒆ,ꒉꀦꑍꈚꅐ,ꁭꅐꁮꐚꏍꄉꅐ,ꒈꏾꋍꈜꏓ,ꒈꀑꒈꂪꏍꄉꏓ。ꒊꃀꋍꂡꆹꌿꒉ,ꋋꆹꁧꄩꌿꏪꇂꃴꄉꁖꇁ,ꇂꈯꆿꈪꁧꑭꉜꄉꇁ,ꀋꇊꆏꊾꋠꁡꉐꑭꎅꇇꎇꁦꄙꇈꑃꄈꏢꌡ;ꒊꃀꋍꂡꆹꃪꒉ,ꋋꆹꁧꄩꃪꊭꅩꑳꀕꑠꂷꇬꄉꊰꇁ,ꊒꆽꀕꃅꃪꃹꉜꄉꊰ,ꀋꇊꆏꂿꃅꇬꄉꃝꎼꇁꌠꑌꌡ。ꅡꀯꇉꂾꒊꊨꎮꀕꊯꅉꃪꊭꃪꑓꄩ,ꌦꐬꌊꐬꇖꐬꇖꈚꁮ,ꇖꐬꑊꋌꇖꑻꌋꑴꄷ,ꋍꐬꑚꌋꆿꃀꊒ,ꀋꏂꃺꑘꌋ;ꋍꐬꑾꌋꆿꁌꊒ,ꀋꏂꃺꆜꌋ,ꋍꐬꈌꄸꆿꇙꊒ,ꀋꏂꀨꀕꌋ;ꋍꐬꇐꄸꆿꏸꊒ,ꀋꏂꇢꇤꌋꑴꄷ。ꇁꌊꀊꂥꅉꉆꄉꉜꇬ,ꅶꁉꃪꐛꅩꑳꀕ,ꑚꌋꑾꌋꏍ,ꍤꁆꃪꐬꄎꉘꀕ,ꈌꄸꇐꄸꏍ。ꃪꊭꃪꑓꑴꄩꆏ,ꑍꈤꌩꆼꒆ,ꑙꃀꑙꌺꐊ,ꄚꐂꀊꄶꅞ,ꑙꇁꊈꈜꑓꅑꋋꂿꑌ,ꑭꎅꋌꀋꄔ,ꇇꎇꋌꀋꂪ。

     ꅁꅉꐿꅉꃅ,ꌧꅉꏇꅉꃅ,ꅡꀯꇉꂾꌩꑭꇓꃴꈭꇁꈜꀋꁮꅊꇈ;ꀹꄮꍺꅉꃅ,ꉜꇁꆫꅉꃅ,ꅡꀯꇉꂾꊸꑍꈧꅐꉒꇁꄂꐎꇉꅊꇈ。ꁯꋒꐯꑎꆏ,ꁮꏮꈞꆈꃹ,ꉪꊇꆹꇁꌊꅡꀯꇉꂾꁧꄩꑟꇁꀐ。ꅡꀯꇉꂾꁧꄩꆹ,ꂷꋦꂷꄅꄖ,ꌿꑭꂶꏪꃴꇉꀕ,ꌿꑭꆳꀋꃹ;ꅡꀯꇉꂾꁧꄩꆹ,ꌿꋦꌿꄅꄙ,ꂷꄩꌿꁧꇪꑐꀕ,ꂶꀑꍑꀋꅑ。ꋍꈭꐨ,ꁧꐙꁦꄅꄖ,ꇉꐛꇈꂪꋽꌠꅡꀯꇉꂾꆹ,ꃪꊭꃪꑓꂴꊨꎵꑳꀕꃅꅑ,ꌿꁧꂷꁧꌩꂱꃢꃅꈚ。ꁧꄩꃅꆳꈺꌋꀕꄷꑌ,ꑾꃅꇁꂟꊽꈌꊽꑓꍘ,ꀋꇊꆏꐛꑿꈨꌟꃅꄉ,ꋍꊈꋍꊈꃅꊿꂅꊾꋠꇁ。ꉈꑴꌿꁧꇂꃴꂷꁧꇬꆹ,ꁮꏂꃴꇉꅍꑠꈴꃪꂷꐙꈑꇙꇬꀀꎍ。ꂵꇖꀕꌠꅡꀯꇉꂾꆹ,ꁧꄩꀉꐚꃮ,ꁧꐧꌧꆳꎪ,ꁧꑭꅡꀯꋦꅊꇈ,ꋋꆹꊩꌺꊔꌺꃆꉙꎸꉗꌌ,ꃆꉙꐍꅝꀕ,ꎸꉗꊪꏮꀕꌠꄜꏭꐛ;ꋋꆹꊢꌺꀖꌺꄚꌧꆽꈜꀵ,ꄚꌧꇤꆽꏦ,ꆽꈜꁯꇲꏪꌠꄜꏭꐛ。

ꁧꄩꄉꁧꑭꉜꇬ,ꄡꇗꈳꆏꋍꁘꐛꌠꌡ,ꉪꊇꆹꉹꁻꃅꁻꄉꁧꑭꉜꄉꀒꏹꑟ。

[转载]神秘的德布洛莫

(ꇖ)

      ꅚꀯꇉꂾꆹ,ꊨꊪꅪꎔꀊꄶꑌꄉꒈꋌꒈꑻꋺꑴꄷ。ꍈꃀꁎꁏꀕꀋꄿ,ꁎꅉꎒꅉꑟ;ꋑꂪꈩꀕꈩꀋꄿ,ꈩꅉꈗꅉꑟ。ꅚꀯꇉꂾꊿꇬꊿꃅꇿꄉꉻꀋꐚ。ꅚꀯꇉꂾꆹ,ꌺꄂꎰꃘꀊꄶꐥꄉꑋꄵꉆꈹꋺꑴꄷ。ꃆꉙꎷꉗꌌꌠꀂꏽꅥ,ꅥꀕꅥꀋꄿ,ꈌꆈꃬꆈꈀꐥꊿꅥꉱꇤꌐ;ꄚꌧꆽꈜꀵꌠꀂꏽꍃ,ꍃꀕꍃꀋꄿ,ꒉꉗꉂꁧꈀꋦꊿꇽꀑꋩꌐ。ꅚꀯꇉꂾꋧꃅꂿꃅꇿꄉꊛꀋꐚ。

     ꅚꀯꇉꂾꆹ,ꑊꋌꏮꏑꅉꈚꉬꑴꄷ。ꀘꂾꍈꃀꁎꑌ,ꀊꄶꉜꄉꁏ;ꌠꑊꋒꂪꈩꑌ,ꀊꄶꉜꄉꈩ。ꅚꀯꇉꂾꑟꐎꑟꆈꇿꄉꃢꀋꐚ。ꉌꌤꑓꀖꐆꃅꐙ,ꅚꀯꇉꂾꈝꃀꇿꇬꁮꀋꐚ。ꅱꅉꇀꅉꃅ,ꇁꌊꅚꀯꇉꂾꁧꄩꋍꏮꑟ。ꅚꀯꇉꂾꆹ,ꁴꍂꃀꈿꅉꈚꉬꑴꄷ。ꈌꂿꃬꂿꅥꑌ,ꀊꄶꉜꄉꅥ;ꉂꆹꃬꆹꎬꑌ,ꀊꄶꉜꄉꎭ。ꅚꀯꇉꂾꈜꐎꈛꆈꇿꄉꐞꀋꐚ。ꏸꏦꃰꈻꉻꃅꐙ,ꅚꀯꇉꂾꃅꍜꈍꏯꊒꀋꐚ。ꆎꅉꇀꅉꃅ,ꇁꌊꅚꀯꇉꂾꃪꐬꇂꃴꋍꉔꀀ。

      ꎺꄉꇬ,ꉂꐎꉁꆈꑍꏢꋧꃅꂿꃅꋌꃹꋌꆽꀑꂪꀱꆽꌐ,ꉬꐮꉬꉎꋌꅥꋌꐷꋧꐛꃀꐛꌐ。ꉜꇊꂾꆏ,ꋋꆹꅡꀯꇉꂾꀀꄉꀄꂼꂷꂻꌠꉬꅊꇈ!ꈧꌺꅑꅉꅑ,ꑍꆏꌬꃅꅑ,ꈨꑭꊷꆣꀕ;ꆪꌺꎑꅉꎑ,ꌊꆏꎔꃅꅐ,ꆪꑭꁨꇉꀕ!

[转载]神秘的德布洛莫

 


2014年《民族》第1期

  

0

  • 评论加载中,请稍候...
发评论

    发评论

    以上网友发言只代表其个人观点,不代表新浪网的观点或立场。

      

    新浪BLOG意见反馈留言板 电话:4000520066 提示音后按1键(按当地市话标准计费) 欢迎批评指正

    新浪简介 | About Sina | 广告服务 | 联系我们 | 招聘信息 | 网站律师 | SINA English | 会员注册 | 产品答疑

    新浪公司 版权所有