余少镭：现代聊斋

　　【译文】孔子话：“古时候嘅人唔会轻易噉许下诺言，因为讲得出做唔到嘅话，系一件好丢架嘅事。”
    孔子话：“君子说话要谨慎，做事要敏捷。”

　　【栋笃】我唔记得我有冇讲过以下呢个笑话，如果有嘅话，大家多多包涵，就当系冷笑话听多次嘞：老窦教仔，做人要诚信、醒目。仔问老窦，咩叫诚信？老窦话：讲得出就一定要做得到。仔又问咩叫醒目？老窦就话：醒目就系唔好以轻易许诺。
　　哇，噉谂起身，古人咪好醒目？其实孔Sir喺“学而第一”入边就讲咗嘞，君子应该系“敏于事而慎于言”嘅，讲嘅都系一样嘅道理，即系做嘢要勤力，讲嘢要谨慎。点解要好长气噉讲？因为孔Sir不嬲都系至憎咗啲口花花嘅人嚟嘎（“巧言令色，鲜于仁矣”）。君子要重在行动，讲得出就要做得到，唔系嘅话，就系一件好丢架嘅事。所以，为咗“不耻”，平时仲系少讲啲为好——做到至讲，永远系唔会迟嘎，好多时候，仲会畀人惊喜添。如果未做就讲先，到时做唔好，就会令到好多人失望，冇晒威信，以后仲使喺江湖上行走咩？
    但系，孔Sir佢老人家点解要特登讲明“古者”呢？就系因为好多“今人”口花花，讲到做唔到，但系就一啲都“唔知耻”，世风日下，人心不古，佢先至要攞古人出嚟讲嘢，睇下“今人”会唔会“知耻”啲，学习做一个“讷于言而敏于行”嘅君子。
    孔Sir讲嘅“古者”，就系佢最向往、亦都系最怀念嘅周朝时候嘅人嘞，而佢想单打嘅“今人”，对于我哋嚟讲，亦都系两千年前嘅“古人”嘞。时间过咗两千年，依家嘅“今人”又点呢？仲唔系一样，口水多过茶嘅人多，开空头支票嘅人多，讲一套做一套嘅人亦多……孔Sir希望嘅“讷于言敏于行”嘅君子唔系话冇，就系已经成为国宝嘞。