【原文】子曰：“三年学，不至于穀（谷），不易得也。”

　　【译文】至，同“志”，志向、理想嘅意思；穀（谷），嗰時出粮系真正嘅“粮食”，所以呢个“谷”字系人工噉解，喺度引申为求官。”
　　孔子话：“读咗三年书，又唔想做官嘅人，系好难得嘎。”

　　【栋笃】真系讲得啱喇孔Sir！赞下先。
　　的而且确，辛辛苦苦读咗几年书，唔想“吃皇粮”嘅人，真系少之又少——呢种社会现实，喺呢两千几年嚟，基本上都冇咩变化。所谓“功名利禄”，冇功名，点可能有利禄？特别系对于讲究“学以致用”嘅儒家子弟嚟讲，干禄（求官），就更加系实现自己人生价值嘅唯一途径。
　　资料显示，2008年国家公务员考试嘅报名人数达到咗80万，竞争比例平均系1:60，远远超过咗2007年嘅1:50。而且，呢组数字，重会逐年上升。旧年我哋都讲过，有学生为咗考上公务员，屡败屡战，转战全国各地考场，获得咗“考霸”嘅称号。
　　点解？重使问点解咩？你明知故问，我就明知故答：“报考公务员人数呈逐年上升的趋势，说明了越来越多的大学毕业生不计个人得失，争当人民公仆，渴望能更好地为人民服务。”
　　你信咩？“人民”后边加多一个字，我就信喇。“三年清知府，十万雪花银”，听过未？
　　返转头讲，孔Sir虽然自己一生都“至于谷”，亦都支持、鼓励佢嘅学生要“至于谷”，但系依然认为，“不至于谷”，系一种“不易得”嘅美德。因为，学习本身，就已经系一种人生价值嘅体现。孔Sir最钟意嘅学生颜回，就系一个“以学为乐”嘅模范生嚟嘎。
　　想做官唔系坏事，想发达亦都唔系坏事，但系，想通过做官嚟发达，就系“史上最坏嘅事”。因为，“做官就可以发达”嘅历史，延续多一日，人民就痛苦多一日。 

　　【译文】孔子话：“如果有人具备咗好似周公咁巴闭嘅才能，但系又骄傲又悭皮，剩低嗰啲，就冇咩值得睇嘅喇。”

　　【栋笃】嗱，孔Sir又赞佢偶像周公喇，不愧系一个忠实嘅“粥粉”（周公嘅粉丝）嚟嘎。
　　不过，今次孔Sir嘅赞，系为咗弹。弹咩人？就系嗰啲“骄且吝”嘅人喇。周公旦，我讲咗好多次，佢系周文王嘅仔，周武王嘅细佬。武王伐纣嘅时候，周公尽力撑佢，开创咗周朝八百年基业。武王揸住碌棍做咗话事人，周公继续撑落去。后尾武王瓜咗，周公系有机会做话事人嘅，因为当时嘅王位有“兄终弟及”嘅不成文规定。但系，周公选择咗继续做“二把手”，为武王嘅仔成王“摄政”，重制礼作乐，帮成王将天下打理得妥妥帖帖，令到西周成为咗孔Sir心目中嘅“终极理想国”。
　　周公才华爆棚，梗系唔使讲喇。但系，孔Sir最妥佢嘅，系佢谦逊同埋心怀宽广嘅美德：周公曾经自己讲过，佢“一沐三握发，一饭三吐哺，犹恐失天下之贤”。咩意思？嗰时嘅人，话之男定女，头发都系好长嘎，周公喺冲凉嘅时候，有人嚟自荐，佢即刻揸住湿纳纳嘅头发，从浴室度出来接见，搞掂之后再入去冲过；食饭嘅时候都系噉，佢几次将嚟唔切吞落去嘅肉吐出来，出去接见咗贤人，再继续食饭。佢噉做嘅目的，就系惊错失咗天下嘅叻人。
　　周公呢两种美德嘅反面，就系“骄且吝”喇。所以孔Sir先至噉话，如果一个人又骄傲又悭皮嘅话，就算佢同周公一样咁叻，都冇咩巴闭嘎啫。
　　但系，人性呢味嘢，真系好难讲。人叻，就容易骄傲；人一骄傲，就容易小气、悭皮，心胸窄。朱熹系噉讲嘎：“骄者吝之枝叶，吝者骄之本根。故尝验之天下之人，未有骄而不吝，吝而不骄者也。”即系话，自骄嘅人肯定悭皮，悭皮嘅人肯定自骄，就好似树根同树枝一样。能够“才美而不骄吝”嘅人，真系少之又少。
　　普通人系噉，好似周公噉样“一人之下，万人之上”嘅人，重可以保持谦逊、慷慨嘅美德，就更加系国宝喇。而家，咪话咩厅部级高官，就算系一个镇长、一个村官，喺老百姓面前，嗰份趾高气扬，我哋都见怪不怪喇，“市长是你想见就能见的吗”？呢句说话，相信大家耳熟能详。讲到悭，好多官员，确实系够悭嘎喇——当然，唔系佢哋自己嘅钱，就一啲都唔悭，一餐饭就可以畀一个农民食足一年喇。噉佢哋系点悭嘎？重使讲咩，睇下佢哋系点拖欠教师工资咪得啰……咔咔。

　　【译文】疾，憎恨噉解。
　　孔子话：“钟意勇敢又至憎贫穷嘅人，就容易作乱。对于冇仁德嘅人，社会过分憎佢，佢亦容易作乱。”

　　【栋笃】本来，“疾贫”系人嘅天性。除咗嗰啲为终极理想而选择苦修嘅宗教人士，几乎所有嘅人，都想发达，想过上富足嘅日子。“好勇”，本来亦系人类嘅天性，因为呢啲系生存嘅必要——原始人如果唔够勇，点可能喺恶劣嘅自然环境中生存落嚟？所以，“勇敢”呢个词，不嬲都系一个褒义词嚟嘎。但系，点解“好勇疾贫”就会作乱呢？
　　其实，孔Sir嘅逻辑好容易理解：一个唔怕死嘅穷人，实会通过暴力手段去解决生活问题。噉样嘅人越多，社会就会乱晒大龙喇。
　　孔Sir嘅话，听起身好似有道理，但系，再谂多阵，我哋就会发现问题喇：穷人勇敢去改变生活，创造幸福，就一定要“乱”咩？历史上好多造反嘅穷人，佢哋嘅勇敢、唔怕死，系天生嘅咩？如果唔系，究竟系咩引致呢啲本来守本分嘅人民连命都唔要呢？
　　答案好简单，就系：官逼民乱。贫穷唔系“乱”嘅根源，社会分配不公先至系。俗语有讲，有头发边个想做癞痢？喺一个公平竞争、机会均等嘅社会入边，就算有穷人想“乱”，绝大部分人都唔会跟风嘅。
　　噉样谂就清楚喇，孔Sir呢一句说话，其实亦都系同啲统治者讲嘅。但系，通过以上分析，我就觉得佢讲少咗两个字，应该噉讲至啱：“好勇疾贫，不平则乱。”
　　唔单止官会逼民乱，民亦都会逼民乱。点样“逼”？就系“疾之已甚”喇。对一个不仁之人，社会过分憎佢、孤立佢、疏离佢，就会将佢逼上绝路。所以，点样对待身边一啲品行不端嘅人，点样对待刑满释放嘅人员，永远都系全社会需要注意嘅问题。咪唔记得，马加爵杀人，其中有一个原因，就系佢因为少少“不仁”嘅行为，就畀啲同学“疾之已甚”，先至决定报复杀人嘎。重有，唔少“二进宫”嘅违法犯罪分子，都系因为出狱之后，喺社会上边畀人“疾之已甚”，社会唔肯畀条路行，先至会再次犯罪嘎。
　　总之一句话：要想有一个真正和谐嘅社会，从根本上解决分配不公嘅问题，先至系治本之道。  （插图：老饼）

　　【原文】子曰：“民可使由之，不可使知之。”

　　【译文】孔子话：“老百姓识得喺执政者嘅指挥下点做就得喇，唔可以畀佢哋知道点解要噉做。”

　　【栋笃】于丹老师关于《论语》嘅讲座同埋书，小弟我不嬲都未睇过。但系，佢有一句说话我系听过嘅，佢话：“论语真正的道理，就是告诉大家：怎么样才能过上我们心灵所需要的那种快乐的生活。”因为呢句话，佢嘅“心得”畀人叫做“心灵鸡汤”；同样亦因为呢句话，佢嘅“心得”引嚟好多人嘅质疑：《论语》入边，“修身、齐家”嘅内容固然唔少，但系，教人点求官、点执政、点统治百姓嘅“治国、平天下”部分，所占比例亦都唔少，边系“过上我们心灵所需要的那种快乐的生活”啊？
　　其实我谂，于老师讲嘅，亦都系啱嘅——关键系，佢嗰句话入边嘅“大家”、“我们”讲嘅系咩人。小弟斗胆以小人之心度于老师君子之腹，替佢解释下：“论语真正的道理，就是告诉统治者：怎么样才能过上他们心灵所需要的那种快乐的生活。”
　　唔系咩？《论语》嘅中心就一个字：仁。开篇第二句语录，孔Sir就讲过“孝悌系为仁之本”，而孝悌嘅人，“好犯上者鲜矣，不好犯上，而好作乱者，未之有也”。人人都有咗“仁心”嘅时候，就冇人作乱喇，统治者再按照孔Sir嘅“既定方针”去“办”，就一天光晒，天下太平喇，啲统治者高枕无忧，梗系可以过上“心灵所需要的那种快乐的生活”喇。宋朝嘅宰相赵普话斋：“半部论语治天下”吖嘛。
　　咩？我断章取义？于老师就冇断章取义咩？
　　你睇今日呢句“臭名昭著”嘅说话：“民可使由之，不可使知之。”孔Sir教路，听清未：老百姓啊，生生性性噉听听话话，识得点做就得喇，千祈冇畀佢哋知道点解要噉做啊。嗱，我系你哋嘅北斗星，叫你去东你冇去西；我系你哋嘅父母官，见到我要即刻跪低——点解？边有咁多“点解”啊？照Do就系喇。
　　真系好毒啊呢句话！噉样嘅理论，你话边个统治者唔受落啊？唔怪得要“罢黜百家，独尊儒术”喇，今时今日，重有人要“复兴儒教”添，咩居心吖你话。
　　当然喇，对历史人物“观其言，察其行”，要摆喺嗰个历史背景去睇，唔好用今日普世追求民主嘅时代眼光去闹孔Sir。有人替孔Sir辩护过，话当时普通老百姓嘅教育水平都好低，一啲文化知识都冇，咪话咩“民主素质”喇。统治老百姓嘅，都系当时嘅“精英人物”，国家由佢哋主宰先至有“行政效率”；喺通讯、传媒基本为零嘅条件下，如果事事都要老百姓知道点解先至去做，咪话实际上冇可能，就算嘥晒时间去做，亦都好可能因为百姓意见唔统一而搞到成个国家乱晒大龙。而孔Sir呢，佢系噉讲，但系又一边普及教育，“有教无类”，令到更多人可以学到文化知识，改变呢种“民可使不可知”嘅局面。康有为甚至认为，呢句话应该系噉读：“民可，使由之；不可，使知之。”对于行政命令，老百姓能够理解，就去执行；唔能够理解，就教育佢哋直到能够理解为止。噉讲嘅话，孔Sir直情就系“史上最早的民主斗士”了。你信咩？横掂我系“打死都不信”嘅。
　　时间过咗两千年，“民主是个好东西”已经成为普世价值观。但系，明嘅又好，暗嘅又好，世界上重有几多个国家重推行紧“民可使由之，不可使知之”嘅愚民政策，大家自己擘大对眼去睇喇。最后，以一首旧歌MTV嚟结束今日嘅学习——佢就系崔健嘅《一块红布》：那天是你用一块红布/蒙住我双眼也蒙住了天/你问我看见了什么/我说我看见了幸福/这个感觉真让我舒服/它让我忘掉我没地儿住/你问我还要去何方/我说要上你的路/看不见你也看不见路/我的手也被你攥住/你问我在想什么/我说我要你做主……    （插图：老饼）

　　【原文】子曰：“兴于诗，立于礼，成于乐。”

　　【译文】孔子话：“诗歌可以激发人嘅意志，礼制可以使人喺社会上自立，音乐可以成就完美嘅人格。”

　　【栋笃】好喇，孔Sir按新《劳动法》嘅规定，休足五个工作日嘅年假，由班委中嘅“宣传委员”曾子顶班讲咗成个礼拜课，而家佢老人家休完假返嚟，企返自己嘅讲台——听佢讲下咩先：
　　“兴于诗，立于礼，成于乐。”喺所有嘅文字之中，诗对人嘅影响系最直接、见效最快嘅，亦最容易使人产生激情，令人意志飞扬。比如，读咗“窈窕淑女，君子好逑”，边个唔想拍一次咁浪漫嘅拖啊？读咗“硕鼠硕鼠，无食我黍”，边个唔会憎死啲贪官污吏啊？所以，诗可以引发人格精神嘅启动。
　　但系，诗又系比较感性嘅，如果控制唔好，佢引发嘅冲动，会令人变成“愤青”，喐下就激情飞扬，诗兴大发，浪漫超越现实，一啲理性都冇，噉样，对人对己，都系唔好嘎。噉靠咩嚟控制呢？梗系礼喇。关于礼，同埋礼嘅作用，其实前面已经讲过多次喇。有咗礼嘅控制、规范，人先至可以喺社会上立足。
　　一个知书识礼嘅人，系咪人格魅力就冇得顶呢？噉又唔系，人格嘅完美，重系离唔开一样嘢——音乐。大家都知喇，音乐可以“养人之性情”，系真正嘅“心灵鸡汤”。孔Sir不嬲都好重视音乐，佢自己唱得、弹得，重系史上最早嘅乐评人，佢喺齐国听到咗美妙嘅韶乐，甚至“三月不知肉味”。如果人人都好似佢噉，人格精神，就可以得到完善喇。
　　孔Sir嘅出发点系好嘅。噉点解到咗而家，好多人一听到“儒家思想”，个脑里边，除咗礼，重系礼呢？诗、乐去咗边呢？要怪，就怪孔Sir身后嗰啲一代又一代嘅“宣传委员”喇。佢哋认为，诗歌、音乐会乱人性，人，只要能够做到“克己复礼”，就已经好完美喇。
　　不过孔Sir自己亦都讲过，唔系咩音乐都系“尽善尽美”嘎。而家嘅教育识得重视音乐，系啱嘅，但系如果音乐教育入边一定要加入“唔善唔美”嘅“革命样板戏”，要啲细路哥日日唱咩“血债要用血来偿”，噉样嘅“成于乐”，重不如“不成”好过。咔咔。    （插图：老饼）

　　【译文】士，亦叫士人，系最低级嘅贵族阶层，一般都系做卿大夫嘅家臣，喺度可以理解为知识分子。
　　曾子话：“做士人嘅，唔可以冇咗远大嘅志向同埋坚强嘅意志，因为士人责任重大、前路遥远：佢哋以推行仁德作为自己嘅社会责任，重唔够重咩？佢哋嘅奋斗直到死先至停止，重唔够远咩？”

　　【栋笃】哇，巴闭啊，曾子呢句说话，直情就系成部《论语》入边最最最——最咩嘅豪言壮语嚟嘎！孔Sir都唔够僵咁讲啊。曾子呢个人，天生就系思想工作者。我哋前面学习过佢嘅几句说话，规规矩矩，战战兢兢，永远正确，要同啲大人物讲几句说话重要临死先敢讲出嚟，估唔到，佢会讲出咁壮烈嘅说话。
　　“士不可以不弘毅，任重而道远：仁以为己任，不亦重乎？死而后已，不亦远乎？”用革命时期嘅语言嚟翻译，就系：“革命战士不能没有远大的志向和坚强的意志，因为我们任重道远：我们将传播革命思想作为自己的使命，难道还不够重吗？我们将为全人类的解放事业奋斗到最后一刻，难道还不够远吗？”点听，都有一种“语录”嘅味道。套上京剧嘅“二黄导板”，又系一首《甘洒热血写春秋》，重可以进入中小学课堂，叫啲学生早晚各唱三次。
　　好彩，曾子唔系周王朝教育部嘅官员，我哋而家先至知道春秋时期重有道家、墨家、法家等等“百家争鸣”。冇错，“仁以为己任”，你可以噉认为，但你唔可以夹硬去推行，你要畀人哋拣至啱吖嘛。最衰就系嗰个汉武帝喇，搞咩“罢黜百家，独尊儒术”，令到儒家思想一家独大，统治咗中国千几年，最后嘅结果，就系中国文化成咗一只大“酱缸”，喐都唔喐，自大自臭，点同人哋竞争啊？
　　所以，曾子嘅话虽然讲得好，但我哋任何时候都要警惕“以为己任”变成咗“唯我独尊”。新闻可以争取“独家”，但历史证明，任何一种思想，点伟大、点正确，都唔可以“独家”。唔系嘅话，对人类嚟讲，就系一种“思想雪灾”。所以，现代嘅士，同样“不可以不弘毅，任重而道远”，不过，系“自由以为己任”，将推行思想自由作为自己嘅使命，死而后已，先至系有价值嘎。

　　【译文】曾子话：“可以将细细个嘅国君委托畀佢，可以将国政交付畀佢，喺重大危机来临嗰阵，又唔会改变大节——噉样嘅人，系君子咩？冇错，绝对系君子嚟嘎。”

　　【栋笃】读过《三国演义》，返转头再学习曾子呢句话，大家同我可能都觉得：曾子嘅话，直情就系一句预言。预咩言？咪就系诸葛亮啰。
　　公元223年，喺彝陵之战中畀东吴嘅陆逊击败，心力交猝嘅刘备，喺白帝城病死咗。临终之前，佢将诸葛亮叫埋床边，就话：“先生嘅才能一定能够完成统一大业。我个仔刘禅好软弱，先生，如果你觉得帮得，就帮喇，帮唔到，就取代佢算啦。”诸葛亮听咗，成身软晒，喊住噉话：“臣点敢唔尽力辅佐后主，以尽忠贞之节，死而后已呢！”刘备死咗之后，刘禅（阿斗）即位，诸葛亮“受命以来，夙夜忧叹，恐托付不效，以伤先帝之明”（《出师表》），殚精竭虑辅佐阿斗，真正做到“鞠躬尽瘁、死而后已”，留畀后人一个铮铮君子嘅形象。
　　其实当时嘅形势，阿斗系出咗名嘅“烂泥扶唔上壁”，就算诸葛亮取而代之，都好少人会讲三讲四。不过佢冇噉做，就系唔想自己嘅“大节”有咩亏损，因为君权时代嘅所谓“大节”，就系“君君臣臣”、“君为臣纲”等等，无论啲帝王点烂都好，做臣子嘅，只有规劝（甚至死谏）、为佢执手尾先至系守本分。如果取而代之，就系乱臣贼子。
　　不过史上最出名嘅托孤故仔，重系“程婴救孤”。呢个故仔发生喺曾子百年之后嘅晋景公时期，程婴为咗救畀奸臣冚家富贵嘅赵氏遗孤，将自己个仔条命都献咗出去。相信大家都好熟呢个古仔喇，我就费事讲多次。
　　托六尺之孤、寄百里之命，民主时代，冇可能再发生噉嘅事。不过，我哋而家可以理解为“受人之托，忠人之事”，就系一种人人都可以做到嘅操守。讲到“临大节而不可夺”，亦都系“国败见忠奸”嘅事，升斗小民，平时能够做到“小节不亏”，都算系君子嚟喇。

　　【译文】曾子话：“有能力嘅人向冇能力嘅人请教，学问多嘅人向学问少嘅人请教，有知识但睇起身好似冇知识，个脑充实但睇起身好似好空虚，畀人侵犯咗都唔同人计较——以前我有一个朋友就系噉样做。”

　　【栋笃】其实曾子嘅说话，前四句，都冇咩新意，同佢老师孔Sir嗰句“三人者，必有我师焉”差唔多，讲嘅都系做人要谦虚嘅意思。不过我哋亦都学过，孔Sir又讲过一句“知之为知之，不知为不知，是知也”，不懂装懂，当然唔好；谦虚过咗龙，就系虚伪，懂装不懂，一样系扮嘢啫。当然，对曾子呢一句说话，我哋唔可以咁机械去理解，佢嘅意思，亦都系孔Sir嘅“择其善而从之”，即系话，只要你能够发现，“不能”、“寡”嘅人，都系有嘢值得“能”、“多”嘅人学习嘅。
　　值得讲多几句嘅系“犯而不校”。畀人侵犯咗，就唔同人计较，呢种态度，儒家认为系美德，呢种睇法，再夸张啲，就系耶稣嗰句“有人打你右脸，连左脸也转过来给他打”喇。有大悲心嘅宗教人物可能做得到，要我哋普通人噉做……嘿嘿，听听宋朝嘅林逋系点讲嘎：“为善易，避为善之名难；不犯人易，犯而不校难。”毛泽东亦都话过：“人不犯我，我不犯人；人若犯我，我必犯人。”私底下认为，呢种态度，先至系我哋现代人要把握嘅。我哋唔可以主动去侵犯人哋，但系，人哋无端端侵犯咗我哋，我哋默默咁忍受，咪益咗啲坏人？
　　所以，现代嘅法律，有“正当防卫”呢一条文，即系话，“犯而可校”，喺法理上边，亦都系成立嘎。

　　【译文】曾子病咗，孟敬子去探佢。曾子就同佢讲：“雀仔就嚟死嘅时候，叫声系好惨嘎；人要死嗰阵，讲嘅嘢系充满善意嘎。掌权嘅人要重视嘅礼仪之道，有以下呢三个方面：个样够威，就可以避免人哋对你粗暴或者睇你唔起；面色要端庄，人哋先至会诚信待你；讲说话要注意语言艺术，就唔使受到人哋嘅恶顶。至于祭礼上边嗰啲酒食等等嘅具体安排，交畀专门负责嘅手下去做就得喇。”

　　【栋笃】人之将死，其言也善。呢句话，大家都好熟嘎喇。但系，点解会噉呢？原来，曾子嘅意思：人嘅死，其实向自然嘅回归，所谓“赤条条来去无牵挂”，喺呢个时候，所有嘅身外之物、利益纷争，一切都会抛低，所以，讲出嚟嘅嘢，点可能对人有恶意呢？
　　孟敬子，系鲁国嘅大夫，手握实权嘅人。曾子继承咗老师孔子嘅从政理念。佢嘅人生意义就系同啲统治者度桥，点样治国先至会恢复返礼立乐兴嘅西周盛世。曾子嘅遭遇，应该同佢老师差唔多：平时讲嘢，冇几个人听；就算有人听，都冇几个会照住做。今次，借住孟敬子嚟探佢呢个最后机会，曾子死都要同佢进言：嗱，你“不看生面看死面”，我就嚟死喇，听我一次喇！
　　呢啲儒家“先贤”真系阴公啊，咩叫死牛一便颈，咪就系噉啰。
　　但系，曾子呢种善，系献畀“君子”嘅——呢度嘅君子，唔系道德层面嘅，而系有社会地位、掌握实权嘅人。佢希望呢啲“君子”喺日常礼仪中注意仪表仪容、言谈举止，目的系咩？“远暴慢”、“近信”、“远鄙倍”——一句讲晒，就系阿孔Sir教过季康子点样先可以“使民敬、忠以劝”（2·20）嗰个目的喇。曾子真系好善良，佢认为，“君子”重视呢三点就得，至于“笾（国、粤音同“边”，竹编嘅礼器）豆之事”，交畀下边嘅人去做就得喇。
　　善就善喇，效果“良”唔良呢，就只有天知道喇。不过，春秋之后两千几年，中国嘅“君子”们，喺摆官架子、耍官威见面，倒系做到十足喇。

　　【译文】曾子得咗重病，叫啲学生埋嚟，就话：“揭开被睇下我嘅脚、睇下我嘅手！《诗经》上边讲：‘战战兢兢，如临深渊，如履薄冰。’从今以后，我知我再唔使咁担心喇，僆仔！”

　　【栋笃】几个月前，喺南京溧水，中建五局嘅工地，因为讨薪嘅纠纷，带工头何成波畀欠薪方雇嘅一帮凶手砍咗两刀，后嚟仲畀人拖走咗。另一个带工头王超就同啲打工仔跟埋去打探情况。点知，凶手见有人跟过嚟，拎起大刀就喺王超个头度劈落去。王超嘅左手一挡——从手腕开始，成只手畀人斩咗落嚟……
　　到目前为止，有关方面对呢件事嘅处理，总算令人感到些少嘅安慰。但系，王超嘅遭遇，绝对唔系“极个别”嘅案例。一到年尾，我哋周不时都可以听到，打工仔辛苦成年，讨薪未果反而被打。仲有，除咗噉恶性嘅人为案件之外，畀机器切咗手指嘅工人仲有几多？据报道，第啲地方唔讲，就喺珠三角，一年，就有超过四万只手指畀机器切断！
　　“身体发肤，受之父母，不敢毁伤。”呢句，系《孝经》上边嘅话。意思系，我哋周身嘅每一个器官、皮肤、毛发，冚棒唥都系父母畀我哋嘎，我哋唔可以令佢哋受到伤害，否则就系不孝。古人一世都好注意呢一点，因为古代有斩手斩脚、割鼻哥、甚至阉割嘅酷刑。一个人，如果犯咗法，畀人斩咗手或脚，除咗身体痛苦之外，仲要孭多一个“不孝”嘅罪名。所以，孔Sir嘅学生曾参临终之前，特别要佢嘅学生睇下，自己手足齐全，谂到成世人“战战兢兢，如临深渊，如履薄冰”噉保全自己嘅“身体发肤”，以后唔使再担心喇，曾子嘅万千感慨，确实令人唏嘘不已。
　　但系，今时今日嘅中国，有钱嘅人，成日都对自己嘅身体唔满意，于是乎嘥咗大把钱去“查漏补缺”，切割、挖、填——主动授受“整刑”。整咗之后，又成日惊呢度冧咗、嗰度漏水，好多嘢唔敢食，好多地方唔敢喐，过嘅系“战战兢兢，如临深渊，如履薄冰”嘅日子。冇钱嘅人，就好似王超噉，辛辛苦苦去揾两餐饱，又唔知几时会得罪咗老细，畀人斩手，或者几时一个唔觉，畀机器切咗手指——过嘅，都系“战战兢兢，如临深渊，如履薄冰”嘅生活。
　　但系，有钱人愿意“花钱找罪受”，我哋无谓喺度讲三讲四。我哋要问嘅系，穷人嘅呢种“战战兢兢”嘅生活，几时，先至可以讲声“吾知免夫”？

　　【原文】子曰：“恭而无礼则劳，慎而无礼则葸，勇而无礼则乱，直而无礼则绞。君子笃于亲，则民兴于仁；故旧不遗，则民不偷。”

　　【译文】葸（国xǐ 粤saai2徙）害怕、退缩嘅意思；绞，急切，引申为伤人；笃，忠实、深厚；遗，忘记、遗弃；偷，薄情寡义。
　　孔子话：“恭敬冇咗礼嘅节制，就会疲劳；谨慎冇咗礼嘅节制，就会畏缩；勇敢冇咗礼嘅节制，就会乱嚟；爽直冇咗礼嘅节制，就会伤人。“上边”嘅人如果能够对自己嘅亲人好啲，百姓就会好兴仁爱；唔遗弃自己嘅世交故友，百姓就唔会薄情寡义。”

　　【栋笃】一句好出名嘅说话，叫做“真理再向前一步，就是谬误”。恭敬、谨慎、勇敢、直率，系人嘅优秀品质，但系，呢啲品质如果一啲都唔加节制，就会“变质”喇。对人恭敬，做嘢小心，本嚟系件好事。但系，恭敬过咗头，唔分场合、唔分对象，自己就会好攰；小心谨慎过咗头，就会变得好细胆。最典型嘅形象，就系契诃夫嗰篇《小公务员之死》入边嘅主人公切尔维亚科夫，佢喺戏院入边唔小心打咗一个哈痴，喷到坐喺佢前边嘅将军，惊到咩噉，不停噉道歉。将军本来唔嬲，就畀佢一次又一次嘅道歉激嬲咗……最后，呢个小公务员，就系噉畀自己吓死咗。
　　同样，勇敢、直率过咗头，就会有作乱、伤人噉嘅情况，大家喺社会上见到好多，唔使我多嘴喇。
　　所以，呢啲“优秀品质”，都系需要加以节制嘎。用咩嚟节制？就系礼喇。我哋讲过好多次，礼，就系人嘅行为规范。所谓“礼节”，就系要靠礼嚟节制。
　　后边嗰句，应该系同啲统治者讲嘎。所谓“君子”，另一个意思就系达官贵人喇。官居上位嘅人，能够对自己嘅亲朋好友感情深厚，下边嘅百姓就会有样学样，亦都跟住讲仁义喇。不过要声明嘅系，呢度嘅“笃”同埋“不遗”，讲嘅只系喺感情上边，而唔系利益上边嘅照顾。唔系嘅话，啲做官嘅，就可以用呢句说话嚟为自己徇私舞弊做借口喇：“冇错，我系将块地批畀我个仔，我系令我老婆去做呢个企业嘅老总……我噉做，系照足孔子嘅教训嘎，‘君子笃于亲，则民兴于仁’吖嘛。”唔怪得依家好多当政者对“论语热”推波助澜喇，原来学论语系有咁多着数嘎。
　　睇嚟，我哋要运行《论语》嘅补丁程序喇。孔Sir话恭、慎、勇、直要靠礼嚟节制，噉做官嘅厚待自己人，要靠咩嚟节制？礼制？唔得嘎，梗系要“法制”至得喇：君子笃于亲，无法则徇私。
　　搞笑嘅系，我第一次睇到“故旧不遗，则民不偷”呢句嘅时候，望文生义，以为意思系“收好自己嘅旧财物，老百姓就唔会偷嘢”。不过，错有错解，对于近排沸沸扬扬嘅“许霆案”，呢句话，就令人唏嘘喇：“柜员机唔出错，许霆点会产生偷钱嘅动机啊！”    （插图：老饼）

　　【原文】子曰：“泰伯，其可谓至德也已矣。三以天下让，民无得而称焉。”

　　【译文】孔子话：“泰伯呢个人，可以讲系已经到咗道德嘅最高境界喇。佢三次将天下让畀人哋，老百姓竟然揾唔到一句话嚟赞佢。”

　　【栋笃】嗱，呢度又有一段古仔喇。话说当年，周朝嘅祖先周大王生咗三个仔：大佬叫做泰伯，二佬叫做仲雍，细佬叫做季历。本嚟，泰伯系大佬，佢老窦个位肯定要传畀佢喇。不过，当年周大王见到商朝嘅天下开始衰落，就谂住兴周灭商，但系泰伯觉得噉样做唔系几妥。当时，细佬季历生咗一个叻仔，就系姬昌喇。阿昌仔自细“德才兼备”，好得人惜，周大王就谂住要将个位传畀季历，第时可以再畀佢嘅乖孙姬昌。泰伯知道咗，粒声唔出，同二佬仲雍着草去咗吴国，仲易容咗（断发纹身），匿埋起嚟添。周大王就将个位传咗畀季历，后尾又传畀姬昌——就系嗰个畀纣王捉咗，一路坐监一路推演八卦嘅周文王喇。周文王后嚟将个位畀咗佢嘅仔姬发——就系周武王，跟住嘅事，大家就算未关注商周嘅历史，睇过《封神榜》都知得七七八八喇。
　　其实讲起身，泰伯噉做，究竟算系“以天下让”，定系争唔到揸fit人走佬都未知。但系，孔Sir不嬲都系一个“粥粉”（周朝的粉丝）嚟，姓姬嘅全家人都系佢偶像嚟嘎（特别系制礼作乐嘅周公，孔Sir发梦都想见到佢）。所以，佢就死都认为，泰伯系“三以天下让”，而且，噉样粒声唔出嘅让法，比尧舜之间高调嘅禅让，仲要“至德也已”。点解？就因为老百姓想赞佢，都唔知点赞。
　　老百姓唔知点赞有咩紧要？孔Sir识得点赞先至重要！“至德”啵，大佬，听过孔Sir赞人，未听过佢咁赞人。噉样讲，同阿庄子讲嘅“至德无德”差唔多意思，你话巴唔巴闭吖  
　　历史，就系不停噉畀人“笃”嚟“笃”去，我喺度“笃”多次，讲到尾，都系“一笃史”啫。不过，学咗呢一句，以后如果你坐公车唔好彩，个位畀个大只佬抢咗，你就可以静鸡鸡噉行开，企喺后门嗰度——呢个时候，你就会有“三以座位让”嘅崇高感，成车人嘅沉默，你都可以当正系大家正喺度默默咁赞你喇，咔咔。    （插图：老饼）

　　【译文】孔子嘅为人温和又严厉，有威严，但系一啲都唔恶；对人谦恭，又好安详。

　　【栋笃】呢几日，广州嘅中小学都放咗假。前几日，我去某中学开家长会，喺会上，有学校领导同啲家长喊苦喊屈：依家啲学生越嚟越难教，老师就越嚟越难揾食喇。管教唔严，学生唔听你说话，学风就坏，校风就乱，成绩就差——恶性循环之嘛。于是，家长会话：生不教，师之过。怪老师唔负责任。你管理严咗，又好难控制呢个度。依家啲学生哥都学精咗，咪话打佢，就系闹佢一句都唔得，喐下就话你触犯咗《未成年人保护法》，要报警或者乜乜乜，唉……总之一句话：宽又唔得，严又唔得。
　　呢个问题，好似两千几年前，孔Sir就做得好好。你睇下佢留喺学生心中嘅印象就知喇：温而厉，威而不猛，恭而安。温和，学生容易亲近你；严厉，学生会听你嘅说话；够威，学生唔敢乱嚟；唔恶，学生唔会憎你。噉做，其实都系一种中庸之道，把握好呢个度，想唔成为“邹鲁先进工作者”都难啊:)
　　失败嘅例子，近排大家睇新闻就知，广州某大学嘅一位博导，畀学生喺网上爆佢虐待学生，搞到公开道歉，当事嘅学生都唔滞。关于呢件事，我唔想多讲，但系我谂，依家嘅大学生，都系识得计得失利弊，“不到最后的关头，不会轻言战斗”嘎。嗰位博导，极之有可能，系“厉而不温”、“猛而无威”嘅老师。听讲佢系“生命科学学院”嘅博导，唔知有冇兴趣睇《论语》，有嘅话，读到呢一句，可能会有啲特别嘅感觉。
　　孔Sir“温而厉，威而不猛”，讲嘅系对学生，对“下边”啲人；讲到“恭而安”，就应该系对“上边”嘅。恭而安，我嘅理解，就系不卑不亢喇。对“上边”嘅人，恭，其实系一种礼。孔Sir虽然亦都批评过季氏等权贵，但主要系因为佢哋“越礼”，所以，佢同蔑视权贵嘅庄子有本质嘅唔同。不过，对“上边”嘅谦恭过咗头，就会变成谄媚——好彩，喺学生嘅印象中，孔Sir又能够保持自己嘅安详，不卑不亢。
　　值得讲多句嘅系，今时今日，我哋睇到嗰啲对下边嘅人“厉而不温”、“猛而无威”嘅人，对上边呢，就会“恭而媚”。唉，性格使然，冇偈喇。

　　【原文】子曰：“君子坦荡荡，小人长戚戚。”

　　【译文】孔子话：“君子个心坦荡荡，小人成日心悒悒。”

　　【栋笃】嗱，又系一句“座右铭”级嘅论语金句喇，仲系一对对仗工整嘅对联添。《论语》嘅魅力，有一部分，就系来自语言方面。
　　讲返呢一句说话。君子，道德高尚嘅人嚟嘎，所谓“心底无私天地宽”，讲嘅就系君子喇。心底无私，呢个“私”字，其实可以有两种理解：一系“私隐”，一系“私欲”。君子与人为善，唔会做啲害人嘅事，行为光明磊落，梗系冇嗰啲“不能说的秘密”喇；仲有，君子“无欲则刚”，知足常乐，好似阿颜回噉，梗系心怀宽广，坦坦荡荡喇。小人呢？同君子相反，与人为恶，成日谂嘅、做嘅，都系“不可告人”嘅嘢，个心点可能坦荡？仲有，小人一般都系私欲膨胀，永远都唔会满足，睇到人哋叻过佢、富过佢，佢就会妒忌、痛苦，噉样，点可能有坦荡嘅心怀？梗系成日心悒悒喇。
　　一句俗语，叫做“平生不做亏心事，半夜敲门也不惊”，讲嘅差唔多都系呢个道理。一个正常嘅社会，就系一个“君子坦荡荡，小人长戚戚”嘅社会，因为正气压倒邪气，小人就冇好日子过。相反，喺嗰啲黑暗嘅年代，邪气压倒正气，“马善畀人骑，人善畀人欺”，就变成咗“君子心悒悒，小人好得戚”。比如，离我哋唔系咁远嘅“文革”，就系一个是非颠倒嘅、善恶不分嘅年代，小人得志坦荡荡，君子遭殃长戚戚；“卑鄙是卑鄙者的通行证，高尚是高尚者的墓志铭”。好彩，嗰个时代已经过去，而且，听讲佢唔会返嚟。
　　仲有一个特殊嘅时代，既唔系“君子坦荡荡，小人长戚戚”，亦唔系“君子心悒悒，小人好得戚”，系咩呢？就系“真小人坦荡荡，伪君子长戚戚”。历史嘅变迁，会令到啲曾经得势嘅小人，唔单止唔忏悔，仲扮成一副君子嘅面目，成为咗新嘅“假道学”，以第啲方式继续害人。呢个时候，“伪君子横流，方显真小人本色”，真小人高呼“我是流氓我怕谁”，拒绝崇高，解构崇高，以“人格炸弹”嘅方式，同啲伪君子“同归于尽”。
　  上世纪最后廿年，就系一个噉样嘅特殊时代，有人称之为“历史转型期”。可惜，我仲未见到，呢个“转型期”转完嘅迹象。但愿，佢真系转到一个“君子坦荡荡，小人长戚戚”嘅崭新历史时期，而唔系转返嗰个“君子心悒悒，小人好得戚”嘅黑暗年代。咔咔。  （插图：老饼）

　　【译文】孙，通“逊”，谦逊嘅意思；固，书面解释系“固陋”，见闻少、不知变通噉解。
　　孔子话：“奢侈会令人骄纵，悭俭会令人固陋。与其骄纵，不如固陋。”

　　【栋笃】做一个心理测验先：一见到“宝马”呢两个字，你首先会谂起“好马”定系“名车”？答案系“名车”嘅人，跟住又会联想到乜嘢呢？我够胆估下：一见到“宝马”两个字，绝大部分人嘅第一感觉就系“名车”；跟住，又有绝大部分人，个脑里边会浮起“撞人”呢两个字。喺百度上边输入“宝马 撞人”，可以揾到相关网页，高达约263,000篇，再试下第啲车，相关网页，比“宝马”都少咗好多。
　　点解会噉？唔通宝马嘅性能差，容易出事？梗系唔系喇。如果将所有嘅车祸统计下，宝马撞人嘅概率，肯定系偏小嘎。“宝马撞人”有咁大嘅新闻效应，最主要嘅原因，系撞咗人之后，车主嘅表现，一般离唔开“霸道”、“蛮横”、“以势压人”呢啲贬义词。相信大家仲记得，04年嗰单轰动全国嘅“哈尔滨宝马撞人案”，就系最典型嘅案例。所以，网民心中都有一个疑问：“点解次次都系宝马？”
　　其实，孔Sir已经讲咗喇：奢则不逊。骄奢淫逸嘅人，好难保持谦虚、平和嘅心态，揸到宝马，就觉得路系自己嘅，边个“穷鬼”够胆阻住我，撞死白撞。话网民有仇富心态，真系噉嘅话，好大部分，都系啲“为富不仁”嘅人引起嘎。
　　相对过分奢侈嘅生活，孤寒嘅人，就容易导致见识少、固执、唔知变通。因为佢哋唔舍得出去使钱，成日守住自己嘅屋企、自己嘅财产，自然就会固执己见、与世隔绝。噉样嘅生活态度，都系唔得嘎。
　　但系，古语有讲喇，“两害相权取其轻”。“奢”嘅人，佢嘅“不逊”，会害人；“俭”嘅人，佢嘅“固”，害嘅主要系自己——害人同埋害己，梗系“害人”嘅社会危害性大啲喇。所以孔Sir话：“与其不孙也，宁固。”认真有理。

　　【译文】孔子病咗，仲病得好重。子路请求为孔子去求神保佑。孔子话：“有噉嘅事咩？”子路答佢话：“有啊。《诔》上边讲咗喇：‘为你求天地神鬼保佑。’”孔子话：“噉我一早就求过神喇。”

　　【栋笃】孔Sir对鬼神嘅态度，喺第六章入边已经声明咗，就系“敬而远之”喇（6·22）。世间究竟有冇鬼神呢？孔Sir从未答过呢个问题，佢只系话过，要“敬”——敬，系一种态度。所谓嘅鬼神，不外乎两种：一系天地山川之神，一系祖先嘅“在天之灵”。对天地神祇嘅“敬”，表达嘅系对大自然嘅敬畏；对祖先嘅“敬”，表达嘅系“慎终追远”嘅孝道。呢种态度，系通过祭拜活动嚟表达嘎。喺孔Sir心目中，嗰种祭拜，系属于“礼”嘅问题，同迷信冇关系，亦都冇咩功利性目的。
　　但系，唔单止春秋时期，就算到今时今日，唔少人去求神拜佛，都系有明确目的嘎：话之你系边路神仙，总之你食咗我嘅饭，袋咗我嘅钱，我有咩事，你就要同我搞掂。唔系嘅话，你以后唔使旨意我会再嚟求你——嗱，噉系咪同“求官”一样啊？呢种祭拜，已经变成咗贿赂——呢种贿赂，就叫做“祷”。神佛如果真系有灵，收咗你嘅钱就同你办事，噉就系“神权寻租”嘅行为，佢就唔惊畀天庭“双规”咩？
　　作为学生，子路关心老师嘅病，要为佢去求神保佑，呢种行为系可以理解嘅（梗系喇，如果系嗰种虐待学生嘅“博导”，佢病咗，学生会点样去“祷”，噉就好难讲喇）。但系，作为老师嘅孔Sir，虽然病得好重，但都唔会赞同“求神”呢种“失去理智”嘅行为。子路要“请祷”，孔Sir问嘅“有噉嘅事咩”，意思其实系：有病去求神，病就会好返——现实中有噉嘅事咩？子路仲以为孔Sir系问佢，有冇咩书或者文献写过，学生可以同老师求神，即刻就话有，《诔》呢篇祭文上边就写咗。呢个时候，孔Sir亦唔会批评佢，而系照佢嘅思路，巧妙噉教育佢：“噉讲嘅话，我求神求咗好耐喇。”咩意思？即系话，我平时都系有参加各种祭拜活动嘎，如果噉做有用嘅话，我依家仲点会病得咁重啊？
　　其实孔Sir唔求鬼神，好大一个原因，系佢信“天命”——“五十而知天命”。所谓“谋事在人，成事在天”，生死自有天定，使乜求神啊？有人讲噉样更加迷信嘞，而且仲系悲观嘅迷信添。其实，一个人，佢知道咗天命嘅不可违，就会更加珍惜生命、珍惜时间，尽力喺有生之年去做好一啲应该做嘅事，噉样唔系更乐观咩？
　　病得咁重，仲一有机会就教育学生，呢种精神，认真抵赞。

　　【原文】子曰：“文，莫吾犹人也。躬行君子，则吾未之有得。”
　　子曰：“若圣与仁，则吾岂敢？抑为之不厌，诲人不倦，则可谓云尔已矣。”公西华曰：“正唯弟子不能学也。”

　　【译文】孔子话：“喺文献知识方面，我勉勉强强都可以话同人哋差唔多。讲到努力实践去做一个君子，我就仲未够班喇。”
　　孔子话：“讲到圣同埋仁，我点敢当啊？不过讲到学习从来未厌过，教诲人从来未觉得攰嘅话，就可以话我系噉喇。”公西华话：“呢啲正系我哋啲同学做唔到嘎。”

　　【栋笃】1966年7月8日，毛泽东喺一封写畀江青嘅信里边系噉话：“我历来不相信，我那几本小书，有那样大的神通。现在经他一吹，全党全国都吹起来了，真是王婆卖瓜，自卖自夸。”呢句话入边嘅“他”，系指林彪。呢封信，经常畀啲人攞嚟作为毛本人谦虚、反对个人崇拜嘅例证之一。但系，到咗1969年，毛泽东回答美国记者斯诺嘅时候，就噉话：“你说我个人崇拜，你们美国人个人崇拜多呢！人总要有人崇拜嘛！”
　　讲孔Sir嘅语录，点解又讲到曾经将孔Sir打倒嘅毛泽东呢？其实系因为，呢两位古今大人物，喺对待对自己嘅个人崇拜嘅时候，心理其实系差唔多嘎。上一Part我哋讲到朱熹佢哋擦孔Sir嘅鞋，其实就好似林彪擦毛泽东嘅鞋，有佢自己嘅个人目的喺度。孔Sir自己呢？梗系谦虚喇，嗱，佢话噃：“文化知识我就同人哋差唔多，做君子就唔得，做圣人同埋仁人，就更加唔使讲喇。我只不过系学之不厌、诲人不倦啫。”佢谦虚成噉，公西华都要擦佢嘅鞋话：“呢啲都系我哋做唔到嘎！”真系做唔到咩？愿唔愿意做啫。
　　其实，就好似毛泽东一样，孔Sir，都有野心膨胀嘅时候嘎。第啲唔讲，佢亦都同阿子路吹过：“如有用我者，吾其为东周乎。”（《阳货第十七》）边个能够用我，我就能够帮佢喺东方建立一个新嘅周王朝！”春秋五霸都做唔到啊阿Sir，你估复兴周室咁容易咩？
　　用毛泽东自己嘅话嚟讲，就系：“人偶尔谦虚一次并不难，难的是一辈子只是谦虚，不会骄傲。”  （插图：老饼）

　　【原文】子与人歌而善，必使反之，而后和之。

　　【译文】孔子同人哋唱歌，如果觉得人哋唱得好，佢就要求人哋唱多次，然后就跟住一齐唱。

　　【栋笃】撞到一句噉嘅说话，我笃喺度，真系唔知噏乜好。孔Sir同班老友去唱K，如果听到一个唱得好嘅，佢就要求嗰个人唱多次畀佢听，然后就跟住学唱——一件豆腐润咁大嘅事，纯粹就系孔Sir嘅日常小事嚟，我真系谂极都唔明，使乜记低喺“儒家圣经”入边畀后人学习啊？我同啲Friend去唱K都系噉嘎啦。
　　仲记得喺几廿年前，喺嗰个“全民造神”嘅年代，最兴嘅就系“拔高”呢一招。只要系政治宣传嘅需要，“英雄人物”讲嘅嘢、做嘅嘢，几普通都好，都可以提炼出“意义”，畀全国人民学习。呢种“优良传统”，同儒家其实系关系密切嘎。比如，孔Sir唱K呢件事，朱熹就系噉擦鞋嘎：“此见圣人气象从容，诚意恳至，而其谦逊审密，不掩人善又如此。盖一事之微，而众善之集，有不可胜既者焉。”即系话，从呢件事，就睇得出孔圣人既有大家风范，又够虚心谦逊，唔会将人哋叻过佢嘅地方冚住晒！（等阵先，我睇下我心口度仲有冇位写多个“服”字……）用依家中小学语文老师教学生“概括中心思想”嘅方法，就应该系噉嘅：“这件事反映了孔子热爱音乐、好学、知礼的优秀品质。”
　　讲下笑啫。其实呢单嘢同阿朱熹拉埋一齐讲，仲要闹多佢几句添。点解？喺孔Sir嘅儒家思想体系之中，礼、乐系同等重要嘎，佢心目中嘅理想社会，就系一个礼立乐兴嘅和谐社会。佢中意音乐，听到好嘅歌，就要学，甚至乎“三月不知肉味”，梗系一啲都唔出奇喇。但系，到咗孟子，就好少倾到音乐喇，再到朱熹为代表嘅“宋明理学”时代，就更加“执礼甚严”添——一方面，将孔Sir呢个“爱乐”嘅习惯“拔高”到“一事之微，而众善之集”；另一方面，又将音乐“付之于优伶狎客”，“遂令中国废歌，此程、朱之过也”（康有为语）。
　　照噉睇嚟，上嗰排啲嘈喧巴闭话要封杀“恶俗”网络歌曲嘅“艺术家”，就似足啲“理学家”喇，咔咔。  （插图：老饼）

　　【译文】陈司败：陈国嘅司败（官名，即司寇）；昭公：鲁国嘅国君；巫马期：孔子嘅学生；党：偏私噉解。
　　陈国嘅司败问孔子：“鲁昭公识唔识礼啊？”孔子就话嘞：“识嘅。”孔子离开之后，陈司败向巫马期拱手行礼，仲行近一步话：“我听讲君子系唔会偏私嘎，今日睇嚟，唔通君子亦都会偏私？鲁昭公娶咗吴女做老婆，吴、鲁两国系同姓噃，所以就叫佢做吴孟子。昭公噉做，如果话佢识礼嘅话，噉边个唔识礼啊！”巫马期就将陈司败嘅说话讲畀孔子知，孔子话：“我都算幸运喇，一旦有啲咩错误，人哋就会知道。”

　　【栋笃】嗱，又系一件八卦嘢嚟嘞：鲁国系周公之后，吴国系周公嘅叔公泰伯之后，所以两国都姓“姬”。春秋时候，国君夫人嘅称号，一般系佢祖国嘅国名再加上本姓，即系话，鲁昭公娶嘅嗰个吴女，应该叫“吴姬”。但系，因为昭公都姓“姬”，嗰时同姓又唔可以结婚，为咗唔畀人讲三讲四，就将昭公夫人嘅名改叫“吴孟子”。其实噉样做呢，只不过系欲盖弥彰嘅啫——点可能改咗名人哋就唔讲啊？仲畀多咗料人哋唱添。
　　陈国嘅嗰位司败，就系不怀好意噉嚟问阿孔Sir呢个问题嘎。佢好古惑，一开始就冇直接问孔Sir对呢件事嘅睇法，而系设咗一个陷阱，等阿孔Sir钻入去。“昭公知礼乎？”孔Sir只有一个答案：“知礼。”点解？因为做臣子嘅，唔可以话国君失礼，噉都系一种“礼”。孔Sir可以话本国嘅三家大夫失礼、话齐国嘅管仲“管氏而知礼，孰不知礼”，佢肯定唔够胆讲自己嘅国君唔识礼。以孔Sir嘅才智，佢唔可能唔知陈司败要噏乜，但系佢别无选择：家丑不外扬，就算“外扬”咗，作为“家人”，亦唔可以喺外人面前讲三讲四。
　　陈国嘅呢个司败，虽然问话嘅动机不纯，都已经系畀咗孔Sir少少面喇：冇当面反问孔Sir（不过亦可能孔Sir答完之后即刻走咗，唔畀佢机会），而系喺孔Sir嘅学生面前讲佢嘅是非。孔Sir听到学生转述嘅话，亦都唔肯正面承认昭公的确系失礼，而系承认自己错咗，而且，仲觉得自己好幸运，一有错，人哋就会指出嚟。
　　噉样为国君遮丑、擦鞋，真系心口要写个“服”字嘞。

　　【原文】子曰：“仁远乎哉？我欲仁，斯仁至矣！”

　　【译文】孔子话：“仁德距离我哋好远咩？我想要仁，仁即刻就到。”

　　【栋笃】“起初，神创造天地。地是空虚混沌，渊面黑暗……神说：要有光。就有了光……”嗱，《圣经·旧约》开篇嘅呢一句话，肯定系“史上最牛的一句话”。神（上帝）创造咗天地，又觉得天地之间太过黑暗，于是佢手一笃，话：“要有光。”天地间即刻就有咗光——哗，真系巴闭到咩噉！如果我系神，噉就……
　　（冇错，你已经系神喇，不过系“神咗”嘅神！）
　　咦，边个话我神咗？唔好噉喇大佬，揾餐晏仔啫。系，小弟我都知，佛教先至讲“人人皆可成佛”，基督教系唔会讲“人人皆可成上帝”嘎……咩，我“扯得太远了”？远乎哉？不远也！孔Sir话斋：“我欲仁，斯仁至矣！”呢位仁兄讲嘢，真系几巴——哦，唔巴闭，好实际。
　　点解咁讲？嗱，佛教系讲人人都可以修持觉悟成佛，道教亦都讲人人都可以修炼得道成仙，但系呢两三千年嚟，除咗神话传说，有边个凡人成佛成仙嘎？但系，儒家讲嘅“仁”呢，就唔系咩仙佛等等嘅“超人”境界，而系人嘅本性。所谓“人之初，性本善”，就系呢个意思喇。人嘅本性仁善，但系喺群体社会之中，受到种种诱惑、刺激，人会迷失自己嘅本性，离“仁”就越嚟越远喇。但系，如果有一日佢立志向仁，本性即刻就可以回归——噉，就系“我欲仁，斯仁至矣”喇，亦都系曾经讲过嘅“苟志于仁矣，无恶也”（4·4）。噉样，就同讲“原罪”嘅基督教同埋讲“因果”嘅佛教唔一样。三家都提倡积德行善，只不过，基督教徒嘅行善，系为咗“赎罪”，佛教徒系为咗“消业”或者“福报”，只有儒家嘅求仁，系向本性嘅回归。
　　当然喇，佛教中嘅禅宗，讲嘅亦都同孔Sir差唔多：我心即佛、见性成佛。修持，系为咗顿悟。不过，禅宗就一向都绝对咗啲，“本来无一物，何处惹尘埃”，咩善恶，咩仁义，卒之都系得个“空”字，不利于入世。噉样一对比，我哋就可以明白，点解呢两三千年嚟，儒家学说会喺中国占据统治地位喇。  （插图：老饼）